ಕಲಬುರಗಿ: 1 ವರ್ಷದ ಮಗುವಿಗೂ ಕೊರೊನಾ; ಹಳ್ಳಿಗೂ ಕಾಲಿಟ್ಟ ಮಹಾಮಾರಿ

ಕಲಬುರಗಿ: ಜಿಲ್ಲೆಯಲ್ಲಿ ಒಂದು ವರ್ಷದ ಮಗುವಿಗೂ ಕೊರೊನಾ ಸೋಂಕು ಕಾಣಿಸಿಕೊಂಡಿದೆ. ಅಲ್ಲದೆ, ಪಟ್ಟಣಕ್ಕೆ ಸೀಮಿತವಾಗಿದ್ದ ವೈರಾಣು ಹಳ್ಳಿಗೂ ಕಾಲಿಟ್ಟಿದ್ದು, ಗ್ರಾಮಸ್ಥರಲ್ಲಿ ಆತಂಕ ಮೂಡಿಸಿದೆ.

ಈವರೆಗೆ ಕಲಬುರಗಿ ನಗರ ಮತ್ತು ಜಿಲ್ಲೆಯ ವಾಡಿ, ಶಹಾಬಾದ್ ಪಟ್ಟಣಕ್ಕೆ ಸೀಮಿತವಾಗಿದ್ದ ಕೊರೊನಾ ವೈರಸ್ ಸೋಂಕು ಕೊನೆಗೂ ಹಳ್ಳಿಗೆ ಕಾಲಿಟ್ಟಿದ್ದಾಗಿದೆ. ಕಲಬುರಗಿ ತಾಲೂಕಿನ ಸರಡಗಿ (ಬಿ) ಗ್ರಾಮದಲ್ಲಿ ಒಂದು ವರ್ಷದ ಗಂಡು ಮಗುವಿನಲ್ಲಿ ಕೊರೊನಾ ಸೋಂಕು ಪತ್ತೆಯಾಗಿದೆ. ಜಿಲ್ಲಾಡಳಿತ ಈ ಆಘಾತಕಾರಿ ಅಂಶವನ್ನು ದೃಢಪಡಿಸಿದೆ.

ಮಗುವಿನ ತಾಯಿ ಸರಡಗಿ(ಬಿ) ಗ್ರಾಮಕ್ಕೆ ಸೇರಿದವರಾಗಿದ್ದು ಪಕ್ಕದ ಕವಲಗಾ (ಬಿ) ಗ್ರಾಮದಲ್ಲಿ ಈಕೆಯ ಪತಿಯ ಮನೆಯಿದೆ. ಈಕೆಯ ಪತಿ ಮುಂಬಯಿ ಮಹಾನಗರದಿಂದ ಇತ್ತೀಚೆಗೆ ಹಳ್ಳಿಗೆ ವಾಪಸ್ಸಾಗಿದ್ದಾನೆ. ಬಹುತೇಕ ಈ ವ್ಯಕ್ತಿಯಿಂದಲೇ ಒಂದು ವರ್ಷದ ಮಗುವಿಗೆ ಸೋಂಕು ತಗಲಿರಬಹುದು ಎಂಬ ಶಂಕೆ ವ್ಯಕ್ತವಾಗುತ್ತಿದೆ.

ರಾಜ್ಯದಲ್ಲಿ ನಿಲ್ಲುತ್ತಿಲ್ಲ ಕೊರೊನಾ ಆರ್ಭಟ, ಮತ್ತೆ 17 ಪಾಸಿಟಿವ್‌ ಕೇಸ್‌, 277ಕ್ಕೇರಿದ ಸೋಂಕಿತರು

ಇನ್ನು, ಮಗುವಿಗೆ ಕೊರೊನಾ ಪಾಸಿಟಿವ್‌ ಧೃಡಪಡುತ್ತಿದ್ದಂತೆ ಮಗುವಿನ ತಾಯಿ-ತಂದೆ ಹಾಗೂ ಮನೆಯಲ್ಲಿದ್ದ ಇತರ ಸದಸ್ಯರನ್ನು ಹೋಂ ಕ್ವಾರಂಟೈನ್ ಮಾಡಲಾಗಿದೆ. ಅಲ್ಲದೆ, ಸರಡಬಿ(ಬಿ) ಮತ್ತು ಕವಲಗಾ(ಬಿ) ಗ್ರಾಮಗಳಲ್ಲಿ ಆತಂಕ ಮನೆ ಮಾಡಿದೆ.

ಕಲಬುರಗಿ: ಕಾಲು ಮುರಿದಿದೆಯೆಂದು ಚಿಕಿತ್ಸೆಗೆ ಹೋಗಿದ್ದ ಮಗುವಿಗೆ ಕೊರೊನಾ!