ನಿಜ, ಕಳೆದ ಕೆಲ ದಿನಗಳಿಂದ ಹಬ್ಬಿದ ಸುದ್ದಿಯೇ ಇದಕ್ಕೆಲ್ಲ ಕಾರಣ; ಅಂದು ನೇತಾಜಿಯ ಪುನರುತ್ಥಾನವಾಗುತ್ತದೆ. ಅದಕ್ಕಾಗಿ ಕರಪತ್ರ, ಬ್ಯಾನರ್‌, ಹೋರ್ಡಿಂಗ್‌ಗಳನ್ನು ಹಾಕಲಾಗಿತ್ತು.
ಹಲವು ಗಂಟೆಗಳ ಬಳಿಕ ವೇದಿಕೆ ಮೇಲೆ ವ್ಯಕ್ತಿಯೊಬ್ಬರ ಆಗಮನವಾಗಿತ್ತು. ಉದ್ದನೆಯ ಬಿಳಿ ಗಡ್ಡ, ನೆರೆತ ತಲೆಗೂದಲಿನ ಆ ವ್ಯಕ್ತಿ ಜನರತ್ತ ಕೈ ಬೀಸಿತು. ಎತ್ತಲಿಂದಲೋ 'ನೇತಾಜಿ ಝಿಂದಾಬಾದ್‌' ಎಂಬ ಘೋಷಣೆ, ಹರ್ಷೋದ್ಗಾರ.
ಅಷ್ಟೇ...ಅಲ್ಲಿ ನಡೆಯಲಿರುವ ಭಯಾನಕ ಸನ್ನಿವೇಶಕ್ಕೆ ಮುನ್ಸೂಚನೆಯೆಂಬಂತೆ ಸೂಜಿ ಬಿದ್ದರೂ ಕೇಳುವಷ್ಟು ನಿಶ್ಶಬ್ಧ. ದಿನಗಟ್ಟಲೆ ಕಾದಿದ್ದ ಜನರಿಗೋ ತಮ್ಮ ಕಣ್ಣನ್ನು ತಾವೇ ನಂಬಲಾರದಷ್ಟು ಆಘಾತ.
ನೇತಾಜಿ ಅವತಾರ ತಾನೆಂದುಕೊಂಡ ಆ ವ್ಯಕ್ತಿ ಒಂದೆರಡು ಮಾತಾಡೋದರೊಳಗೆ ಕಲ್ಲು, ಚಪ್ಪಲಿ, ಬೂಟುಗಳು ತೂರಿಬಂದವು...ಏನಾಗುತ್ತಿದೆ ಎಂದು ಅರ್ಥವಾಗುವಷ್ಟರಲ್ಲಿ ಆ ವ್ಯಕ್ತಿ ಜನರ ಕೈಯ್ಯಲ್ಲಿ ಹಣ್ಣುಗಾಯಿ ನೀರುಗಾಯಿ ಆಗಿಬಿಟ್ಟಿದ್ದ. ಪೊಲೀಸರು ರಕ್ಷಿಸದೇ ಹೋಗಿದ್ದರೆ ಆತ ಅಂದೇ ಫಿನಿಶ್‌!
ಆ ವ್ಯಕ್ತಿ ಮತ್ತಾರೂ ಅಲ್ಲ, ಜೈ ಗುರುದೇವ್‌ ಬಾಬಾ.
ನೇತಾಜಿ ಸುಭಾಷ್‌ ಚಂದ್ರಬೋಸ್‌ ಇನ್ನೂ ಬದುಕಿದ್ದಾರೆ, ಅವರನ್ನು ನಿಮಗೆ ತೋರಿಸುತ್ತೇನೆ ಬನ್ನಿ ಎಂದು ಜನರನ್ನು ನಂಬಿಸಿ, ನಂಬಿಕೆ ದ್ರೋಹ ಮಾಡಿದ ಜೈ ಗುರುದೇವ್‌ಗೆ ಜನ ಕಲಿಸಿದ ಪಾಠ ದುಬಾರಿಯಾಗಿಯೇ ಇತ್ತು.
ಆದರೆ, ಇಷ್ಟಕ್ಕೇ ಸ್ವಯಂ ಘೋಷಿತ ಬಾಬಾನ ಹುಚ್ಚಾಟ ಮುಗಿಯಲಿಲ್ಲ. ಅಕ್ರಮ ಹಾದಿಯಲ್ಲಿ ಕೋಟಿಗಟ್ಟಲೆ ಹಣ ಸಂಪಾದನೆ ಮಾಡಿದ. ಸರಕಾರಿ ಜಮೀನು ಕೊಳ್ಳೆ ಹೊಡೆದ. 'ದೂರದರ್ಶಿ ಪಕ್ಷ'ದ ಹೆಸರಲ್ಲಿ ರಾಜಕೀಯ ಪ್ರವೇಶಿಸಿದ. ...ಬಾಬಾನ ಇಂತಹ ಹತ್ತಾರು ಕಥೆಗಳಿಗೆ ಮಥುರಾದ ಜೈ ಗುರುದೇವ್‌ ಆಶ್ರಮ ಮೂಕ ಸಾಕ್ಷಿಯಾಗಿದೆ.
