ರಾಜ್ಯದಲ್ಲಿ 'ಬೀರು' ಮಾರಾಟ ಕುಸಿತ : ತಲೆ ಬಿಸಿ ಮಾಡಿಕೊಡ ಅಬಕಾರಿ ಇಲಾಖೆ!

ಶ್ರೀಕಾಂತ್‌ ಹುಣಸವಾಡಿ
ಬೆಂಗಳೂರು: ರಾಜ್ಯದಲ್ಲಿ ಬಿಯರ್‌ ಮಾರಾಟ ದಿನೇ ದಿನೇ ಕುಂಠಿತವಾಗುತ್ತಿದ್ದು, ಅದರಿಂದ ಆದಾಯ ಕೈ ತಪ್ಪಿ ಹೋಗುತ್ತಿರುವುದನ್ನು ಗಂಭೀರವಾಗಿ ಪರಿಗಣಿಸಿರುವ ಅಬಕಾರಿ ಇಲಾಖೆ, ಆ ಕುರಿತು ಅಧ್ಯಯನ ನಡೆಸಿ ವರದಿ ಸಲ್ಲಿಸಲು ರಾಜ್ಯದ ಎಲ್ಲಅಬಕಾರಿ ಜಂಟಿ ಆಯುಕ್ತರು ಮತ್ತು ಉಪ ಆಯುಕ್ತರಿಗೆ ಸೂಚನೆ ನೀಡಿದೆ.

ಈ ಕುರಿತು ಸುತೋಲೆ ಹೊರಡಿಸಿರುವ ಆಯುಕ್ತರು, ಬಿಯರ್‌ ಮಾರಾಟ ವೃದ್ಧಿಯಾಗದಿದ್ದರೆ ಈ ವರ್ಷ ನೀರಿಕ್ಷಿತ 20,950 ಕೋಟಿ ಆದಾಯದ ಗುರಿ ತಲುಪಲು ಸಾಧ್ಯವಿಲ್ಲಎಂಬುದು ಖಾತ್ರಿಯಾಗಿರುವ ಹಿನ್ನೆಲೆಯಲ್ಲಿಈ ಕ್ರಮಕ್ಕೆ ಮುಂದಾಗಿದ್ದಾರೆ.

ಸುತೋಲೆಯಲ್ಲೇನಿದೆ?: 2018-19ನೇ ಸಾಲಿನ ಏಪ್ರಿಲ್‌ನಿಂದ ನವೆಂಬರ್‌-2018ವರೆಗಿನ ಅವಧಿಯಲ್ಲಿರಾಜ್ಯಾದ್ಯಂತ ಮಾರಾಟವಾದ ಬಿಯರ್‌ ಪ್ರಮಾಣ 192.08 ಲಕ್ಷ ಪೆಟ್ಟಿಗೆಗಳು, 2019-20ನೇ ಸಾಲಿನ ಇದೇ ಅವಧಿಗೆ ರಾಜ್ಯದಲ್ಲಿ ಮಾರಾಟವಾದ ಬಿಯರ್‌ ಪ್ರಮಾಣ 192.67 ಲಕ್ಷ ಪೆಟ್ಟಿಗೆಗಳಾಗಿವೆ. ಕಳೆದ ವರ್ಷದ ಇದೇ ಅವಧಿಗೆ ಹೋಲಿಸಿದರೆ ಭೌತಿಕ ವ್ಯತ್ಯಾಸ ಕೇವಲ 0.58 ಲಕ್ಷ ಪೆಟ್ಟಿಗೆಗಳಾಗಿದ್ದು, ಶೇಕಡಾವಾರು ಬೆಳವಣಿಗೆ ಹೆಚ್ಚಳ ಶೇ.0.30ರಷ್ಟು ಮಾತ್ರ. ಮದ್ಯ ಮಾರಾಟದ ಶೇಕಡಾವಾರುಗೆ ಹೋಲಿಸಿದರೆ ಇದು ತೀರಾ ಕಡಿಮೆ.

