ಸಭಾಪತಿ ಪಟ್ಟಕ್ಕೆ ಕಾಂಗ್ರೆಸ್‌ ಪಟ್ಟು

ಬೆಂಗಳೂರು : ವಿಧಾನ ಪರಿಷತ್‌ ಸಭಾಪತಿ ಹುದ್ದೆಗಾಗಿ ಕಾಂಗ್ರೆಸ್‌ ಬಿಗಿಪಟ್ಟು ಹಾಕಿದ್ದು ಈ ವಿಚಾರದಲ್ಲಿ ಸಹಮತಕ್ಕೆ ಬರುವುದು ಸವಾಲಾಗಿ ಪರಿಣಮಿಸಿದೆ.

ಹಂಗಾಮಿ ಸಭಾಪತಿ ಬಸವರಾಜ ಹೊರಟ್ಟಿ ಅವರನ್ನು ಮುಂದುವರಿಸುವುದು ಜೆಡಿಎಸ್‌ ಇಚ್ಛೆಯಾಗಿದೆ. ಈ ಸಂಬಂಧ ಕಾಂಗ್ರೆಸ್‌ ಬೆಂಬಲವನ್ನೂ ಕೇಳಲಾಗಿದೆ. ಆದರೆ, ಪರಿಷತ್‌ನಲ್ಲಿ ಹೆಚ್ಚು ಸ್ಥಾನ ಹೊಂದಿರುವ ತನಗೆ ಸಭಾಪತಿ ಹುದ್ದೆ ದಕ್ಕಬೇಕು ಎನ್ನವುದು ಕಾಂಗ್ರೆಸ್‌ನ ಒತ್ತಡವಾಗಿದೆ. ವಿಧಾನಸಭೆ ಸ್ಪೀಕರ್‌ ಸ್ಥಾನವನ್ನು ಮಿತ್ರಪಕ್ಷಕ್ಕೆ ಬಿಟ್ಟುಕೊಟ್ಟಿದ್ದರಿಂದ ಸಭಾಪತಿ ಸ್ಥಾನ ತನಗಿರಲಿ ಎನ್ನುವುದು ಜೆಡಿಎಸ್‌ ಒತ್ತಾಯವಾಗಿದೆ.

ಸಭಾಪತಿಯಾಗಲು ಕಾಂಗ್ರೆಸ್‌ನಲ್ಲಿ ವಿ.ಎಸ್‌. ಉಗ್ರಪ್ಪ, ಪ್ರತಾಪಚಂದ್ರ ಶೆಟ್ಟಿ ಸೇರಿ ಹಿರಿಯ ಸದಸ್ಯರು ಆಕಾಂಕ್ಷಿಗಳಾಗಿದ್ದಾರೆ. ಈ ಬಗ್ಗೆ ಸಮನ್ವಯ ಸಮಿತಿ ಅಧ್ಯಕ್ಷ ಸಿದ್ದರಾಮಯ್ಯ ಮೇಲೂ ಒತ್ತಡ ತಂದಿದ್ದಾರೆ. ಸಭಾಪತಿ ಹುದ್ದೆ ಯಾವ ಪಕ್ಷಕ್ಕೆನ್ನುವುದು ಇತ್ಯರ್ಥವಾಗದ್ದರಿಂದ ಉಪ ಸಭಾಪತಿ ಸ್ಥಾನದ ಬಗ್ಗೆ ಇನ್ನೂ ಚರ್ಚೆಯಾಗಿಲ್ಲ ಎನ್ನಲಾಗಿದೆ.

ಎಚ್‌ಡಿಡಿ ಭೇಟಿಯಾದ ಹೊರಟ್ಟಿ

ಈ ಮಧ್ಯೆ ಹಂಗಾಮಿ ಸಭಾಪತಿ ಹೊರಟ್ಟಿ ಅವರನ್ನು ತಮ್ಮ ನಿವಾಸಕ್ಕೆ ಭಾನುವಾರ ಕರೆಸಿಕೊಂಡ ಜೆಡಿಎಸ್‌ ವರಿಷ್ಠ ಎಚ್‌.ಡಿ. ದೇವೇಗೌಡ ಸಮಾಲೋಚನೆ ನಡೆಸಿದರು.