'ಕಂದಾಯ ಬಾಕಿ' ವಸೂಲಿಗೆ ಡಿಸಿಗೆ ಪತ್ರ

ಕಲಬುರಗಿ : ಇಲ್ಲಿನ ಖಾಜಾ ಎಜುಕೇಷನ್‌ ಸೊಸೈಟಿಯ ನಿವೃತ್ತ ನೌಕರ ಡಾ.ಎಂ.ಡಿ.ಸಯದುದ್ದೀನ್‌ ಅವರಿಗೆ ಸಂಸ್ಥೆ ಪಾವತಿಸದೆ ಬಾಕಿ ಉಳಿಸಿಕೊಂಡಿರುವ ರೂ.8,61,566 ರೂ.ಉಪಧನವನ್ನು (ಗ್ರಾಚ್ಯುಯಿಟಿ) 'ಭೂ ಕಂದಾಯ ಬಾಕಿ' ಎಂದು ಪರಿಗಣಿಸಿ ವಸೂಲಿ ಮಾಡಿಕೊಡುವಂತೆ ಜಿಲ್ಲಾ ಉಪವಿಭಾಗದ ಕಾರ್ಮಿಕ ಅಧಿಕಾರಿಗಳು ಜಿಲ್ಲಾಧಿಕಾರಿಗಳನ್ನು ಆಗ್ರಹಿಸಿದ್ದಾರೆ.

ಡಾ.ಎಂ.ಡಿ. ಸಯದುದ್ದೀನ್‌ 1980 ರಿಂದ 2014ರವರೆಗೆ ಒಟ್ಟು 34 ವರ್ಷ ದೈಹಿಕ ಶಿಕ್ಷಕರಾಗಿ ಸೇವೆ ಸಲ್ಲಿಸಿದ್ದಾರೆ. ಹೀಗೆ ಸೇವೆ ಸಲ್ಲಿಸಿದ್ದರೂ ಅವರಿಗೆ ನಿವೃತ್ತಿ ನಂತರ ಸಿಗಬೇಕಿರುವ ಉಪಧನ ನೀಡದೆ ಸಂಸ್ಥೆ ನೀಡಲು ಮೀನಮೇಷ ಎಣಿಸುತ್ತಿದೆ. ಈ ಕುರಿತು ಅರ್ಜಿದಾರರು ನೀಡಿದ ದೂರಿನ ಮೇರೆಗೆ ವಿವಿಧ ಹಂತಗಳ ವಿಚಾರಣೆ ನಡೆಸಿದರೂ, ಪ್ರತಿವಾದಿ ಸಂಸ್ಥೆಯ ಕಾರ್ಯದರ್ಶಿಗಳು ಬಾಕಿ ಉಳಿಸಿಕೊಂಡಿರುವ ಉಪಧನ ಪಾವತಿಸುವಲ್ಲಿ ವಿಫಲರಾಗಿದ್ದಾರೆ. ಹೀಗಾಗಿ, ಕರ್ನಾಟಕ ಭೂ ಕಂದಾಯ ಕಾಯದೆ ಕಲಂ 190ರ ಪ್ರಕಾರ ಬಾಕಿ ಮೊತ್ತವನ್ನು ಭೂ ಕಂದಾಯ ಬಾಕಿ ಎಂದು ಪರಿಗಣಿಸಿ ವಸೂಲು ಮಾಡಿಕೊಡಬೇಕು ಎಂದು ಮನವಿ ಮಾಡಿದ್ದಾರೆ.