ವಿಶ್ವನಾಥ್ ಉಪಚುನಾವಣೆಗೆ ನಿಂತು ತಪ್ಪು ಮಾಡಿದರು, ಬೈರತಿ ಮಾತಿನ ಮರ್ಮವೇನು?

ಕಲಬುರಗಿ: ಎಚ್‌.ವಿಶ್ವನಾಥ್ ಉಪಚುನಾವಣೆಗೆ ನಿಂತು ತಪ್ಪು ಮಾಡಿದರು. ಹೀಗಂದವರು ಸಚಿವ ಬೈರತಿ ಬಸವರಾಜು. ಎಮ್‌ಎಲ್‌ಸಿ ಸ್ಥಾನ ಕೈತಪ್ಪಿ ಅಸಮಾಧಾನದಲ್ಲಿರುವ ವಿಶ್ವನಾಥ್‌ ಅವರ ಇಂದಿನ ಪರಿಸ್ಥಿತಿಗೆ ಅವರೇ ಕಾರಣ ಎಂದು ಭೈರತಿ ಪರೋಕ್ಷವಾಗಿ ಸ್ಪಷ್ಟಪಡಿಸಿದ್ದಾರೆ.

ಕಲಬುರಗಿಯಲ್ಲಿ ಮಾತನಾಡಿದ ಅವರು, ವಿಧಾನಸಭೆ ಉಪಚುನಾವಣೆಗೆ ಸ್ಪರ್ಧಿಸಬೇಡಿ ಎಂದು ಹೇಳಿದರೂ ಕೇಳದೆ ನಿಂತು ವಿಶ್ವನಾಥ್ ಸೋಲನ್ನು ಅನುಭವಿಸಿದರು. ಆ ಕಾರಣಕ್ಕಾಗಿ ಈಗ ಅವರಿಗೆ ವಿಧಾನ ಪರಿಷತ್ ಸ್ಥಾನವೂ ಸಿಗಲಿಲ್ಲ ಎಂದಿದ್ದಾರೆ.

ಕಲಬುರಗಿ: ಪೊಲೀಸರ ಜೊತೆ ಜನರ ಘರ್ಷಣೆ, ಆಂಬ್ಯುಲೆನ್ಸ್‌ ಜಖಂ, ಆರೋಗ್ಯ ಸಿಬ್ಬಂದಿಗೆ ಗಾಯ

ಚುನಾವಣಾ ಸ್ಪರ್ಧೆ ಮಾಡುವುದರ ಬದಲಾಗಿ ವಿಧಾನ ಪರಿಷತ್ ಸದಸ್ಯರನ್ನಾಗಿ ಮಾಡಿ, ಸಚಿವ ಸ್ಥಾನ ನೀಡುವುದಾಗಿ ಸಿಎಂ ಬಿ.ಎಸ್‌ ಯಡಿಯೂರಪ್ಪ ಹೇಳಿದ್ದರು. ಆದರೆ ಅವರ ಮಾತನ್ನು ಕೇಳದೆ ನಾನು ಚುನಾವಣೆಗೆ ನಿಂತು ಗೆದ್ದು ಬರುತ್ತೇನೆ ಎಂದಿದ್ದರು ವಿಶ್ವನಾಥ್. ಆದರೆ ಅದು ಸಾಧ್ಯವಾಗಲಿಲ್ಲ.

ಆದರೆ ಚುನಾವಣೆಯಲ್ಲಿ ಗೆಲ್ಲಲೂ ಸಾಧ್ಯವಾಗಿಲ್ಲ, ಪರಿಣಾಮ ವಿಧಾನಪರಿಷತ್ ಸ್ಥಾನವೂ ಸಿಗಲಿಲ್ಲ ಎನ್ನುವ ಮೂಲಕ ಸದ್ಯದ ವಿಶ್ವನಾಥ್ ರಾಜಕೀಯ ಸಂಕಷ್ಟದ ಪರಿಸ್ಥಿತಿಗೆ ಅವರೇ ಕಾರಣ ಎಂದಿದ್ದಾರೆ ಬೈರತಿ ಬಸವರಾಜ್.