ತಾಪಂ ಅಧ್ಯಕ್ಷೆ ವಿರುದ್ಧ ಕ್ರಮಕ್ಕೆ ಆಗ್ರಹ

ಚಿಂಚೋಳಿ :ಚಿಂಚೋಳಿ ವಿಧಾನಸಭಾ ಉಪಚುನಾವಣೆಯಲ್ಲಿ ತಾಪಂ ಅಧ್ಯಕ್ಷೆ ರೇಣುಕಾ ಚವ್ಹಾಣ ಹಾಗೂ ಅವರ ಪತಿ ಅಶೋಕ ಚವ್ಹಾಣ ವಿರುದ್ಧ ಸೂಕ್ತ ಕ್ರಮ ಜರುಗಿಸಬೇಕು ಎಂದು ತಾಪಂ ಸದಸ್ಯರಾದ ರಾಮರಾವ ರಾಠೋಡ, ಜಗನಾಥ ಇದಲಾಯಿ ಆಗ್ರಹಿಸಿದ್ದಾರೆ.

ಪಟ್ಟಣದಲ್ಲಿ ಶನಿವಾರ ನಡೆದ ಕಾಂಗ್ರೆಸ್‌ ಪಕ್ಷ ದ ಆತ್ಮಾವಲೋಕನ ಸಭೆಯ ನಂತರ ಕಾಂಗ್ರೆಸ್‌ ಜಿಲ್ಲಾಧ್ಯಕ್ಷ ಜಗದೇವ ಗುತ್ತೇದಾರ ಅವರಿಗೆ ಭೇಟಿ ಮಾಡಿದ ಅವರು, ತಾಲೂಕಿನ ಐನಾಪುರ, ಕುಂಚವರಾಂ, ಶಾದಿಪುರ ತಾಪಂ ಸದಸ್ಯರು ಹಾಗೂ ಪುರಸಭೆ ಸದಸ್ಯೆ ಸವೀತಾ ರಾಜು ಅವರು ಬಿಜೆಪಿ ಪರ ಕೆಲಸ ಮಾಡಿದ್ದಾರೆ. ಪಕ್ಷ ವಿರೋಧಿ ಚಟುವಟಿಕೆಗಳಲ್ಲಿ ತೊಡಗಿದ ವರ ವಿರುದ್ಧ ಕೂಡಲೇ ಶಿಸ್ತು ಕ್ರಮ ಕೈಗೊಂಡು ಅವರ ಸದಸ್ಯತ್ವ ರದ್ದುಪಡಿಸಬೇಕು ಎಂದು ಒತ್ತಾಯಿಸಿದ್ದಾರೆ.

ಚಿಮ್ಮನಚೋಡ ತಾಪಂ ಸದಸ್ಯ ಮಹ್ಮದ್‌ ನಾಯಿಕೋಡಿ ಮಾತನಾಡಿ, ಒಂದೇ ಮನೆಯಲ್ಲಿ ಅಣ್ಣ ಬಿಜೆಪಿಯಲ್ಲಿ ತಮ್ಮ ಕಾಂಗ್ರೆಸ್‌ನಲ್ಲಿದ್ದರೆ ಪಕ್ಷ ಹೇಗೆ ಗೆಲ್ಲ್ಲುತ್ತದೆ. ಕಾಂಗ್ರೆಸ್‌ ಸಚಿವರು ಒಂದು ದಿನ ಅವರ ಮನೆಗೆ ಊಟಕ್ಕೆ ಹೋದರೆ ಮತ್ತೊಂದು ದಿನ ಬಿಜೆಪಿ ಮಾಜಿ ಸಚಿವರ ಮನೆಗೆ ಹೋಗಿದ್ದರಿಂದ ಮತದಾರರ ಗೊಂದಲಕ್ಕೆ ಕಾರಣವಾಗಿದೆ. ಹೀಗಾಗಿ ಕಾಂಗ್ರೆಸ್‌ ಪಕ್ಷ ಕ್ಕೆ ಮತ ಕಡಿಮೆ ಬಂದಿವೆ ಎಂದರು.

ಜಿಲ್ಲಾ ಕಾಂಗ್ರೆಸ್‌ ಅಧ್ಯಕ್ಷ ಜಗದೇವ ಗುತ್ತೇದಾರ ಮಾತನಾಡಿ, ದೂರುಗಳು ಇದ್ದಲ್ಲಿ ಚಿಂಚೋಳಿ ತಾಲೂಕು ಕಾಂಗ್ರೆಸ್‌ ಅಧ್ಯಕ್ಷ ಅನಿಲಕುಮರ ಜಮದಾರ ಅವರಿಗೆ ಸಲ್ಲಿಸಬೇಕು. ಅವುಗಳನ್ನು ಪಕ್ಷದ ವರಿಷ್ಠರಿಗೆ ಕಳುಹಿಸಿ ಸಂಬಂಧಿತರ ವಿರುದ್ಧ ಕ್ರಮಕ್ಕೆ ಒತ್ತಡ ಹಾಕುವುದಾಗಿ ಭರವಸೆ ಹೇಳಿದರು.

ಸುಭಾಷ ರಾಠೋಡ, ಟಿಟಿ ಭೀಮರಾವ, ಅನಿಲಕುಮಾರ ಜಮದಾರ ಇದ್ದರು.