ಎಸ್‌ಟಿಗಾಗಿ ಪ್ರಧಾನಿ ಬಳಿ ಶೀಘ್ರ ನಿಯೋಗ

ಕಲಬುರಗಿ:ಮುಂಬರುವ ಚಳಿಗಾಲದ ಸಂಸತ್ತಿನ ಅಧಿವೇಶನದಲ್ಲಿ ಚರ್ಚೆಗೆ ತೆಗೆದುಕೊಳ್ಳುವ ಮುನ್ನವೇ ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರ ಬಳಿ ನಿಯೋಗ ಕೊಂಡೋಯ್ದು ಕೋಲಿ ಸಮಾಜವನ್ನು ಎಸ್‌ಟಿ ಪಟ್ಟಿಗೆ ಸೇರಿಸಬೇಕು ಎಂದು ಮನವೊಲಿಕೆ ಮಾಡುವುದಾಗಿ ಮುಖ್ಯಮಂತ್ರಿ ಯಡಿಯೂರಪ್ಪ ಅವರು ಭರವಸೆ ನೀಡಿದ್ದಾರೆ ಎಂದು ಬಿಜೆಪಿ ಹಿರಿಯ ನಾಯಕ, ಮಾಜಿ ಸಚಿವ ಬಾಬುರಾವ್‌ ಚಿಂಚನಸೂರ ತಿಳಿಸಿದ್ದಾರೆ.
ಕಲಬುರಗಿ ಸಂಸದ ಡಾ. ಉಮೇಶ ಜಾಧವ್‌ ನೇತೃತ್ವದಲ್ಲಿ ಸಿಎಂ ಯಡಿಯೂರಪ್ಪ ಅವರೊಂದಿಗೆ ಸುದೀರ್ಘವಾಗಿ ಚರ್ಚಿಸಲಾಯಿತು. ''ಚುನಾವಣೆಯಲ್ಲಿ ಮಾತು ಕೊಟ್ಟಿರುವುದು ನನಗೂ ಗೊತ್ತಿದೆ. ಈ ಕುರಿತು ಶೀಘ್ರವೇ ಪ್ರಧಾನಮಂತ್ರಿ ಅವರನ್ನು ನಿಯೋಗದ ಮುಖೇನ ತೆರಳಿ ಕಂಡು ಮಾತನಾಡಿ ನೆನಪಿಸುವುದಲ್ಲದೆ, ಚಳಿಗಾಲದ ಅಧಿವೇಶನದಲ್ಲಿ ಈ ಕುರಿತು ಚರ್ಚೆ ಕೈಗೊಂಡು ನಿರ್ಧಾರ ಪ್ರಕಟಿಸುವಂತೆಯೂ ಒತ್ತಾಯಿಸುತ್ತೇನೆ'' ಎಂದು ಭರವಸೆ ನೀಡಿದ್ದಾಗಿ ಚಿಂಚನಸೂರ್‌ ತಿಳಿಸಿದ್ದಾರೆ.

ಕೋಲಿ ಸಮಾಜದ ಎಸ್‌ಟಿ ಸೇರಿಸುವ ನಿಟ್ಟಿನಲ್ಲಿ ಕಳೆದ ಮೂರು ದಶಕಗಳಿಗಿಂತ ಹೆಚ್ಚು ಕಾಲದಿಂದ ನಮ್ಮ ಹೋರಾಟ ನಿರಂತರವಾಗಿ ನಡೆದು ಬರುತ್ತಿದೆ. ನನಗೆ ಸಚಿವ ಸ್ಥಾನ ಸಿಗಬೇಕು ಎನ್ನುವ ಹಂಬಲಕ್ಕಿಂತ ನನ್ನ ಸಮಾಜ ಎಸ್‌ಟಿಗೆ ಸೇರಬೇಕು, ಸೇರಿಸಬೇಕು ಎನ್ನುವ ಛಲವಿದೆ. ಚುನಾವಣೆಯಲ್ಲಿ ಮಾತು ಕೊಟ್ಟಿರುವಂತೆ ಅದನ್ನು ಮಾಡುವವರೆಗೆ ಮಿರಮಿಸುವುದಿಲ್ಲ ಎಂದು ತಿಳಿಸಿದ್ದಾರೆ.

ಈ ಭೇಟಿಯ ವೇಳೆಯಲ್ಲಿ ಸಂಸದ ಡಾ. ಉಮೇಶ ಜಾಧವ್‌ ಹಾಗೂ ಕೋಲಿ ಸಮಾಜದ ಹಲವು ಮುಖಂಡರು ಇದ್ದರು.