ದರೋಡೆಗೆ ಹೊಂಚು, ನಾಲ್ವರ ಬಂಧನ

ಕಲಬುರಗಿ:ಚಿಂಚನಸೂರ-ಕಲ್ಲಹಂಗರಗಾ ರಸ್ತೆಯ ಮಾಪೂರತಾಯಿ ದೇವಾಲಯದ ಕಮಾನ್‌ ಬಳಿ ದಾರಿಹೋಕರ ದರೋಡೆಗೆ ಹೊಂಚು ಹಾಕುತ್ತಾ ಕುಳಿತಿದ್ದ ನಾಲ್ವರನ್ನು ನರೋಣಾ ಪೊಲೀಸರು ಶುಕ್ರವಾರ ನಸುಕಿನಲ್ಲಿಬಂಧಿಸಿದ್ದಾರೆ.

ಜೀವನ ಲಕ್ಷ್ಮಣ ಭಾವಿ, ಮಾಪಣ್ಣ ಬಂಡೆಪ್ಪ ಮಾವಿನಕರ್‌, ದೇವಾ ಅಲಿಯಾಸ್‌ ದೇವಿಂದ್ರ ಮಾವಿನಕರ್‌, ಸನತ್‌ ರೇವಣಸಿದ್ದಪ್ಪ ಭಾವಿ ಬಂಧಿತರು. ಇವರೆಲ್ಲರೂ ಚಿಂಚನಸೂರ ಗ್ರಾಮದವರು. ಇವರೊಂದಿಗೆ ಇದ್ದ ಸೋನಾಜಿ ಪ್ರಕಾಶ್‌ ಸಜ್ಜನ, ರೋಹಣ್‌ ಅಲಿಯಾಸ್‌ ಗುಂಡು ಪ್ರಕಾಶ್‌ ಕಾಂಬಳೆ ಮತ್ತು ಶಿವು ಚಂದಪ್ಪ ವಾಗ್ದರ್ಗಿ ಪೊಲೀಸರ ಆಗಮನ ಕಂಡು ತಕ್ಷಣ ಪರಾರಿಯಾಗಿದ್ದಾರೆ. ಬಂಧಿತರಿಂದ ಒಂದು ಮಿನಿ ಲಾರಿ ಹಾಗೂ ನಾಲ್ಕು ಮೋಟಾರ್‌ ಬೈಕುಗಳನ್ನು ವಶಪಡಿಸಿಕೊಳ್ಳಲಾಗಿದೆ.

ಮಿನಿ ಲಾರಿ ಕದ್ದಿದ್ದ ಭೂಪ!

ಬಂಧಿತ ನಾಲ್ವರನ್ನು ಪೊಲೀಸರು ವಿಚಾರಣೆಗೆ ಒಳಪಡಿಸಿದಾಗ ಒಂದು ಕುತೂಹಲಕಾರಿ ಅಂಶ ಬೆಳಕಿಗೆ ಬಂದಿದೆ.

ಬಂಧಿತರ ಪೈಕಿ ಒಬ್ಬನಾಗಿರುವ ಸನತ್‌ ರೇವಣಸಿದ್ದಪ್ಪ ಭಾವಿ ಎಂಬಾತ ಡಿ.2ರಂದು ನಸುಕಿನ ವೇಳೆ ಮಾಪೂರತಾಯಿ ಕಮಾನ್‌ ಬಳಿ ನಿಂತಿದ್ದ ಮಿನಿ ಲಾರಿಯೊಂದನ್ನು ಕದ್ದು ಹೊಲದಲ್ಲಿಮುಚ್ಚಿಟ್ಟಿದ್ದಾಗಿ ಒಪ್ಪಿಕೊಂಡಿದ್ದಾನೆ. ತಾನು ಕೈಗೊಂಡ ಈ ಕೃತ್ಯದಲ್ಲಿಶಿವಾ ಚಂದಪ್ಪ ವಾಗ್ದರ್ಗಿ ಹಾಗೂ ಪ್ರದೀಪ ಮರೆಪ್ಪ ಮದನಕರ್‌ ಸಹ ಸಾಥ್‌ ನೀಡಿದ್ದರು ಎಂಬ ಅಂಶವನ್ನು ಆತ ಬಹಿರಂಗಪಡಿಸಿದ್ದಾನೆ.