ಕೃಷ್ಣಜನ್ಮಾಷ್ಟಮಿ: ಮೊಸರು ಗಡಿಗೆ ಆಟ

ಕಲಬುರಗಿ : ಇಲ್ಲಿನ ಸ್ಟೇಷನ್‌ ಬಜಾರ್‌ ವಿಠ್ಠಲ ಮಂದಿರ ಟ್ರಸ್ಟ್‌ ಆಶ್ರಯದಲ್ಲಿ ಕೃಷ್ಣ ಜನ್ಮಾಷ್ಟಮಿ ನಿಮಿತ್ತವಾಗಿ ಸೋಮವಾರ ಶ್ರೀಕೃಷ್ಣನ ಭಾವಚಿತ್ರ ಮತ್ತು ಪಲ್ಲಕ್ಕಿ ಮೆರವಣಿಗೆ ಅದ್ದೂರಿಯಿಂದ ನಡೆಯಿತು.

ಮೆರವಣಿಗೆ ವಿಠ್ಠಲ ಮಂದಿರದಿಂದ ಹೊರಟು, ವಲ್ಲಭಾಯಿ ಪಟೇಲ್‌ ವೃತ್ತದ ವರೆಗೂ ನಡೆಯಿತು. ಬಳಿಕ ಪುನಃ ಮಂದಿರಕ್ಕೆ ಮರಳಿತು. ಈ ವೇಳೆ ಮಂದಿರದ ಮುಂಭಾಗದಲ್ಲಿ ಯುವಕರಿಗಾಗಿ ಮೊಸರು ಗಡಿಗೆ ಒಡೆಯುವ ಸ್ಪರ್ಧೆಯನ್ನು ಏರ್ಪಡಿಸಲಾಗಿತ್ತು. ಬಹಳಷ್ಟು ಯುವಕರು ಮೊಸರು ಗಡಿಗೆ ಒಡೆಯುವಲ್ಲಿ ಆಸಕ್ತಿ ತೋರಿಸಿದರು. ಈ ವೇಳೆ ಅಪಾರ ಭಕ್ತರು ಹಾಜರಿದ್ದರು. ಬಳಿಕ ಪ್ರಸಾದದ ವ್ಯವಸ್ಥೆ ಮಾಡಲಾಗಿತ್ತು.

ಹರಿನಾಮ ಸಪ್ತಾಹ

ವಿಠ್ಠಲ ರುಕ್ಮಿಣಿ ಮಂದಿರದಲ್ಲಿ ಕಳೆದ 18 ವರ್ಷಗಳಿಂದ ನಡೆಸುತ್ತಿರುವಂತೆ ಈ ಬಾರಿಯೂ ಅ.27ರಿಂದ ಸೆ.3ರವರೆಗೆ ಅಖಂಡ ಹರಿನಾಮ ಸಪ್ತಾಹ ಆಯೋಜಿಸಲಾಗಿತ್ತು. ದಿ. 2ರಂದು ಕೃಷ್ಣನ ತೊಟ್ಟಿಲು ಕಾರ್ಯಕ್ರಮವೂ ನಡೆಯಿತು. ಈ ವೇಳೆಯಲ್ಲಿ ಭಕ್ತರು ಹಾಜರಿದ್ದರು.