ವರದಕ್ಷಿಣೆ ಕಿರುಕುಳ: ಕೊಲೆ ಆರೋಪ

ಕಲಬುರಗಿ : ನಗರದ ಹೀರಾಪೂರದ ಬಳಿಯ ಮಿಜಬಾನಗರದ ಹಾಜರಾ ಇರಾಂ ಎನ್ನುವ ಮಹಿಳೆ ಬುಧವಾರ ರಾತ್ರಿ ಗಂಡನ ಮನೆಯಲ್ಲಿ ನೇಣು ಹಾಕಿಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದಾಳೆ. ಆದರೆ, ಇದು ಆತ್ಮಹತ್ಯೆಯಲ್ಲ ವರದಕ್ಷಿಣೆಗಾಗಿ ಪೀಡಿಸಿ ಕೊಲೆ ಮಾಡಲಾಗಿದೆ ಎಂದು ಇರಾಂ ಪಾಲಕರು ದೂರಿದ್ದಾರೆ.

ಮೊಮಿನಪುರ ಬಡಾವಣೆಯ ಖಾರಿಬೌಡಿಯ ಮಹಮ್ಮದ ಅಜಗರ್‌ ಅಹಮದ್‌ ಬಸೀರ್‌ ಅಹಮದ್‌ ಅದೋನಿ ಅವರ ಮಗಳು ಹಾಜರಾ ಇರಾಂ ಅವಳನ್ನು ಮಿಜಬಾನಗರದ ಸೈಯದ ಆಸೀಫ್‌ನಿಗೆ ಕೊಟ್ಟು ಮದುವೆ ಮಾಡಲಾಗಿತ್ತು. ಒಂದು ಗಂಡು ಮಗು ಕೂಡ ಇದ್ದು, ಈಚೆಗೆ ತವರು ಮನೆಯಿಂದ ಹಣ ಮತ್ತು ಗಂಡನಿಗೆ ಮೆಡಿಕಲ್‌ ಇಟ್ಟುಕೊಳ್ಳಲು ಮಳಿಗೆ ಕೊಡಿಸುವಂತೆ ಪೀಡಿಸಿ ಹಿಂಸೆ ನೀಡಿದ್ದರು. ಆದರೆ, ನಾವು ಈ ಕುರಿತು ಮಾತುಕತೆ ಮಾಡುವ ಹಂತದಲ್ಲಿರುವಾಗಲೇ ಗಂಡ ಆಸೀಫ್‌, ಅತ್ತೆ ಖಾಜಬೀ ಬೇಗಂ, ಮೈದುನ ಸೈಯದ ಕಲೀಮ ಅಹಮದ್‌, ಮಾವ ಸೈಯದ್‌ ನಿಸಾರ ಅಹಮದ್‌, ನಾದನಿ ಕನೀಜ್‌ ಬೇಗಂ ಸೇರಿಕೊಂಡು ಕೊಲೆ ಮಾಡಿ ಕೋಣೆಯೊಂದರ ಪ್ಯಾನಿಗೆ ನೇಣು ಹಾಕಿದ್ದಾರೆ ಎಂದು ದೂರಿನಲ್ಲಿ ವಿವರಿಸಿದ್ದಾರೆ. ಗ್ರಾಮೀಣ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.