ಕೊಟಗಿ ಹತ್ಯೆ: ಇಬ್ಬರು ಆರೋಪಿಗಳ ಬಂಧನ

ಕಲಬುರಗಿ:ನಗರದ ಖರ್ಗೆ ಕಾಲೊನಿಯಲ್ಲಿಇತ್ತೀಚೆಗೆ ನಡೆದ ಪ್ರಶಾಂತ ಕೊಟಗಿ ಎಂಬಾತನ ಹತ್ಯೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಇಬ್ಬರು ಆರೋಪಿಗಳನ್ನು ಬಂಧಿಸುವಲ್ಲಿಪೊಲೀಸರು ಯಶಸ್ವಿಯಾಗಿದ್ದಾರೆ.

ಬಿದ್ದಾಪುರ ಕಾಲೊನಿಯ ವಿನೋದ ತಂದೆ ಧರ್ಮಣ್ಣ ಚವ್ಹಾಣ ಮತ್ತು ಮಹೇಶ್‌ ತಂದೆ ಕಾಶಿನಾಥ ಪರೀಟ ಅಲಿಯಾಸ್‌ ದೋಬಿ ಬಂಧಿತರು. ಇವರಿಬ್ಬರೂ ಶರಣ ಸಿರಸಗಿ ಸಮೀಪದ ನಿಸರ್ಗ ಕಾಲೊನಿಯ ಪ್ರಶಾಂತನನ್ನು ಭೇಟಿ ಮಾಡಿ ಮದ್ಯಸೇವನೆಗೆ ಹಣವನ್ನು ಸಾಲದ ರೂಪದಲ್ಲಿಕೇಳಿದ್ದರು. ಪ್ರಶಾಂತ ಸಾಲ ನೀಡಲು ನಿರಾಕರಿಸಿದ್ದರಿಂದ ಇಬ್ಬರೂ ಆರೋಪಿಗಳು ಪ್ರಶಾಂತನಿಗೆ ಮಚ್ಚಿನಿಂದ ಕೊಚ್ಚಿ ಕೊಲೆ ಮಾಡಿ ಪರಾರಿಯಾಗಿದ್ದರು. ಈ ಕುರಿತು ಗ್ರಾಮೀಣ ಠಾಣೆಯಲ್ಲಿಪ್ರಕರಣ ದಾಖಲಾಗಿತ್ತು. ಇವರಿಬ್ಬರನ್ನೂ ಪೊಲೀಸರು ತಾಲೂಕಿನ ಅವರಾದ (ಬಿ) ಗ್ರಾಮದ ಬಳಿ ಭಾನುವಾರ ಬಂಧಿಸುವಲ್ಲಿಸಫಲರಾಗಿದ್ದಾರೆ.

ಈ ಕುರಿತು ಪೊಲೀಸ್‌ ಆಯುಕ್ತ ಎಂ.ಎನ್‌.ನಾಗರಾಜ, ಡಿಸಿಪಿ ಕಿಶೋರ್‌ಬಾಬು ಮಾರ್ಗದರ್ಶನದಲ್ಲಿಸಿ ವಿಭಾಗದ ಎಸಿಪಿ ಎಸ್‌.ಎಚ್‌.ಸುಬೇದಾರ್‌, ಗ್ರಾಮೀಣ ಪಿಐ ಸೋಮಲಿಂಗ ಕಿರದಳ್ಳಿ, ಪಿಎಸ್‌ಐ ಎಸ್‌.ಎಸ್‌.ದೊಡ್ಡಮನಿ ಹಾಗೂ ಸಿಬ್ಬಂದಿ ಕಾರ್ಯಾಚರಣೆ ಕೈಗೊಂಡು ಆರೋಪಿಗಳನ್ನು ಬಂಧಿಸಿ ನ್ಯಾಯಾಂಗ ವಶಕ್ಕೆ ಒಪ್ಪಿಸಿದ್ದಾರೆ.