ನರೇಗಾ ಕೂಲಿಗಾಗಿ ರಾಜ್ಯದಿಂದ 650 ಕೋಟಿ ಮುಂಗಡ ಬಿಡುಗಡೆ

ಬೆಂಗಳೂರು : ನರೇಗಾ ಯೋಜನೆಯಡಿ ಕೇಂದ್ರ ಸರಕಾರ ಬಿಡುಗಡೆ ಮಾಡಬೇಕಾಗಿರುವ ಅನುದಾನ ಬಿಡುಗಡೆಯಲ್ಲಿ ವಿಳಂಬವಾಗುತ್ತಿರುವ ಹಿನ್ನೆಲೆಯಲ್ಲಿ ರಾಜ್ಯ ಸರ್ಕಾರವೇ ಮತ್ತೊಮ್ಮೆ 649.73 ಕೋಟಿ ರೂ. ಮುಂಗಡ ಬಿಡುಗಡೆ ಮಾಡಲು ನಿರ್ಧರಿಸಿದೆ.

ರಾಜ್ಯದಲ್ಲಿ ಬರ ಪರಿಸ್ಥಿತಿ ತೀವ್ರವಾಗಿದ್ದು, ಜನರು ಉದ್ಯೋಗ ಅರಸಿ ಗುಳೆ ಹೋಗುವುದನ್ನು ತಪ್ಪಿಸಲು ನರೇಗಾ ಯೋಜನೆ ನೆರವಾಗಿದೆ. ಆದರೆ, ಸಕಾಲಕ್ಕೆ ಕೂಲಿ ಪಾವತಿಯಾಗದೆ ಯೋಜನೆ ವಿಫಲವಾಗುವುದನ್ನು ತಪ್ಪಿಸಲು ರಾಜ್ಯ ಸರಕಾರದಿಂದಲೇ ಒಟ್ಟು 649.73 ಕೋಟಿ ರೂ. ಮುಂಗಡ ಬಿಡುಗಡೆ ಮಾಡಲು ಸಿಎಂ ಎಚ್‌.ಡಿ.ಕುಮಾರಸ್ವಾಮಿ ಅವರು ಆದೇಶಿಸಿದ್ದಾರೆ. ಇದರೊಂದಿಗೆ, ನರೇಗಾ ಯೋಜನೆಗೆ ರಾಜ್ಯ ಸರಕಾರದಿಂದ ಒಟ್ಟು 1234.37 ಕೋಟಿ ರೂ ಮುಂಗಡ ಹಣ ಬಿಡುಗಡೆಯಾದಂತಾಗಿದೆ.

''ನರೇಗಾ ಯೋಜನೆಯಡಿ ಕೂಲಿಯ ಪೂರ್ಣ ಮೊತ್ತ ಹಾಗೂ ಸಾಮಗ್ರಿಗಳ ಭಾಗಶಃ ಮೊತ್ತವನ್ನು ಕೇಂದ್ರ ಸರಕಾರ ಭರಿಸಬೇಕಿದ್ದು, ಈವರೆಗೆ, 1649 ಕೋಟಿ ರೂ. ಬಾಕಿ ಉಳಿಸಿಕೊಂಡಿದೆ. ಕೇಂದ್ರ ಸರಕಾರವು ನಿಗದಿಯಂತೆ ಅನುದಾನವನ್ನು ಸಕಾಲಕ್ಕೆ ಬಿಡುಗಡೆ ಮಾಡದ ಕಾರಣ ರಾಜ್ಯ ಹೆಚ್ಚುವರಿ ಆರ್ಥಿಕ ಹೊರೆ ಅನುಭವಿಸುವಂತಾಗಿದೆ. ಕೇಂದ್ರ ಸರಕಾರ ಕೂಡಲೇ ಅಗತ್ಯ ಅನುದಾನ ಬಿಡುಗಡೆ ಮಾಡಬೇಕು,'' ಎಂದು ಸಿಎಂ ಮನವಿ ಮಾಡಿದ್ದಾರೆ.