ಅಡಕೆ ಆರೋಗ್ಯಕ್ಕೆ ಹಾನಿಕಾರಕ ಅಲ್ಲ: ಸಂಶೋಧನೆಗೆ ಕೇಂದ್ರದ ಮೇಲೆ ಒತ್ತಡ

ತಮ್ಮ ಕಾರ‍್ಯವ್ಯಾಪ್ತಿಯಲ್ಲಿರುವ ಬಿಯರ್‌ ಮಾರಾಟದ ಪ್ರಮಾಣ ಮತ್ತು ಶೇಕಡಾವಾರು ಬೆಳವಣಿಗೆ ಕುಂಠಿತಗೊಂಡಿದೆ. ಇದನ್ನು ಗಂಭೀರವಾಗಿ ಪರಿಗಣಿಸಲಾಗಿದ್ದು, ಮಾರಾಟ ಕಡಿಮೆಯಾಗಿರುವುದಕ್ಕೆ ಕಾರಣ ಪತ್ತೆ ಹಚ್ಚಿ, ಕೂಲಂಕಷವಾಗಿ ವಿಶ್ಲೇಷಿಸಿ ಗುರಿ ಸಾಧಿಸಲು ಕೈಗೊಳ್ಳಬೇಕಾದ ಕ್ರಮಗಳ ಬಗ್ಗೆ ವರದಿ ಸಲ್ಲಿಸುವಂತೆ ಅಬಕಾರಿ ಆಯುಕ್ತರು ರಾಜ್ಯದ ಎಲ್ಲ ವಿಭಾಗಗಳ ಅಬಕಾರಿ ಜಂಟಿ ಆಯುಕ್ತರಿಗೆ ಮತ್ತು ಅಬಕಾರಿ ಉಪ ಆಯುಕ್ತರಿಗೆ ಸೂಚನೆ ನೀಡಿದ್ದಾರೆ.

ಕೇಂದ್ರ-ರಾಜ್ಯಗಳ ‘ಪೌರತ್ವ’ ಸಂಘರ್ಷ: ಕಾನೂನು ಅನುಷ್ಠಾನಕ್ಕೆ ಸಡ್ಡು ಹೊಡೆದ ಮುಖ್ಯಮಂತ್ರಿಗಳು

ಬಿಯರ್‌ ಮೊರೆ ಹೋಗಲು ಕಾರಣ
ಅಬಕಾರಿ ಮಾರುಕಟ್ಟೆಯಲ್ಲಿ ಐಎಂಎಲ್‌ ಮಾರಾಟಕ್ಕೆ ಹೆಚ್ಚು ಒತ್ತಡ ಹಾಕಿದರೂ ಅದು ಮೇಲೇಳುತ್ತಿಲ್ಲ. ಹಾಗಾಗಿ ಬಿಯರ್‌ಗೆ ಭಾರಿ ಬೇಡಿಕೆ ಇರುವ ಹಿನ್ನೆಲೆಯಲ್ಲಿಅದನ್ನೇ ಹೆಚ್ಚು ಪುಷ್‌ ಮಾಡಿ ನಿರೀಕ್ಷಿತ ಆದಾಯ ತುಂಬಿಕೊಳ್ಳಲು ಅಬಕಾರಿ ಇಲಾಖೆ ಮುಂದಾಗಿದೆ ಎಂಬುದು ಅಬಕಾರಿ ಉದ್ಯಮಿಗಳ ಅನಿಸಿಕೆ.

ಜತೆಗೆ ಇತ್ತೀಚಿನ ವರ್ಷಗಳಲ್ಲಿಜನರು ನಾನಾ ಕಾರಣಗಳಿಂದಾಗಿ ಐಎಂಎಲ್‌ಗಿಂತ ಬಿಯರ್‌ ಸೇವನೆಗೆ ಹೆಚ್ಚು ಮನಸೋತಿರುವ ಹಿನ್ನೆಲೆಯಲ್ಲಿ ಹೊಸ ವರ್ಷಾಚರಣೆ ಬರುತ್ತಿರುವುದರಿಂದ ಸಾಧ್ಯವಾದಷ್ಟೂ ಬಿಯರ್‌ ಮಾರಾಟವನ್ನೇ ಉತ್ತೇಜಿಸಲು ಅಬಕಾರಿ ಇಲಾಖೆ ನಿರ್ಧರಿಸಿದೆ.

ಬಿಯರ್‌ ನಿಂದ ಬರುತ್ತಿರುವ ಆದಾಯ
ವರ್ಷ- ಕೋಟಿ ರೂ.ಗಳಲ್ಲಿ

• 2015-16 1792 ಕೋಟಿ
• 2016-17 1977 ಕೋಟಿ
• 2017-18 2151 ಕೋಟಿ
• 2018-19 2230 ಕೋಟಿ
• 2019-20 2500 ಕೋಟಿ (ಅಂದಾಜು ಗುರಿ)

"ಹಲವು ವರ್ಷಗಳಿಂದ ಬಿಯರ್‌ಗೆ ಬೇಡಿಕೆ ಇದ್ದರೂ ಸಹ ಮಾರಾಟಕ್ಕೆ ಅವಕಾಶ ನೀಡದಿರುವುದರಿಂದ ಆಗಿರುವ ಆದಾಯ ನಷ್ಟವನ್ನು ಅಬಕಾರಿ ಅಧಿಕಾರಿಗಳಿಂದಲೇ ವಸೂಲು ಮಾಡಬೇಕು."
-ಗೋವಿಂದರಾಜ ಹೆಗ್ಡೆ, ಪ್ರಧಾನ ಕಾರ‍್ಯದರ್ಶಿ, ಕರ್ನಾಟಕ ರಾಜ್ಯ ಮದ್ಯ ಮಾರಾಟಗಾರರ ಸಂಘ