ಲಾರಿ ಅಡಿ ಸಿಲುಕಿ ಬಾಲಕ ಸಾವು

ಕಲಬುರಗಿ:ತಾಯಿ ಜೊತೆಯಲ್ಲಿ ನಡೆದುಕೊಂಡು ಹೊರಟಿದ್ದ ಬಾಲಕನ ಮೇಲೆ ಲಾರಿ ಹರಿದ ಪರಿಣಾಮ ಬಾಲಕ ಸ್ಥಳದಲ್ಲೇ ಸಾವನ್ನಪ್ಪಿದ ಘಟನೆ ಇಲ್ಲಿನ ಸೇಡಂ ರಸ್ತೆಯ ಖರ್ಗೆ ಪೆಟ್ರೋಲ್‌ ಸಮೀಪದ ಸಿಗ್ನಲ್‌ ಬಳಿ ಶುಕ್ರವಾರ ಸಂಜೆ ಸಂಭವಿಸಿದೆ.

ಮೂಲತಃ ಕಮಲಾಪುರ ಪಟ್ಟಣದ ಓಂಕಾರ್‌ ಪವಾರ್‌ ಅವರ ಪುತ್ರ ವಿರಾಟ್‌ (5) ಮೃತಪಟ್ಟ ಬಾಲಕ. ಇವರು ಪ್ರಸ್ತುತ ಸೇಡಂ ರಸ್ತೆಯ ತಿಲಕ್‌ ನಗರದ ನಿವಾಸಿಗಳು. ಸಂಜೆ ತಾಯಿ ಜೊತೆಗೆ ಊರಿನಿಂದ ಬಂದು ಬಸ್‌ ಇಳಿದಿದ್ದಾರೆ. ಈ ವೇಳೆ ರಸ್ತೆ ದಾಟುತ್ತಿದ್ದಾಗ ಗುಲ್ಬರ್ಗ ವಿಶ್ವವಿದ್ಯಾಲಯ ಕಡೆಯಿಂದ ಬಂದ ಲಾರಿ ಬಾಲಕನ ಮೇಲೆ ಹರಿದಿದೆ. ಘಟನೆ ಸಂಭವಿಸುತ್ತಿದ್ದಂತೆಯೇ ಲಾರಿ ಚಾಲಕ ಸ್ಥಳದಿಂದ ಪರಾರಿಯಾಗಿದ್ದಾನೆ.

ಈ ಕುರಿತು ಎಂ.ಬಿ.ನಗರ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.