ಗುಮುಲ್‌ ಆಡಳಿತ ಮಂಡಳಿ ವರ್ತನೆಗೆ ಖಂಡನೆ

ಕಲಬುರಗಿ:ಬೀದರ್‌, ಕಲಬುರಗಿ, ಯಾದಗಿರಿ ಹಾಲು ಉತ್ಪಾದಕರ ಒಕ್ಕೂಟದ (ಗುಮುಲ್‌) ನೂತನ ವ್ಯವಸ್ಥಾಪಕ ನಿರ್ದೇಶಕ ವಿಶ್ವನಾಥ ಮಲಕೂಡ ಅವರು ಪದಗ್ರಹಣ ಮಾಡದಂತೆ ತಡೆಯುತ್ತಿರುವ ಆಡಳಿತ ಮಂಡಳಿಯ ವರ್ತನೆ ಖಂಡನೀಯ ಎಂದು ಜೆಡಿಎಸ್‌ ಟೀಕಿಸಿದೆ.

ಪಕ್ಷದ ಮಹಾ ಪ್ರಧಾನ ಕಾರ್ಯದರ್ಶಿ ಶಾಮರಾವ್‌ ಸೂರನ್‌ ಈ ಕುರಿತು ಹೇಳಿಕೆಯೊಂದನ್ನು ಬಿಡುಗಡೆ ಮಾಡಿದ್ದು, ರಾಜ್ಯ ಸರಕಾರದ ಆದೇಶವನ್ನು ಪಾಲಿಸಬೇಕೋ ಬೇಡವೋ ಎಂದು ಸಭೆ ಕರೆದು ಚರ್ಚಿಸುವ ಗುಮುಲ್‌ ಆಡಳಿತ ಮಂಡಳಿಯ ವರ್ತನೆ ಅಚ್ಚರಿ ಮೂಡಿಸುವಂತಿದೆ ಎಂದಿದ್ದಾರೆ.

ಹೈನೋದ್ಯಮದಲ್ಲಿತೊಡಗಿರುವ ರೈತರ ಹಿತ ಕಾಯುವ ನಿಟ್ಟಿನಲ್ಲಿಆಡಳಿತ ಮಂಡಳಿ ಮುತುವರ್ಜಿ ತೋರಬೇಕೆ ಹೊರತು; ಆಡಳಿತ ಮಂಡಳಿಗೆ ಅನುಕೂಲ ಎನಿಸುವ ವ್ಯಕ್ತಿಯನ್ನು ವ್ಯವಸ್ಥಾಪಕ ನಿರ್ದೇಶಕರ ಹುದ್ದೆಯಲ್ಲಿಮುಂದುವರೆಯುವಂತೆ ನೋಡಿಕೊಳ್ಳುವುದು ಸರಿಯಲ್ಲ. ಇನ್ನಾದರೂ ಆಡಳಿತ ಮಂಡಳಿ ಉತ್ತಮ ಆಡಳಿತಗಾರ ಎಂದು ಗುರುಸಿಕೊಂಡಿರುವ ವಿಶ್ವನಾಥ ಮಲಕೂಡ ಅವರು ವ್ಯವಸ್ಥಾಪಕ ನಿರ್ದೇಶಕರ ಹುದ್ದೆಯ ಪದಭಾರ ವಹಿಸಿಕೊಳ್ಳಲು ಅವಕಾಶ ಕಲ್ಪಿಸಬೇಕೆಂದು ಸೂರನ್‌ ಸಲಹೆ ನೀಡಿದ್ದಾರೆ.