ಬೈಕ್‌ ಕಳ್ಳನ ಬಂಧನ, 11 ಬೈಕ್‌ ಜಪ್ತು

ಕಲಬುರಗಿ :ಸೇಡಂ ಪಟ್ಟಣ ಸೇರಿದಂತೆ ಪಕ್ಕದ ತೆಲಂಗಾಣ ರಾಜ್ಯದ ತಾಂಡೂರ್‌, ಬಷೀರಾಬಾದ್‌ ಪಟ್ಟಣಗಳಲ್ಲಿ ಬೈಕ್‌ಗಳನ್ನು ಕದಿಯುತ್ತಿದ್ದ ವ್ಯಕ್ತಿಯನ್ನು ಇಲ್ಲಿನ ಪೊಲೀಸರು ಕಾರ್ಯಾಚರಣೆ ಮೂಲಕ ಬಂಧಿಸಿದ್ದಾರೆ. ಬಂಧಿತನಿಂದ 11 ಬೈಕ್‌ಗಳನ್ನು ವಶಪಡಿಸಿಕೊಂಡಿದ್ದಾರೆ.

ಕಾಳಗಿಯ ಮೂಲದ ತಾಂಡೂರ್‌ ನಿವಾಸಿ ಸಾಹೇಬ್‌ ಪಟೇಲ್‌ ಮೆಹಬೂಬ್‌ಸಾಬ್‌ ಬಾರಾಮನಿ ಬಂಧಿತ ಆರೋಪಿ. ಈತನ ಸಹಚರ ಸೇಡಂ ನಿವಾಸಿ ಮಲ್ಲು ಅಲಿಯಾಸ್‌ ಮಲ್ಲಿಕಾರ್ಜುನ ಶರಣಪ್ಪ ಟೆಂಗಳಿ ತಲೆ ಮರೆಸಿಕೊಂಡಿದ್ದಾನೆ.

ಸೇಡಂ ಪಟ್ಟಣ ಸೇರಿದಂತೆ ತಾಂಡೂರ, ಬಶೀರಾಬಾದ್‌ ಹಾಗೂ ಇತರೆಡೆ ಒಟ್ಟು 11 ದ್ವಿಚಕ್ರ ವಾಹನಗಳನ್ನು ವಶಪಡಿಸಿಕೊಳ್ಳಲಾಗಿದೆ. ಈ ವಾಹನಗಳ ಒಟ್ಟು ಮೌಲ್ಯ ರೂ. 5 ಲಕ್ಷ 55 ಸಾವಿರ ಎಂದು ಪೊಲೀಸರು ಅಂದಾಜಿಸಿದ್ದಾರೆ.

ಸೇಡಂ ಪಟ್ಟಣದ ಕೊತ್ತಲಬಸವೇಶ್ವರ ದೇವಾಲಯದ ಆವರಣ ಮತ್ತು ಸೇಡಂ ಸರಕಾರಿ ಆಸ್ಪತ್ರೆ ಆವರಣದಲ್ಲಿ ನಿಲ್ಲಿಸಿದ ತಮ್ಮ ಬೈಕ್‌ಗಳು ಕಳುವಾಗಿವೆ ಎಂದು ತಾಲೂಕಿನ ಯಡಗಾ ಗ್ರಾಮದ ನಾಗಪ್ಪ ಚಂದ್ರಪ್ಪ ದೇವನೂರ ಮತ್ತು ಸೇಡಂ ಪಟ್ಟಣದ ರಾಘವೇಂದ್ರ ದತ್ತಾತ್ರೇಯ ಕುಲಕರ್ಣಿ ಸೇಡಂ ಠಾಣೆಗೆ ದೂರು ಸಲ್ಲಿಸಿದ್ದರು. ಈ ದೂರಿನ ಜಾಡು ಹಿಡಿದು ಹೊರಟ ಪೊಲೀಸರು ಮೊದಲು ಸಾಹೇಬ್‌ ಪಟೇಲ್‌ ಎಂಬಾತನನ್ನು ಬಂಧಿಸಿ ವಿಚಾರಣೆಗೆ ಒಳಪಡಿಸಿದಾಗ ಆತ ತನ್ನ ಮತ್ತೊಬ್ಬ ಸಹಚರನೊಂದಿಗೆ ಸೇಡಂ, ತಾಂಡೂರು ಮತ್ತು ಬಷೀರಾಬಾದ್‌ ಪಟ್ಟಣಗಳಲ್ಲಿ ಬೈಕ್‌ಗಳನ್ನು ಕದ್ದಿರುವುದಾಗಿ ಒಪ್ಪಿಕೊಂಡಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಎಸ್‌ಪಿ ಯಡಾ ಮಾರ್ಟಿನ್‌ ಮಾರ್ಬನ್ಯಾಂಗ್‌ ಮತ್ತು ಚಿಂಚೋಳಿ ಎಎಸ್‌ಪಿ ಅಕ್ಷಯ್‌ ಹಾಕೆ ಅವರ ಮಾರ್ಗದರ್ಶನದಲ್ಲಿ ಸೇಡಂ ಠಾಣೆಯ ಸಿಪಿಐ,ಪಿಎಸ್‌ಐ ನೇತೃತ್ವದಲ್ಲಿ ಎಎಸ್‌ಐ ಪೃಥ್ವಿರಾಜ, ಸಿಪಿಸಿ ಶಿವಕುಮಾರ, ಪೇದೆಗಳಾದ ಮನೋಹರ, ಸಿಪಿಸಿ ತೋಟಯ್ಯ, ಹೆಡ್‌ ಕಾನ್ಸ್‌ಟೇಬಲ್‌ಗಳಾದ ಶ್ರೀನಿವಾಸ ರೆಡ್ಡಿ, ಅಲ್ಲಾ ಭಕ್ಷ್‌, ಸಿಪಿಸಿ ಆಸಿಫ್‌, ಎಚ್‌ಸಿ ವಿಠ್ಠಲ ರೆಡ್ಡಿ, ಪೇದೆಗಳಾದ ರಾಜಕುಮಾರ್‌, ಸುನೀಲಕುಮಋು ಸೇರಿದಂತೆ ಇತರರು ಈ ಕಾರ್ಯಾಚರಣೆಯಲ್ಲಿ ಪಾಲ್ಗೊಂಡಿದ್ದರು.

ಸೇಡಂ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.