ಎಟಿಎಂಗಳಿಗೆ ಸ್ಕಿಮ್ಮಿಂಗ್‌ ಯಂತ್ರ ಅಳವಡಿಕೆ, ಇಬ್ಬರು ಚಿಲಿ ಪ್ರಜೆಗಳ ಬಂಧನ

ಬೆಂಗಳೂರು : ಎಟಿಎಂ ಯಂತ್ರಗಳಿಗೆ ಸ್ಕಿಮ್ಮಿಂಗ್‌ ಉಪಕರಣ ಮತ್ತು ಪುಟ್ಟ ಕ್ಯಾಮೆರಾ ಇಟ್ಟು ಮಾಹಿತಿ ಮತ್ತು ಪಿನ್‌ ಕದ್ದು, ಹಣ ದೋಚುತ್ತಿದ್ದ ದಕ್ಷಿಣ ಅಮೆರಿಕದ ಚಿಲಿ ಮೂಲದ ಇಬ್ಬರನ್ನು ತಿಲಕನಗರ ಠಾಣೆ ಪೊಲೀಸರು ಬಂಧಿಸಿದ್ದಾರೆ.

ಬಂಧಿತ ಆರೋಪಿಗಳಿಂದ ಸ್ಕಿಮ್ಮಿಂಗ್‌ ಉಪಕರಣ, ಸಾಲ್ಡರ್‌ ಗನ್‌ ಸೇರಿದಂತೆ ಇನ್ನಿತರ ವಸ್ತುಗಳನ್ನು ಜಪ್ತಿ ಮಾಡಲಾಗಿದೆ. ತಲೆಮರೆಸಿಕೊಂಡಿರುವ ಇನ್ನಿಬ್ಬರು ಆರೋಪಿಗಳ ಬಂಧನಕ್ಕೆ ಪೊಲೀಸರು ಬಲೆ ಬೀಸಿದ್ದಾರೆ. ಈ ಆರೋಪಿಗಳು ಮೇನಲ್ಲಿ ಪ್ರವಾಸಿ ವೀಸಾ ಪಡೆದು ದಿಲ್ಲಿಗೆ ಬಂದು, ಅಲ್ಲಿಂದ ಬೆಂಗಳೂರಿಗೆ ಆಗಮಿಸಿದ್ದರು.

ಎಟಿಎಂ ಯಂತ್ರಕ್ಕೆ ಕಾರ್ಡ್‌ ಹಾಕುವ ಜಾಗದಲ್ಲಿ ಸ್ಕಿಮ್ಮಿಂಗ್‌ ಉಪಕರಣ ಮತ್ತು ಪಿನ್‌ ಸಂಖ್ಯೆ ಒತ್ತುವ ಕೀ ಪ್ಯಾಡ್‌ ಮೇಲ್ಭಾಗದಲ್ಲಿ ಪುಟ್ಟ ಕ್ಯಾಮೆರಾವನ್ನು ಅನುಮಾನ ಬಾರದಂತೆ ಅಳವಡಿಸುತ್ತಿದ್ದರು. ಬೆಳಗ್ಗೆ ಅಳವಡಿಸಿ ರಾತ್ರಿ ವೇಳೆಗೆ ಅವುಗಳನ್ನು ಬಿಚ್ಚಿಕೊಂಡು ಹೋಗುತ್ತಿದ್ದರು. ಆರೋಪಿಗಳು ಬಹುತೇಕ ಕೆನರಾ ಬ್ಯಾಂಕ್‌ಗಳ ಎಟಿಎಂಗಳಲ್ಲಿ ಈ ಉಪಕರಣಗಳನ್ನು ಅಳವಡಿಸುತ್ತಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ.

ಎಟಿಎಂನಲ್ಲೇ ಸಿಕ್ಕಿ ಬಿದ್ದರು: ಇತ್ತೀಚೆಗೆ ಜಯನಗರ 9ನೇ ಬ್ಲಾಕ್‌ನಲ್ಲಿರುವ ಕೆನರಾ ಬ್ಯಾಂಕ್‌ ಎಟಿಎಂ ಯಂತ್ರಕ್ಕೆ ಸ್ಕಿಮ್ಮರ್‌ ಅಳವಡಿಸಿದ್ದರು. ಈ ವಿಚಾರ ಗೊತ್ತಾಗಿ ಬ್ಯಾಂಕ್‌ನ ಸಿಬ್ಬಂದಿಯೊಬ್ಬರು ಪೊಲೀಸರಿಗೆ ಮಾಹಿತಿ ನೀಡಿದರು. ಆಗ ಉಪಕರಣ ವಾಪಸ್‌ ತೆಗೆಯಲು ಬರುತ್ತಾರೆ ಎಂದು ಪೊಲೀಸರು ಕಾದು ಕುಳಿತಿದ್ದರು. ಶುಕ್ರವಾರ ರಾತ್ರಿ 8.45ರ ಸುಮಾರಿಗೆ ಇಬ್ಬರು ಉಪಕರಣ ಬಿಚ್ಚುತ್ತಿರುವಾಗ ಬಂಧಿಸಲಾಗಿದೆ.