ಶೀಘ್ರದಲ್ಲೇ ಜನೌಷಧ ಕೇಂದ್ರಗಳಿಗೆ ಫಾರ್ಮಸಿಸ್ಟ್‌ ನೇಮಕ: ಅರ್ಹ ಅಭ್ಯರ್ಥಿಗಳಿಗಾಗಿ ನಡೆಯುತ್ತಿದೆ ಹುಡುಕಾಟ!

ಬೆಂಗಳೂರು: ರಾಜ್ಯದ ನಾನಾ ಜಿಲ್ಲೆಗಳಲ್ಲಿನ ಪ್ರಧಾನಮಂತ್ರಿ ಜನೌಷಧಿ ಕೇಂದ್ರಗಳಲ್ಲಿ ಖಾಲಿಯಿರುವ ಫಾರ್ಮಸಿಸ್ಟ್‌ ಸಿಬ್ಬಂದಿಯನ್ನು ನಿಯೋಜಿಸಲು ಮೈಸೂರು ಸೇಲ್ಸ್‌ ಇಂಟರ್‌ನ್ಯಾಷನಲ್‌ ಲಿಮಿಟೆಡ್‌(ಎಂಎಸ್‌ಐಎಲ್‌) ಮುಂದಾಗಿದೆ.

ರಾಜ್ಯ ಸಾರ್ವಜನಿಕ ವಲಯದ ಎಂಎಸ್‌ಐಎಲ್‌ ಆರೋಗ್ಯ ಇಲಾಖೆ ಮೂಲಕ ನಾನಾ ಜಿಲ್ಲೆಗಳಲ್ಲಿ ಸುಮಾರು 124 ಜನೌಷಧಿ ಕೇಂದ್ರಗಳನ್ನು ನಿರ್ವಹಿಸುತ್ತಿದೆ. ಇವುಗಳಲ್ಲಿ ಹೆಚ್ಚಿನವು ಬೆಂಗಳೂರಿನ ಹೊರಗಡೆ ಇವೆ. ಈಗ ಹತ್ತು ಕಡೆ ಫಾರ್ಮಾಸಿಸ್ಟ್‌ ಹುದ್ದೆಗಳು ಖಾಲಿಯಿವೆ. ಇವುಗಳನ್ನು ತುಂಬಲು ಅಭ್ಯರ್ಥಿಗಳ ಹುಡುಕಾಟ ನಡೆದಿದೆ. ಅರ್ಹರು ಸಿಕ್ಕಲ್ಲಿ ತಕ್ಷಣವೇ ಹೊರಗುತ್ತಿಗೆ ಆಧಾರದ ಮೇಲೆ ನೇಮಕ ಮಾಡಿಕೊಳ್ಳಲಾಗುತ್ತದೆ.
ವಿಕ ರಿಯಾಲಿಟಿ ಚೆಕ್: ಜನೌಷಧ ಗ್ರಾಹಕರ ಸಂಖ್ಯೆಯಲ್ಲಿ ಶೇ.20ರಷ್ಟು ಹೆಚ್ಚಳ

ಪ್ರತಿ ಫಾರ್ಮಸಿಸ್ಟ್‌ಗೆ ಮಾಸಿಕ 15 ಸಾವಿರ ರೂ. ಸಂಬಳ ಹಾಗೂ ಇತರೆ ಭತ್ಯೆ ನೀಡಲಾಗುತ್ತದೆ. ಫಾರ್ಮಸಿ ಪದವಿ ಹೊಂದಿದವರನ್ನು ನಿಯೋಜಿಸಿಕೊಳ್ಳಲು ನಿರ್ಧರಿಸಲಾಗಿದೆ. ಖಾಲಿ ಹುದ್ದೆಗಳನ್ನು ವಾರದೊಳಗೆ ತುಂಬಲಾಗುವುದು. ಸಂಸ್ಥೆ ನಿರ್ವಹಿಸುತ್ತಿರುವ ಕೇಂದ್ರಗಳಲ್ಲಿ ಸಾರ್ವಜನಿಕರಿಗೆ ತೊಂದರೆಯಾಗದ ರೀತಿಯಲ್ಲಿ ಸೇವೆ ನೀಡಲಾಗುತ್ತಿದೆ. ಹೆಚ್ಚು ವಹಿವಾಟು ನಡೆಯುವ ಕೇಂದ್ರಗಳಲ್ಲಿ ಇಬ್ಬರು ಫಾರ್ಮಸಿಸ್ಟ್‌ಗಳನ್ನು ನಿಯೋಜಿಸಲಾಗಿದೆ ಎಂದು ಎಂಎಸ್‌ಐಎಲ್‌ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.