ಐಟಿ ದಾಳಿ: ವಿರೋಧ ಪಕ್ಷಗಳ ಹೆದರಿಸುವ ತಂತ್ರ-ಖರ್ಗೆ

ಕಲಬುರಗಿ:ಸಿಎಂ ಎಚ್‌.ಡಿ. ಕುಮಾರಸ್ವಾಮಿ ಆಪ್ತರ ಮನೆ ಮೇಲೆ ಐ.ಟಿ ದಾಳಿಗೆ ತೀಕ್ಷ್ಣ ಪ್ರತಿಕ್ರಿಯೆ ನೀಡಿರುವ ಲೋಕಸಭೆ ಕಾಂಗ್ರೆಸ್‌ ಸಂಸದೀಯ ನಾಯಕ ಮಲ್ಲಿಕಾರ್ಜುನ ಖರ್ಗೆ, ಇಂತಹ ದಾಳಿಗಳ ಮೂಲಕ ವಿರೋಧ ಪಕ್ಷಗಳ ಮುಖಂಡರಿಗೆ ಬೆದರಿಸುವ ತಂತ್ರಕ್ಕೆ ಪ್ರಧಾನಿ ಮೋದಿ ಮುಂದಾಗಿದ್ದಾರೆ ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಗುರುವಾರ ಭೇಟಿಯಾದ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಸಿಎಂ ಬೆಂಬಲಿಗರು, ವಿರೋಧ ಪಕ್ಷಗಳ ಮುಖಂಡರು ಚುನಾವಣೆಯಲ್ಲಿ ಕೆಲಸ ಮಾಡದಂತೆ ಮಾನಸಿಕ ಒತ್ತಡ ಹಾಕುವ ಷಡ್ಯಂತ್ರ ಮಾಡುತ್ತಿದ್ದಾರೆ. ಅವರು ಎಷ್ಟೇ ಹೆದರಿಸಿ ಬೆದರಿಸಿದರೂ ಜನರ ಮನಸ್ಸಿನಲ್ಲಿ ಏನು ಇರುತ್ತದೋ ಅದೇ ಆಗುತ್ತದೆ. ಚುನಾವಣೆ ಗೆಲ್ಲಲ್ಲು ಈ ಭಯದ ವಾತಾವರಣ ಸೃಷ್ಟಿ ಮಾಡಲು ಈ ತಂತ್ರ ಹುಡುಕಿದ್ದಾರೆ. ಚುನಾವಣೆಯಲ್ಲಿ ಯಾರಿಗೆ ಮತ ಹಾಕಬೇಕೋ ಅವರಿಗೆ ಹಾಕುತ್ತಾರೆ. ಆದರೆ ಕೇಂದ್ರ ಸರಕಾರ ಹೆದರಿಸುವ ತಂತ್ರ ಬಿಡಬೇಕು,'' ಎಂದು ಆಗ್ರಹಿಸಿದರು.

''ಆದಾಯ ತೆರಿಗೆ ಇಲಾಖೆ, ಜಾರಿ ನಿರ್ದೇಶನಾಲಯ, ಸಿಬಿಐ ಸೇರಿದಂತೆ ಸಾಂವಿಧಾನಿಕ ಸಂಸ್ಥೆಗಳನ್ನು ಮೋದಿ ದುರುಪಯೋಗ ಮಾಡಿಕೊಳ್ಳುವುದಕ್ಕೆ ಮುಂದಾಗಿದ್ದಾರೆ. ದಾಳಿ ಮಾಡಬೇಕಿದ್ದರೆ ಚುನಾವಣೆಗೂ ಮೊದಲೇ ಐ.ಟಿ ದಾಳಿ ಮಾಡಬೇಕಿತ್ತು. ಆದರೆ ಈಗ ಏಕಾ ಏಕಿಯಾಗಿ ದಾಳಿ ಮಾಡುವುದರ ಉದ್ದೇಶ ಏನು,'' ಎಂದು ಖರ್ಗೆ ಪ್ರಶ್ನಿಸಿದರು.

''ರಾಜ್ಯದಲ್ಲಿ ಸಮ್ಮಿಶ್ರ ಸರಕಾರ ಇದೆ. ಜೆಡಿಎಸ್‌ -ಕಾಂಗ್ರೆಸ್‌ ಮುಖಂಡರನ್ನು ಸೈಲೆಂಟ್‌ ಮಾಡಬೇಕೆಂದು ಮುಂದಾಗಿದ್ದಾರೆ. ಮತಕ್ಕಾಗಿ ಹೆದರಿಕೆ ಬೆದರಿಕೆ ತಂತ್ರ ಮಾಡುವುದು ಸರಿಯಲ್ಲ,'' ಎಂದು ಕಿವಿ ಮಾತು ಹೇಳಿದ್ದಾರೆ.