ಕಾರು ಡಿಕ್ಕಿ, ಇಬ್ಬರು ಬೈಕ್‌ ಸವಾರರು ಸಾವು

ಕಲಬುರಗಿ:ಬೈಕಿಗೆ ಕಾರು ಡಿಕ್ಕಿ ಹೊಡೆದ ಪರಿಣಾಮ ಇಬ್ಬರು ಬೈಕ್‌ ಸವಾರರು ಸ್ಥಳದಲ್ಲೇ ಸಾವನ್ನಪ್ಪಿದ ಘಟನೆ ಶಹಾಬಾದ್‌ ರಸ್ತೆಯ ದೇವನ ತೆಗನೂರ ಗ್ರಾಮದ ಬಳಿ ಸೋಮವಾರ ರಾತ್ರಿ ನಡೆದಿದೆ.

ವಾಡಿ ಪಟ್ಟಣದ ನಿವಾಸಿಗಳಾದ ಸೈಯದ್‌ ಸಾಬಿರ್‌ ಪಾಶಾ (40), ಮಹ್ಮದ್‌ ಶರೀಫ್‌ (40) ಮೃತ ಪಟ್ಟವರು. ಇಬ್ಬರೂ ಸ್ನೇಹಿತರಾಗಿದ್ದು ಕಲಬುರಗಿಯಿಂದ ವಾಡಿ ಕಡೆಗೆ ಹೊರಟಿದ್ದಾಗ ಎದುರಿನಿಂದ ಬಂದ ಕಾರು ಡಿಕ್ಕಿ ಹೊಡೆದಿದೆ. ಘಟನೆಯ ಬಳಿಕ ಚಾಲಕ ಸ್ಥಳದಲ್ಲಿಯೇ ಕಾರನ್ನು ಬಿಟ್ಟು ಪರಾರಿಯಾಗಿದ್ದಾನೆ.

ಶಹಾಬಾದ್‌ ನಗರ ಠಾಣೆಯ ಪೊಲೀಸ್‌ ಇನ್ಸ್‌ಪೆಕ್ಟರ್‌ ಬಿ.ಅಮರೇಶ್‌ ಘಟನಾ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ. ಪ್ರಕರಣ ದಾಖಲಾಗಿದ್ದು, ತನಿಖೆ ಮುಂದುವರೆದಿದೆ.