ಕಲಬುರಗಿ: ಸುಕ್ಷೇತ್ರ ದೇವಲ ಗಾಣಗಾಪುರದ ದತ್ತನ ಹುಂಡಿಗೆ ದಾಖಲೆಯ ಕಾಣಿಕೆ ಸಲ್ಲಿಕೆಯಾಗಿದೆ. ಜಿಲ್ಲಾಡಳಿತ ಮತ್ತು ಪೊಲೀಸ್‌ ಅಧಿಕಾರಿಗಳ ಸಮ್ಮುಖದಲ್ಲಿ ಗುರುವಾರ ಹುಂಡಿ ಒಡೆದು ಎಣಿಸಲಾಗಿದ್ದು, 49.89 ಲಕ್ಷ ರೂ.ಗಳು, 14 ತೊಲ ಬಂಗಾರ, 28 ತೊಲ ಬೆಳ್ಳಿಯನ್ನು ತೂಕ ಮಾಡಲಾಯಿತು. ಇದುವರೆಗೆ ದಾಖಲಾದ ಹುಂಡಿ ಮೊತ್ತದಲ್ಲಿ ಇದೇ ಅತ್ಯಂತ ಹೆಚ್ಚು ಎಂದು ಮೂಲಗಳು ತಿಳಿಸಿವೆ.
ಜಿಲ್ಲಾಧಿಕಾರಿ ಕಚೇರಿಯ ಶಿಷ್ಟಾಚಾರ ತಹಶೀಲ್ದಾರ್‌ ಪ್ರಕಾಶ್‌ ಚಿಂಚೋಳಿಕರ್‌, ಉಪ ತಹಶೀಲ್ದಾರ್‌ ಅನಂತ ಕುಲಕರ್ಣಿ, ರವೀಂದ್ರ ರೆಡ್ಡಿ, ಸೂರ್ಯಕಾಂತ ಕುಲಕರ್ಣಿ, ಎಸ್‌ಬಿಎಚ್‌ ಶಾಖಾ ವ್ಯವಸ್ಥಾಪಕ ಸತ್ಯನಾರಾಯಣ, ದೇವಸ್ಥಾನದ ಆಡಳಿತಾಧಿಕಾರಿ ಕೆ.ಜಿ. ಬಿರಾದಾರ್‌, ಪಿಎಸ್‌ಐ ಭೀಮರಾಯಗೌಡ ಮುಂತಾದವರು ಈ ಸಂದರ್ಭದಲ್ಲಿ ಇದ್ದರು. ಎಲ್ಲರ ಸಮ್ಮುಖದಲ್ಲಿ ಹಣ ಎಣಿಕೆ ಮಾಡಿ, ಬೆಳ್ಳಿ ಬಂಗಾರವನ್ನು ತೂಕ ಮಾಡಲಾಯಿತು.