ಬೆಂಗಳೂರು ಸಾಕುಪ್ರಾಣಿ ಸ್ನೇಹಿ ನಗರ

ಬೆಂಗಳೂರು: 'ಸಿಲಿಕಾನ್‌ ಸಿಟಿ' ಬೆಂಗಳೂರು ಅನೇಕ ಖ್ಯಾತಿಗಳಿಗೆ ಪಾತ್ರವಾಗಿದೆ. ಇದೀಗ ಇಡೀ ದೇಶದಲ್ಲೇ ಸಾಕುಪ್ರಾಣಿ-ಸ್ನೇಹಿ ನಗರಗಳ ಪಟ್ಟಿಯಲ್ಲಿ ಬೆಂಗಳೂರು ಪ್ರಥಮ ಸ್ಥಾನದಲ್ಲಿದ್ದರೆ ಮುಂಬಯಿ ನಂತರದ ಸ್ಥಾನದಲ್ಲಿದೆ. ಭಾರತದಲ್ಲಿರುವ ಸಾಕು ಪ್ರಾಣಿಗಳ ಮಾಲೀಕರ ಪೈಕಿ 1,500 ಮಂದಿಯನ್ನು ಸಮೀಕ್ಷೆಗೊಳಪಡಿಸಿ ಈ ಪಟ್ಟಿಯನ್ನು ಸಿದ್ಧಪಡಿಸಲಾಗಿದೆ.

ಸಮೀಕ್ಷೆಯಲ್ಲಿ ಪಾಲ್ಗೊಂಡವರ ಪೈಕಿ ಶೇ.20ರಷ್ಟು ಮಂದಿ ಬೆಂಗಳೂರು ನಗರವು ತಮ್ಮ ಸಾಕು ಪ್ರಾಣಿಗಳಿಗೆ ಹೆಚ್ಚು ಸ್ನೇಹಿ ನಗರವಾಗಿದೆ ಎಂದು ಅಭಿಪ್ರಾಯಪಟ್ಟಿದ್ದಾರೆ. ಇದೇ ವೇಳೆ, ಶೇ.18ರಷ್ಟು ಮಂದಿ ಮುಂಬಯಿ ನಗರವು ಅತ್ಯುತ್ತಮ ಎಂದು ಹೇಳಿದ್ದಾರೆ. ಇನ್ನು ಈ ವಿಷಯದಲ್ಲಿ ಹೈದ್ರಾಬಾದ್‌ ಮತ್ತು ದಿಲ್ಲಿ ಕಡಿಮೆ ಸ್ಥಾನದಲ್ಲಿವೆ. ಕ್ರಮವಾಗಿ ಶೇ.12.5 ಮತ್ತು ಶೇ.12ರಷ್ಟು ಜನರು ಸಾಕುಪ್ರಾಣಿ ಸ್ನೇಹಿ ನಗರಗಳಾಗಿವೆ ಎಂದು ಅಭಿಪ್ರಾಯಪಟ್ಟಿದ್ದಾರೆ.

- ಪೆಟ್‌ ಡ್ರೇಟ್‌ ಫೇರ್‌ ಸಮೀಕ್ಷೆ -

ಇಂಡಿಯಾ ಇಂಟರ್‌ನ್ಯಾಷನಲ್‌ ಪೆಟ್‌ ಟ್ರೇಡ್‌ ಫೇರ್‌(ಐಐಪಿಟಿಎಫ್‌) ಸಂಸ್ಥೆಯು ಈ ಸಮೀಕ್ಷೆ ಕೈಗೊಂಡಿದೆ. ಒಟ್ಟಾರೆ ಶೇ.70ರಷ್ಟು ಸಾಕುಪ್ರಾಣಿಗಳ ಮಾಲೀಕರು ತಾವಿರುವ ನಗರಗಳು ಹೆಚ್ಚುಕಡಿಮೆ ಸಾಕು ಪ್ರಾಣಿ-ಸ್ನೇಹಿ ನಗರಗಳಾಗಿವೆ ಎಂದು ಅಭಿಪ್ರಾಯಪಟ್ಟಿದ್ದಾರೆ. ಈ ಪೈಕಿ ಶೇ.12.4ರಷ್ಟು ಮಂದಿ ತಮ್ಮ ನಗರಗಳಿಗೆ ಅತ್ಯಂತ ಸ್ನೇಹಿ ನಗರ ಎಂದು ಶ್ರೇಯಾಂಕ ನೀಡಿದರೆ, ಶೇ.14.5ರಷ್ಟು ಮಂದಿ ತಾವಿರುವ ನಗರಗಳು ಸಾಕುಪ್ರಾಣಿ-ಸ್ನೇಹಿ ನಗರಗಳಾಗಿಲ್ಲ ಎಂದು ಬೇಸರ ವ್ಯಕ್ತಪಡಿಸಿದ್ದಾರೆ. ಅಂದ ಹಾಗೆ ಭಾರತದಲ್ಲಿ ಪ್ರತಿ ವರ್ಷ 600,000 ಸಾಕು ಪ್ರಾಣಿಗಳನ್ನು ದತ್ತು ತೆಗೆದುಕೊಳ್ಳಲಾಗುತ್ತಿದೆ.

- ಪೆಟ್‌ ಫ್ರೇಂಡ್ಲಿ ಪಾರ್ಕ್‌ ಇಲ್ಲ -

ಇನ್ನೂ ಶೇ.60ರಷ್ಟು ಮಾಲೀಕರು ತಮ್ಮ ನಗರಗಳಲ್ಲಿ ಸಾಕುಪ್ರಾಣಿ-ಸ್ನೇಹಿ ಉದ್ಯಾನ ಮತ್ತು ಬಯಲುಗಳಿಲ್ಲ. ಒಂದೊಮ್ಮೆ ಪಾರ್ಕುಗಳಿದ್ದರೂ ಅಲ್ಲಿ ಸಾಕು ಪ್ರಾಣಿಗಳಿಗೆ ಅವಕಾಶವಿಲ್ಲ ಎಂದು ಅಭಿಪ್ರಾಯಪಟ್ಟಿದ್ದಾರೆ. ಹಾಗೆಯೇ ಅಪಾರ್ಟ್‌ಮೆಂಟ್‌ಗಳಲ್ಲಿ ಬಾಡಿಗೆ ಇರುವವರು ಕೂಡ ಸಾಕು ಪ್ರಾಣಿಗಳ ವಿಷಯದಲ್ಲಿ ತೊಂದರೆ ಅನುಭವಿಸುತ್ತಿದ್ದಾರೆ ಎಂಬ ಸಂಗತಿ ಸಮೀಕ್ಷೆಯಿಂದ ಗೊತ್ತಾಗಿದೆ. ತಮ್ಮ ನೆರೆಹೊರೆಯವರು ನಾಯಿ ಸಾಕುವುದನ್ನು ಸಹಿಸಿಕೊಳ್ಳುವುದಿಲ್ಲ ಎಂದು ಶೇ.30ರಷ್ಟು ಮಾಲೀಕರು ಹೇಳಿದ್ದಾರೆ.