ನಿಷೇಧಾಜ್ಞೆ ಉಲ್ಲಂಘನೆ: ಮಾಜಿ ಸಚಿವ ಶರಣ ಪ್ರಕಾಶ್ ಪಾಟೀಲ್ ವಿರುದ್ಧ ಎಫ್ ಐ ಆರ್ ದಾಖಲು

ಕಲಬುರಗಿ: ಕೋವಿಡ್-19 ತಡೆಗಟ್ಟುವ ಹಿನ್ನೆಲೆಯಲ್ಲಿ ಜಿಲ್ಲೆಯಾದ್ಯಂತ ಜಾರಿಯಲ್ಲಿರುವ ನಿಷೇದಾಜ್ಞೆ ಉಪೇಕ್ಷಿಸಿ ಸಾರ್ವಜನಿಕ ಸಭೆ ನಡೆಸಿದ ಆರೋಪದ ಮೇರೆಗೆ ಮಾಜಿ ಸಚಿವ ಡಾ.ಶರಣ ಪ್ರಕಾಶ್ ಸೇರಿದಂತೆ ಕಾಂಗ್ರೆಸ್ ಪಕ್ಷದ ಒಟ್ಟು 23 ಮುಖಂಡರ ವಿರುದ್ಧ ಸುಲೇಪೇಟ್ ಠಾಣೆಯಲ್ಲಿ ಎಫ್.ಐ.ಆರ್. ದಾಖಲಾಗಿದೆ.

ಮೇ 13ರಂದು ಮಾಜಿ ಸಚಿವ ಡಾ.ಪಾಟೀಲ್ ತಮ್ಮ ಬೆಂಬಲಿಗರೊಂದಿಗೆ ಸುಲೇಪೇಟ್ ಪಟ್ಟಣದಲ್ಲಿರುವ ಕಾಂಗ್ರೆಸ್ ಮುಖಂಡ ಮೇಘರಾಜ ರಾಠೋಡ್ ಮಾಲಿಕತ್ವದ ಕಲ್ಯಾಣ ಮಂಟಪದಲ್ಲಿ ಸಂಜೆ 6ರಿಂದ 6.30ರ ಮಧ್ಯೆ ಸಭೆ ನಡೆಸಿದ್ದಾರೆ ಎಂದು ಕೋವಿಡ್-19 ಸೆಕ್ಟರಲ್ ಮ್ಯಾಜಿಸ್ಟ್ರೇಟ್ ಹಾಗೂ ಚಿಂಚೋಳಿ ವಲಯ ಅರಣ್ಯಾಧಿಕಾರಿ ಮುನೀರ್ ಅಹ್ಮದ್ ಸುಲೇಪೇಟ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ.

ಈ ದೂರಿಗೆ ಪೂರಕವಾಗಿ ಮುನೀರ್ ಅವರು ವಿಡಿಯೋ ದೃಶ್ಯಾವಳಿ ಹಾಗೂ ಛಾಯಾಚಿತ್ರಗಳನ್ನು ಸಹ ಸಲ್ಲಿಸಿದ್ದಾರೆ. ಹೀಗಾಗಿ ಡಾ.ಪಾಟೀಲ್ ಸೇರಿದಂತೆ ಅವರ ಅನುಯಾಯಿಗಳಾದ ಸೇಡಂ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷ ನಾಗೇಶ್ವರರಾವ್ ಮಾಲಿಪಾಟೀಲ್, ವೆಂಕಟರಾಮರೆಡ್ಡಿ, ನಾಗರೆಡ್ಡಿ, ರಾಮಯ್ಯ ಪೂಜಾರಿ, ಶರಣಗೌಡ ಪಾಟೀಲ್, ಗುರುನಾಥರೆಡ್ಡಿ, ನರಸರೆಡ್ಡಿ ಹಾಗೂ ಶಂಭುಲಿಂಗ ಪಾಟೀಲ್ ಸೇರಿದಂತೆ 23 ಮುಖಂಡರ ವಿರುದ್ಧ ಎಫ್‌ಐ‌ಆರ್ ದಾಖಲಾಗಿದೆ.
ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.