ಬಂಗ್ಲೆ ಖಾಲಿ ಮಾಡಿ: ಮಾಜಿ ಡಿಸಿಎಂ ಪರಮೇಶ್ವರ್‌ಗೆ ನೋಟಿಸ್‌

ಬೆಂಗಳೂರು : ಸಮ್ಮಿಶ್ರ ಸರಕಾರದಲ್ಲಿ ಉಪ ಮುಖ್ಯಮಂತ್ರಿಯಾಗಿದ್ದ ಡಾ.ಜಿ.ಪರಮೇಶ್ವರ ಅವರಿಗೆ ಮಂಜೂರು ಮಾಡಿದ್ದ ಸರಕಾರಿ ಬಂಗ್ಲೆಯನ್ನು ತೆರವುಗೊಳಿಸುವಂತೆ ಬಿಡಿಎ ಸೋಮವಾರ ನೋಟಿಸ್‌ ಜಾರಿ ಮಾಡಿದೆ.

ಸದರಿ ಸರಕಾರಿ ಬಂಗ್ಲೆಯನ್ನು ಬಿಡಿಎ ನಿರ್ಮಿಸಿದೆ. ಡಿಸಿಎಂ ಆಗಿದ್ದ ವೇಳೆ ಡಾ.ಪರಮೇಶ್ವರ್‌ಗೆ ಮಾಸಿಕ ಬಾಡಿಗೆ ಆಧಾರದ ಮೇಲೆ ಹಂಚಿಕೆ ಮಾಡಲಾಗಿತ್ತು. ಈಗ ಈ ಬಂಗ್ಲೆಯನ್ನು ನೂತನ ಗೃಹ ಸಚಿವ ಬಸವರಾಜ ಬೊಮ್ಮಾಯಿ ಅವರಿಗೆ ಹಂಚಿಕೆ ಮಾಡಿದ್ದು, ಸರಕಾರಿ ವಸತಿಗೃಹವನ್ನು ಪ್ರಾಧಿಕಾರದ ಸುಪರ್ದಿಗೆ ವಹಿಸುವಂತೆ ನೋಟಿಸ್‌ನಲ್ಲಿ ತಿಳಿಸಲಾಗಿದೆ.

ಬಂಗ್ಲೆ ತೆರವು ವೇಳೆ ಈವರೆಗಿನ ಅವಧಿಯಲ್ಲಿ ಉಪಯೋಗಿಸಿರುವ ವಿದ್ಯುಚ್ಛಕ್ತಿ ವೆಚ್ಚ ಹಾಗೂ ನೀರಿನ ವೆಚ್ಚದ ಬಿಲ್‌ಗಳ ಮಾಹಿತಿಯನ್ನು ನೀಡಿ ಒಂದು ವಾರದೊಳಗೆ ಬಂಗ್ಲೆಯನ್ನು ಸುಪರ್ದಿಗೆ ವಹಿಸುವಂತೆ ಮಾಜಿ ಡಿಸಿಎಂ ಸೂಚಿಸಲಾಗಿದೆ.