ಮೈಸೂರಲ್ಲಿ 70 ಸಾವಿರ ಮಂದಿಯ ಯೋಗ

ಮೈಸೂರು: 70,000ಕ್ಕೂ ಹೆಚ್ಚು ಜನರು ಯೋಗ ಪ್ರದರ್ಶನ ಮಾಡುವ ಮೂಲಕ ಮೈಸೂರು ಕೀರ್ತಿ ಪತಾಕೆ ಹಾರಿಸಿದರು.

ಇಲ್ಲಿನ ರೇಸ್‌ಕೋರ್ಸ್‌ ಆವರಣದಲ್ಲಿ ಈ ಬೃಹತ್‌ ಯೋಗ ಪ್ರದರ್ಶನ ನಡೆಯಿತು. ಭಾಗವಹಿಸುವವರ ಸಂಖ್ಯೆಯನ್ನು ಹೆಚ್ಚಿಸಿಕೊಂಡ ಮೈಸೂರು, ತನ್ನ ದಾಖಲೆಯನ್ನ ತಾನೇ ಅಳಿಸಿ ಹಾಕಿ ಹೊಸ ದಾಖಲೆ ಸೃಷ್ಟಿಸಿದೆ. ಸಿದ್ಧತೆಗೆ ದಿನಗಳು ಕಡಿಮೆ ಕಾಲಾವಕಾಶವಿದ್ದ ಕಾರಣ ಜಿಲ್ಲಾಡಳಿತ ಈ ಬಾರಿ ಅಂತಾರಾಷ್ಟ್ರೀಯ ಯೋಗ ದಿನದಂದು ದಾಖಲೆಯ ಯೋಗ ಪ್ರದರ್ಶಿಸುವ ನಿರ್ಧಾರವನ್ನು ಕೈಬಿಟ್ಟಿತು. ಆದರೆ ಯೋಗವನ್ನು ಪ್ರೋತ್ಸಾಹಿಸುವ ಉದ್ದೇಶದಿಂದ ಒಂದು ಲಕ್ಷ ಜನರನ್ನು ಒಳಗೊಂಡಂತೆ ಬೃಹತ್‌ ಯೋಗ ಪ್ರದರ್ಶಿಸುವ ಗುರಿ ಹೊಂದಲಾಗಿತ್ತು. ಅಂತೆಯೆ ಈ ಅರ್ಥಪೂರ್ಣ ಕಾರ್ಯಕ್ರಮಕ್ಕೆ ರಾಜ್ಯ ಸರಕಾರ 60 ಲಕ್ಷ ರೂ. ಅನುದಾನ ಬಿಡುಗಡೆಗೊಳಿಸಿತ್ತು. ಕಾರ್ಯಕ್ರಮ ಆಯೋಜನೆಗೆ ಮೈಸೂರಿನ ಚಾಮುಂಡಿ ಬೆಟ್ಟದ ತಪ್ಪಲಿನ ವಿಶಾಲವಾದ ರೇಸ್‌ಕೋರ್ಸ್‌ ಆವರಣವನ್ನು ಆಯ್ಕೆ ಮಾಡಿಕೊಳ್ಳಲಾಗಿತ್ತು. ಕಳೆದ ಬಾರಿ 60,000 ಮಂದಿ ಇದೇ ವೇದಿಕೆಯಲ್ಲಿ ಸೇರಿ ಸಾಮೂಹಿಕ ಯೋಗ ಪ್ರದರ್ಶಿಸಿದ್ದರು.