ಮತ ಎಣಿಕೆ ಟ್ಯಾಬುಲೇಷನ್‌: ಹ್ಯಾಂಡ್ಸ್‌ ಆನ್‌ ಟ್ರೇನಿಂಗ್‌

ಕಲಬುರಗಿ: ಗುಲ್ಬರ್ಗ ಲೋಕಸಭಾ ಹಾಗೂ ಚಿಂಚೋಳಿ ವಿಧಾನಸಭಾ ಉಪ ಚುನಾವಣೆಯ ಮತ ಎಣಿಕೆಯ ಟ್ಯಾಬುಲೇಷನ್ಸ್‌ ಕಾರ್ಯಕ್ಕೆ ನಿಯೋಜಿನೆಗೊಂಡಿರುವ ಪ್ರೋಗ್ರಾಮರ್‌ಗಳಿಗೆ ಎನ್‌.ಐ.ಸಿ. ಮತ್ತು ಚುನಾವಣಾ ಆಯೋಗದ ಸವಿಧಾ ತಂತ್ರಾಂಶದಲ್ಲಿ ಮತ ಎಣಿಕೆಯ ಮಾಹಿತಿಯನ್ನು ಅಪಲೋಡ್‌ ಮಾಡುವ ವಿಧಾನದ ಕುರಿತು ಶನಿವಾರ ಜಿಲ್ಲಾಧಿಕಾರಿಗಳ ಕಚೇರಿ ಸಭಾಂಗಣದಲ್ಲಿ ಹ್ಯಾಂಡ್ಸ್‌ ಆನ್‌ ಟ್ರೇನಿಂಗ್‌ ನೀಡಲಾಯಿತು.

ಎನ್‌.ಐ.ಸಿ. ಅಧಿಕಾರಿ ಸುಧೀಂದ್ರ ಅವಧಾನಿ ಅವರು ಎನ್‌.ಐ.ಸಿ. ಮತ್ತು ಸುವಿಧಾ ತಂತ್ರಾಂಶದಲ್ಲಿ ಅಪಲೋಡ್‌ ಮಾಡುವ ಕಾರ್ಯವನ್ನು ಸವಿಸ್ತಾರವಾಗಿ ವಿವರಿಸುತ್ತಾ, ಪ್ರೊಗ್ರಾಮರ್‌ಗಳು ಪ್ರತಿ ಟೇಬಲ್‌ ಮತ ಎಣಿಕೆ ಮಾಹಿತಿಯನ್ನು 17ಸಿ ನಲ್ಲಿ ಪಡೆದುಕೊಂಡು ಅದನ್ನು ತಂತ್ರಾಂಶದಲ್ಲಿ ಅಪಲೋಡ್‌ ಮಾಡುವ ಮುನ್ನ ಎ.ಆರ್‌.ಓ.ಗಳ ಅನುಮೋದನೆ ಪಡೆಯುವುದು ಕಡ್ಡಾಯ. ಇಲ್ಲಿ ಅಪಲೋಡ್‌ ಮಾಡುವ ಮಾಹಿತಿಯನ್ನು ಪತ್ರಕರ್ತರು ಸೇರಿದಂತೆ ಸಾರ್ವಜನಿಕರು ವೀಕ್ಷಿಸಬಹುದಾಗಿರುವುದರಿಂದ ತುಂಬಾ ಜಾಗರೂಕತೆಯಿಂದ ಕಾರ್ಯನಿರ್ವಹಿಸಬೇಕು ಎಂದರು.

ಜಿಲ್ಲಾ ಚುನಾವಣಾಧಿಕಾರಿ ಆರ್‌.ವೆಂಕಟೇಶ ಕುಮಾರ ಮಾತನಾಡಿ, ಪ್ರತಿ ಮತ ಎಣಿಕೆ ಅಪಲೋಡ್‌ ಮಾಡುವ ಟ್ಯಾಬುಲೇಷನ್‌ ತಂಡಕ್ಕೆ ಓರ್ವ ಪತ್ರಾಂಕಿತ ಅಧಿಕಾರಿಯನ್ನು ಮೇಲ್ವಿಚಾರಣೆಗೆ ನಿಯೋಜಿಸಲಾಗಿದ್ದು, ಟ್ಯಾಬುಲೇಷನ್ಸ್‌ ಕಾರ್ಯದ ಸಂಪೂರ್ಣ ಜವಬ್ದಾರಿ ಇವರದ್ದಾಗಿರುತ್ತದೆ ಎಂದರು.

ಈ ಸಂದರ್ಭದಲ್ಲಿ ಹೆಚ್ಚುವರಿ ಜಿಲ್ಲಾಧಿಕಾರಿ ಟಿ.ಯೋಗೇಶ, ಮಹಾನಗರ ಪಾಲಿಕೆಯ ಆಯುಕ್ತೆ ಫೌಜಿಯಾ ಬಿ. ತರನ್ನುಮ, ಸಹಾಯಕ ಆಯುಕ್ತ ರಾಹುಲ ಪಾಂಡ್ವೆ ಸೇರಿದಂತೆ ಮತ ಎಣಿಕೆ ಟ್ಯಾಬುಲೇಷನ್‌ ಕಾರ್ಯಕ್ಕೆ ನಿಯೋಜನೆಗೊಂಡಿರುವ ಜಿಲ್ಲೆಯ ಪ್ರೋಗ್ರಾಮರ್‌ಗಳು ಹಾಗೂ ಮೇಲ್ವಿಚಾರಣೆ ಅಧಿಕಾರಿಗಳು ಭಾಗವಹಿಸಿದ್ದರು.