ಖಾಸಗಿ ದವಾಖಾನೆಗಳ ಪಾತ್ರವೂ ಅಗಣಿತ

ಕಲಬುರಗಿ :ಇವತ್ತು ಖಾಸಗಿ ಕ್ಷೇತ್ರದಲ್ಲಿ ಸಾಕಷ್ಟು ಆಸ್ಪತ್ರೆಗಳು ಸರಕಾರ ಜತೆಯಲ್ಲಿ ಹೆಗಲಿಗೆ ಹೆಗಲು ಕೊಟ್ಟು ಜನರಿಗೆ ಉತ್ತಮ ಚಿಕಿತ್ಸೆಯನ್ನು ನೀಡುತ್ತಿವೆ. ಅವುಗಳ ಪಾತ್ರ ಹಿರಿದು ಎಂದು ಮಾಜಿ ಸಚಿವ ಡಾ. ಶರಣಪ್ರಕಾಶ ಪಾಟೀಲ್‌ ಅಭಿಪ್ರಾಯಪಟ್ಟರು.

ನಗರದ ಬಿಗ್‌ ಬಜಾರ್‌ ಮುಂಭಾಗದ ಬಳಿ ನೂತನವಾಗಿ ಆರಂಭಿಸಿರುವ ಹೇಝಲ್‌ ಟ್ರೀ ತಾಯಿ ಮತ್ತು ಮಕ್ಕಳ ಹೆರಿಗೆ ಆಸ್ಪತ್ರೆಗೆ ಸೋಮವಾರ ಚಾಲನೆ ನೀಡಿ ಅವರು ಮಾತನಾಡಿದರು.

ಸರಕಾರದ ಜತೆಯಲ್ಲಿ ಖಾಸಗಿ ದವಾಖಾನೆಗಳು ಕೂಡ ಅತ್ಯಾಧುನಿಕ ತಂತ್ರಜ್ಞಾನವನ್ನು ಬಳಕೆ ಮಾಡಿಕೊಂಡು ತಾಯಿ ಮತ್ತು ಮಗುವಿನ ಸಾವಿನ ಪ್ರಮಾಣವನ್ನು ಕಡಿಮೆ ಮಾಡಲು ಹಾಗೂ ಹೆರಿಗೆ ಸಮಯದಲ್ಲಿ ಆರೈಕೆಯನ್ನು ಮಾಡುತ್ತಿವೆ. ಇದರಿಂದ ಹೆರಿಗೆ ಸಂದರ್ಭದಲ್ಲಿ ಆಗುತ್ತಿದ್ದ ತಾಯಿ ಮಗುವಿನ ಸಾವಿನಲ್ಲಿನ ಅಂತರವೂ ಕಡಿಮೆಯಾಗಿದೆ. 2ಮತ್ತು 3 ನೇ ದರ್ಜೆಯ ನಗರಗಳಲ್ಲಿ ಖಾಸಗಿ ಆಸ್ಪತ್ರೆಗಳು ದೊಡ್ಡ ಮಟ್ಟದಲ್ಲಿ ಉದ್ಯೋಗವನ್ನು ಸೃಷ್ಟಿ ಮಾಡುವಲ್ಲಿ ಪ್ರಮುಖ ಪಾತ್ರವಹಿಸಿವೆ ಎಂದರು.

ವೈದ್ಯಕೀಯ ಕ್ಷೇತ್ರದಲ್ಲಿ ವೈದ್ಯರುಗಳ ಮೇಲೆ ಜನರು ಹೆಚ್ಚು ನಂಬಿಕೆಗಳನ್ನು ಇಟ್ಟುಕೊಂಡಿರುತ್ತಾರೆ. ಅದಲ್ಲದೆ, ಗೋಲ್ಡನ್‌ ಗಂಟೆಗಳಲ್ಲಿ ಅವರೇ ದೇವರು. ಇದೆಲ್ಲವನ್ನು ಅರ್ಥ ಮಾಡಿಕೊಂಡು ಹೈಕ ಭಾಗದಲ್ಲಿನ ಜನರಿಗೆ ಹೊರೆ ಆಗದಂತೆ ಆಸ್ಪತ್ರೆಗಳು ಚಿಕಿತ್ಸಾ ದರಗಳನ್ನು ನಿರ್ವಹಿಸಬೇಕು ಎಂದರು.

ಶಾಸಕ ದತ್ತಾತ್ರೇಯ ಪಾಟೀಲ ರೇವೂರ್‌ ಆಗಮಿಸಿ ಶುಭ ಕೋರಿದರು. ಈ ವೇಳೆಯಲ್ಲಿ ಯುನೈಟೆಡ್‌ ಚೇರ್ಮನ್‌ ಹಾಗೂ ವ್ಯವಸ್ಥಾಪಕ ವೈದ್ಯಾಧಿಕಾರಿ ಡಾ. ವಿಕ್ರಂ ಸಿದ್ದಾರೆಡ್ಡಿ, ಯಶೋಧಾ ಆಸ್ಪತ್ರೆ ಮಕ್ಕಳ ತಜ್ಞ ಡಾ. ಪ್ರಶಾಂತ ಕುಲಕರ್ಣಿ, ಡಾ. ವೀಣಾ ಸಿದ್ದಾರೆಡ್ಡಿ, ಡಾ. ಮಮತಾ ಪಾಟೀಲ, ಡಾ. ಚಂದ್ರಿಕಾ ಲಾಕೆ, ಡಾ. ಸುಹಾಸ್‌, ಡಾ. ಶರಣ್‌, ಡಾ. ಜಿತೇಂದ್ರ, ಆಡಳಿತಾಧಿಕಾರಿ ದಾವೂದ್‌ ಅಲಿ ಹಾಗೂ ಸಿಬ್ಬಂದಿ ಇದ್ದರು.