ಕನ್ನಡದಲ್ಲೇ ಬ್ಯಾಂಕಿಂಗ್‌ ಪರೀಕ್ಷೆ: ಹನುಮಂತಯ್ಯ ಒತ್ತಾಯ

ಹೊಸದಿಲ್ಲಿ: ಈ ಹಿಂದೆ ಬ್ಯಾಂಕಿಂಗ್‌ ವಲಯದ ನೇಮಕದಲ್ಲಿದ್ದ ಸ್ಥಳೀಯ ಭಾಷೆಯ ಜ್ಞಾನ ಕಡ್ಡಾಯ ಎಂಬ ನಿಯಮವನ್ನು ಮತ್ತೆ ಜಾರಿಗೆ ತರಬೇಕು ಎಂದು ಸಂಸದ ಎಲ್‌.ಹನುಮಂತಯ್ಯ ಒತ್ತಾಯಿಸಿದ್ದಾರೆ.

ರಾಜ್ಯಸಭೆಯ ಕಲಾಪದ ಶೂನ್ಯವೇಳೆಯಲ್ಲಿ ಸೋಮವಾರ ಈ ವಿಷಯ ಪ್ರಸ್ತಾಪಿಸಿ,'' ಪ್ರಾದೇಶಿಕ ನೇಮಕಾತಿ ಮಂಡಳಿ (ಆರ್‌ಆರ್‌ಬಿ)ಯನ್ನು ರದ್ದುಗೊಳಿಸಿ ಕೇಂದ್ರ ಸರಕಾರವೀಗ ಕೇಂದ್ರೀಕೃತ ವ್ಯವಸ್ಥೆಯನ್ನು ಜಾರಿಗೊಳಿಸಿದ್ದರಿಂದ ಕರ್ನಾಟಕವೂ ಸೇರಿದಂತೆ ಅನೇಕ ರಾಜ್ಯಗಳಿಗೆ ತೀವ್ರ ಅನ್ಯಾಯವಾಗುತ್ತಿದೆ,''ಎಂದರು.

''ಕರ್ನಾಟಕವೊಂದರಲ್ಲೇ 18 ಸಾವಿರ ನೇಮಕಗಳಾಗಿದ್ದು, ಈ ಪೈಕಿ ಕೇವಲ 1060 ಕನ್ನಡಿಗರು. ಈ ಹಿಂದೆ ಆರ್‌ಆರ್‌ಬಿ ನೇಮಕದಲ್ಲಿ ಸ್ಥಳೀಯ ಭಾಷೆಯ ಜ್ಞಾನ ಕಡ್ಡಾಯ ಎಂಬ ನಿಯಮದ ಬದಲು ಸ್ಥಳೀಯ ಭಾಷೆಯ ಜ್ಞಾನ ಅಪೇಕ್ಷಣೀಯ ಎಂದಷ್ಟೇ ಹೇಳಲಾಗಿದೆ. ಇದರಿಂದ ಗುಮಾಸ್ತನ ಹುದ್ದೆಯೂ ಸೇರಿದಂತೆ ಬ್ಯಾಂಕುಗಳಲ್ಲಿ ಕನ್ನಡಿಗರಿಗೆ ಯಾವುದೇ ಉದ್ಯೋಗ ಸಿಗದಂತಾಗಿದೆ,'' ಎಂದೂ ಅವರು ವಿವರಿಸಿದರು.

ಈ ನಿರ್ಧಾರದ ಪರಿಣಾಮವಾಗಿ ಸ್ಥಳೀಯ ಭಾಷೆ ಗೊತ್ತಿಲ್ಲದ ಅಧಿಕಾರಿಗಳೇ ಬ್ಯಾಂಕುಗಳಲ್ಲಿ ಹೆಚ್ಚಾಗಿರುವುದರಿಂದ ಸ್ಥಳೀಯ ಭಾಷೆ ಮಾತ್ರ ತಿಳಿದಿರುವ ಗ್ರಾಹಕರಿಗೆ ತೀವ್ರ ತೊಂದರೆಯಾಗುತ್ತಿದೆ. ಇದು ಒಕ್ಕೂಟ ವ್ಯವಸ್ಥೆಯ ವಿರುದ್ಧವಾಗಿದೆ. ಸಮಸ್ಯೆ ಬಗ್ಗೆ ಕರ್ನಾಟಕದ ಹಿಂದಿನ ಮುಖ್ಯಮಂತ್ರಿಗಳು ಕೇಂದ್ರ ಸರಕಾರಕ್ಕೆ ಪತ್ರವನ್ನೂ ಬರೆದಿದ್ದಾರೆ,''ಎಂದು ನೆನಪಿಸಿದರು.