ಅಕ್ಕ ಸಮ್ಮೇಳನಕ್ಕೆ ಚಾಲನೆ

ಬೆಂಗಳೂರು: ಅಮೆರಿಕಾದ ಡಲ್ಲಾಸ್‌ ನಗರದಲ್ಲಿ ಮೂರು ದಿನಗಳ 10ನೇ ವಿಶ್ವ ಕನ್ನಡ ಅಕ್ಕ ಸಮ್ಮೇಳನ ಶನಿವಾರ ಆರಂಭಗೊಂಡಿತು. ನಾಡಿನ ಕೆಲವು ಮಠಾಧೀಶರು, ಚಲನಚಿತ್ರ ನಟರು, ಶಾಸಕರು ಹಾಗೂ ನಾನಾ ಇಲಾಖೆಗಳ ಹಿರಿಯ ಅಧಿಕಾರಿಗಳು ಇದಕ್ಕೆ ಸಾಕ್ಷಿಯಾದರು.

ಕೊಡಗು ನೆರೆ ಹಿನ್ನೆಲೆಯಲ್ಲಿ ಅಕ್ಕ ಸಮ್ಮೇಳನದಿಂದ ದೂರ ಉಳಿದ ಮುಖ್ಯಮಂತ್ರಿ ಎಚ್‌.ಡಿ.ಕುಮಾರಸ್ವಾಮಿ ಪರವಾಗಿ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಪ್ರಧಾನ ಕಾರ್ಯದರ್ಶಿ ಬಿ.ಬಸವರಾಜು ಅಕ್ಕ ಸಮ್ಮೇಳನದಲ್ಲಿ ಭಾಷಣ ಓದಿದರು. ''ನೀವು ಎಲ್ಲೇ ಇದ್ದರೂ ನಿಮ್ಮ ಬೇರುಗಳು ಕರ್ನಾಟಕದಲ್ಲೇ ಇರಲಿ. ಹಾಗೆಯೇ, ನಿಮ್ಮ ಕರ್ನಾಟಕದ ಬೇರುಗಳಿಗೆ ಪೋಷಕಾಂಶ ಹಾಕಿ ಬೆಳೆಸುತ್ತಿರುವ ಅಕ್ಕ ಒಕ್ಕೂಟವನ್ನು ಅಭಿನಂದಿಸುತ್ತೇನೆ,'' ಎಂದು ಸಿಎಂ ಸಂದೇಶ ಕಳಿಸಿದ್ದರು.

''ನಿಮ್ಮ ಮನೆಯಲ್ಲಿ ಕನ್ನಡ ಮಾತನಾಡುತ್ತ ಕನ್ನಡವನ್ನು ನಿಮ್ಮ ಮಕ್ಕಳಿಗೆ ಕಲಿಸುವುದರ ಜತೆಗೆ ಕನ್ನಡ ಉಳಿಸಿ ಬೆಳೆಸಲು ನಿಮ್ಮದೇ ಆದ ರೀತಿಯಲ್ಲಿ ಕೊಡುಗೆ ನೀಡುತ್ತಿದ್ದೀರಿ. ಇದಕ್ಕಾಗಿ, ಕೂಟದಲ್ಲಿರುವ ಮತ್ತು ಅಮೆರಿಕದಲ್ಲಿ ನೆಲೆ ನಿಂತಿರುವ ಎಲ್ಲಾ ಕನ್ನಡಿಗರಿಗೂ ಅಭಿನಂದನೆಗಳು,'' ಎಂಬ ಸಿಎಂ ಸಂದೇಶವನ್ನು ಓದಿ ಹೇಳಲಾಯಿತು.

''ಕೊಡಗಿನಲ್ಲಿ ಮಳೆ ಬಿಡುವು ಕೊಟ್ಟಿದೆ. ಅಲ್ಲಿನವರು ಮತ್ತೆ ಬದುಕು ಕಟ್ಟಿಕೊಳ್ಳಬೇಕಾಗಿದೆ. ಕೊಡಗಿನ ಪುನರ್‌ ನಿರ್ಮಾಣಕ್ಕಾಗಿ ನಿಮ್ಮಿಂದ ಉದಾರ ಸಹಾಯವನ್ನು ನಾನು ಈ ಸಂದರ್ಭದಲ್ಲಿ ನಿರೀಕ್ಷಿಸುತ್ತಿದ್ದೇನೆ. ಮುಖ್ಯಮಂತ್ರಿಗಳ ಪರಿಹಾರ ನಿಧಿಗೆ ದೊಡ್ಡ ಸಹಾಯ ಹರಿದುಬರಲಿ,'' ಎಂದು ಸಿಎಂ ಮನವಿ ಮಾಡಿದರು.

ಶಿವಮೂರ್ತಿ ಕೀಲಾರ ಅಧ್ಯಕ್ಷ ತೆಯಲ್ಲಿ ನಡೆದ ಈ ಸಮ್ಮೇಳನದಲ್ಲಿ ಉಡುಪಿ ಕೃಷ್ಣ ಮಠದ ಪುತ್ತಿಗೆ ಶ್ರೀಸುಗಣೇಂದ್ರ ತೀರ್ಥ ಶ್ರೀಪಾದರು, ಸುತ್ತೂರು ಮಠದ ಶಿವರಾತ್ರೀಶ್ವರ ದೇಶಿಕೇಂದ್ರ ಸ್ವಾಮೀಜಿ, ಮೈಸೂರು ರಾಜವಂಶಸ್ಥ ಯದುವೀರ ಕೃಷ್ಣರಾಜ ಒಡೆಯರ್‌, ಶಾಸಕರಾದ ಎಸ್‌.ಟಿ. ಸೋಮಶೇಖರ್‌, ಬೈರತಿ ಬಸವರಾಜ್‌, ಚಲನಚಿತ್ರ ಅಕಾಡೆಮಿಯ ಅಧ್ಯಕ್ಷ ನಾಗತಿಹಳ್ಳಿ ಚಂದ್ರಶೇಖರ್‌, ಚಿತ್ರನಟರಾದ ಪುನೀತ್‌ ರಾಜಕುಮಾರ್‌, ಉಪೇಂದ್ರ, ಕನ್ನಡ ಮತ್ತು ಸಂಸ್ಕೃತಿ ಹಾಗೂ ವಾರ್ತಾ ಮತ್ತು ಸಾರ್ವಜನಿಕ ಸಂಪರ್ಕ ಇಲಾಖೆ ನಿರ್ದೇಶಕ ಎನ್‌.ಆರ್‌.ವಿಶುಕುಮಾರ್‌ ಭಾಗವಹಿಸಿದ್ದರು.