ಸರಕಾರಿ ಬಂಗಲೆ ಖಾಲಿ ಮಾಡುವಂತೆ ಮಾಜಿ ಡಿಸಿಎಂ ಪರಮೇಶ್ವರ್‌ಗೆ ಬಿಡಿಎ ನೋಟಿಸ್

ಬೆಂಗಳೂರು: ಸದಾಶಿವನಗರದಲ್ಲಿರುವ ಸರಕಾರಿ ಬಂಗಲೆಯನ್ನು ಒಂದು ವಾರದೊಳಗಾಗಿ ಖಾಲಿ ಮಾಡುವಂತೆ ಮಾಜಿ ಉಪಮುಖ್ಯಮಂತ್ರಿ ಡಾ. ಜಿ ಪರಮೇಶ್ವರ್ ಅವರಿಗೆ ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರ( ಬಿಡಿಎ) ನೊಟೀಸ್ ಜಾರಿಗೊಳಿಸಿದೆ.

ಸದಾಶಿವನಗರದ ಎರಡನೇ ಹಂತದಲ್ಲಿರುವ ಈ ಸರಕಾರಿ ನಿವಾಸವನ್ನು ಮಾಸಿಕ ಬಾಡಿಗೆ ಆಧಾರದ ಮೇಲೆ ಹಂಚಿಕೆ ಮಾಡಲಾಗಿತ್ತು. ಪರಮೇಶ್ವರ್ ಅಧಿಕಾರದಲ್ಲಿದ್ದಾಗ ಈ ನಿವಾಸದಲ್ಲಿ ವಾಸವಾಗಿದ್ದರು. ಅಧಿಕಾರದಿಂದ ಇಳಿದ ಬಳಿಕವೂ ಪರಮೇಶ್ವರ್ ಬಂಗಲೆಯನ್ನು ಬಿಡಿಎಗೆ ಹಿಂತಿರುಗಿಸಿರಲಿಲ್ಲ.

ಈ ಬಂಗಲೆ ಪ್ರಸ್ತುತ ನೂತನ ಗೃಹ ಸಚಿವರ ಕಚೇರಿ ಉಪಯೋಗಕ್ಕೆ ಹಂಚಿಕೆಯಾಗಿದ್ದು ಈ ಹಿನ್ನೆಲೆಯಲ್ಲಿ ಬಂಗಲೆಯನ್ನು ಒಂದು ವಾರದ ಒಳಗಾಗಿ ಹಿಂತಿರುಗಿಸುವಂತೆ ಬಿಡಿಎ ಸೂಚಿಸಿದೆ.

ಜೊತೆಗೆ ವಿದ್ಯುಚ್ಛತ್ತಿ ವೆಚ್ಚ ಹಾಗೂ ನೀರಿನ ವೆಚ್ಚವನ್ನು ಸಂಬಂಧಿಸಿದ ಇಲಾಖೆಗೆ ಪಾವತಿಸಿದ ಬಿಲ್ಲುಗಳ ಜೊತೆಗೆ ಪ್ರಾಧಿಕಾರದ ಸುಪರ್ದಿಗೆ ವಹಿಸುವಂತೆ ನೊಟೀಸಿನಲ್ಲಿ ಉಲ್ಲೇಖ ಮಾಡಲಾಗಿದೆ. ಸದ್ಯ ಪರಮೇಶ್ವರ್ ಖಾಸಗಿ ನಿವಾಸದಲ್ಲಿ ವಾಸವಾಗಿದ್ದರೂ ಸರಕಾರಿ ಬಂಗಲೆಯನ್ನು ಹಿಂತಿರುಗಿಸಿರಲಿಲ್ಲ.