ವಸತಿ ಶಾಲೆಗಳಿಗೆ 2,500 ಕೋಟಿ ರೂ. : ಸಿಎಂ

ಬೆಂಗಳೂರು: ರಾಜ್ಯದಲ್ಲಿನ ವಸತಿ ಶಾಲೆಗಳ ಕಟ್ಟಡ ನಿರ್ಮಾಣ ಹಾಗೂ ನಿರ್ವಹಣೆಗೆ ಅಗತ್ಯವಿರುವ 2,500 ಕೋಟಿ ರೂ. ಒದಗಿಸಲು ಕ್ರಮ ಕೈಗೊಳ್ಳಲಾಗುವುದು ಎಂದು ಸಿಎಂ ಎಚ್‌.ಡಿ.ಕುಮಾರಸ್ವಾಮಿ ತಿಳಿಸಿದ್ದಾರೆ.

ಈ ಸಂಬಂಧ ಸಭೆ ನಡೆಸಿದ ಬಳಿಕ ಮಾತನಾಡಿದ ಅವರು, ''ವಸತಿ ಶಿಕ್ಷಣ ಸಂಸ್ಥೆಯಡಿ 819 ಶಾಲೆಗಳಿವೆ. ಈ ಪೈಕಿ 420 ಶಾಲೆಗಳಿಗೆ ಸ್ವಂತ ಕಟ್ಟಡವಿದೆ. 317 ಶಾಲೆಗಳು ಬಾಡಿಗೆ ಕಟ್ಟಡದಲ್ಲಿ ನಡೆಯುತ್ತಿವೆ. 102 ಶಾಲೆಗಳಿಗೆ ಕಟ್ಟಡ ನಿರ್ಮಿಸಲು ನಿವೇಶನ ಗುರುತಿಸಲಾಗಿದೆ,'' ಎಂದರು.

''ಪ್ರಸಕ್ತ ವರ್ಷದ ಬಜೆಟ್‌ನಲ್ಲಿ 247 ಕೋಟಿ ರೂ. ಇಡಲಾಗಿದೆ. ಅದನ್ನು ಈಗ 938 ಕೋಟಿ ರೂ. ಗೆ ಹೆಚ್ಚಿಸಲಾಗುತ್ತಿದೆ. ಹಾಗೆಯೇ 57 ಎಸ್‌ಸಿ ಶಾಲೆಗಳಿಗೆ 1,420 ಕೋಟಿ ರೂ., 24 ಎಸ್‌ಟಿ ಶಾಲೆಗಳಿಗೆ 600 ಕೋಟಿ ರೂ. ಹಾಗೂ 21 ಒಬಿಸಿ ಶಾಲೆಗಳಿಗೆ 325 ಕೋಟಿ ರೂ. ಅನುದಾನದ ಅಗತ್ಯವಿದೆ. ಅದನ್ನು ನೀಡಲು ಕ್ರಮ ಕೈಗೊಳ್ಳಲಾಗುವುದು,'' ಎಂದು ಭರವಸೆ ನೀಡಿದರು.