ಭಾರತ್ ಬಂದ್ 2020: ಬುಧವಾರ ಕರ್ನಾಟಕದಲ್ಲಿ ಶಾಲಾ-ಕಾಲೇಜುಗಳಿಗೆ ರಜೆಯಿಲ್ಲ

ಬೆಂಗಳೂರು: ಕಾರ್ಮಿಕ ಸಂಘಟನೆಗಳು ಜನವರಿ 8 ಬುಧವಾರ ದೇಶಾದ್ಯಂತ ಮುಷ್ಕರಕ್ಕೆ ಕರೆ ನೀಡಿದ್ದು, ಭಾರತ್ ಬಂದ್‌ ಎಂದು ಬಿಂಬಿತಗೊಂಡಿರುವ ಹಿನ್ನೆಲೆ ಶಾಲಾ ಕಾಲೇಜುಗಳಿಗೆ ರಜೆ ಇದೆಯೋ ಇಲ್ಲವೋ ಎಂಬ ಗೊಂದಲ ಸೃಷ್ಟಿಯಾಗಿದೆ. ಭಾರತ್‌ ಬಂದ್‌ ಅಲ್ಲ, ಮುಷ್ಕರ ಮಾತ್ರ ಎಂದು ಕಾರ್ಮಿಕ ಸಂಘಟನೆಗಳು ಸ್ಪಷ್ಟ ಪಡಿಸಿವೆ. ಬಸ್‌, ಆಟೊ, ಟ್ಯಾಕ್ಸಿ, ಸರಕು ಸಾಗಣೆ ಸೇವೆಯಲ್ಲಿ ಯಾವುದೇ ವ್ಯತ್ಯಯ ಉಂಟಾಗುವುದಿಲ್ಲ. ಶಾಲೆ, ಕಾಲೇಜು, ಸರಕಾರಿ ಕಚೇರಿಗಳು ಕೂಡಾ ಎಂದಿನಂತೆಯೇ ಕಾರ್ಯ ನಿರ್ವಹಿಸುತ್ತವೆ. ಕೊನೆಯ ಕ್ಷಣಗಳಲ್ಲಿ ಪರಿಸ್ಥಿತಿಗೆ ಅನುಗುಣವಾಗಿ ಶಾಲೆಗಳಿಗೆ ರಜೆ ನೀಡುವ ಕುರಿತು ಆಯಾ ಜಿಲ್ಲಾಧಿಕಾರಿಗಳು ನಿರ್ಧರಿಸಲಿದ್ದಾರೆ.

ರಾಜ್ಯ ಬಿಜೆಪಿ ಸರ್ಕಾರ ಬಂದ್‌ ಹಿನ್ನೆಲೆಯಲ್ಲಿ ರಾಜ್ಯದಲ್ಲಿರುವ ಸರ್ಕಾರಿ ಶಾಲಾ-ಕಾಲೇಜುಗಳಿಗೆ ಈವರೆಗೆ ರಜೆ ಘೋಷಣೆ ಮಾಡಿಲ್ಲ. ಬಿಎಂಟಿಸಿ ಹಾಗೂ ಕೆಎಸ್‌ಆರ್‌ಟಿಸಿ ಬಸ್‌ಗಳ ಸಂಚಾರದ ಮೇಲೆ ಶಾಲಾ-ಕಾಲೇಜುಗಳಿಗೆ ರಜೆ ನಿರ್ಧಾರವಾಗಲಿದೆ. ಏಕೆಂದರೆ ಬಸ್‌ಗಳ ಸಂಚಾರ ಸ್ಥಗಿತವಾದ್ರೆ, ವಿದ್ಯಾರ್ಥಿಗಳು ಶಾಲಾ-ಕಾಲೇಜುಗಳಿಗೆ ಆಗಮಿಸಲು ತೊಂದರೆಯಾಗಲಿದೆ.

ಬಿಎಂಟಿಸಿ ಹಾಗೂ ಕೆಎಸ್‌ಆರ್‌ಟಿಸಿ ನೌಕರ ಸಂಘಟನೆಗಳು ಈವರೆಗೂ ಬಂದ್‌ಗೆ ಬೆಂಬಲ ಘೋಷಿಸಿಲ್ಲ. ಹೀಗಾಗಿ ಬಸ್‌ಗಳ ಸುಗಮ ಸಂಚಾರವಿದ್ದರೆ ಶಾಲಾ-ಕಾಲೇಜುಗಳೂ ತೆರೆದಿರುತ್ತವೆ.

ನಾಳೆ ಬಂದ್‌ ಇಲ್ಲ, ಮುಷ್ಕರ ಮಾತ್ರ: ಶಾಲಾ, ಕಾಲೇಜು, ಸರಕಾರಿ ಕಚೇರಿಗಳೂ ಓಪನ್‌

ಕೆಲವು ಶಿಕ್ಷಕ ಸಂಘಟನೆಗಳು ಬಂದ್‌ಗೆ ಬೆಂಬಲ ನೀಡಿವೆ ಎನ್ನಲಾಗಿದ್ದು, ಸರ್ಕಾರಿ ಶಾಲಾ-ಕಾಲೇಜುಗಳಿಗೆ ಬಂದ್‌ನ ಬಿಸಿ ತಟ್ಟಬಹುದು. ಆದ್ರೆ, ಖಾಸಗಿ ಶಾಲಾ-ಕಾಲೇಜುಗಳಿಗೆ ಬಂದ್‌ ಬಿಸಿ ತಟ್ಟೋದಿಲ್ಲ. ಒಂದು ವೇಳೆ, ಜನವರಿ 8ರಂದು ಬುಧವಾರ ಬೆಳಗ್ಗೆ ಬಂದ್ ಆರಂಭದ ಜೊತೆಯಲ್ಲೇ ಬಸ್‌ಗಳಿಗೆ ಕಲ್ಲೇಟು ಬಿದ್ದ ಪ್ರಕರಣಗಳು ವರದಿಯಾದ್ರೆ, ಸುರಕ್ಷತಾ ದೃಷ್ಟಿಯಿಂದ ಕೆಲಕಾಲ ಬಸ್‌ಗಳ ಸಂಚಾರವನ್ನು ಸಾರಿಗೆ ಇಲಾಖೆ ತಡೆಹಿಡಿಯುತ್ತದೆ. ಬಂದ್ ವೇಳೆ ಅನುಸರಿಸುವ ಈ ಪರಿಪಾಠ, ಈ ಬಾರಿಯೂ ಮುಂದುವರೆದರೆ ಕೆಲಕಾಲ ಶಾಲಾ-ಕಾಲೇಜು ವಿದ್ಯಾರ್ಥಿಗಳಿಗೆ ತೊಂದರೆ ಆಗಬಹುದು.

ಬಸ್‌ ಸಂಚಾರ, ಪ್ರತಿಭಟನೆಗಳ ಸ್ಥಿತಿಗತಿ ಹಾಗೂ ಜಿಲ್ಲಾವಾರು ಪರಿಸ್ಥಿತಿಯನ್ನು ನೋಡಿಕೊಂಡು ಆಯಾ ಜಿಲ್ಲೆಗಳ ಕ್ಷೇತ್ರ ಶಿಕ್ಷಣಾಧಿಕಾರಿಗಳು ರಜೆ ನೀಡಬೇಕೇ ಬೇಡವೇ ಅನ್ನೋದನ್ನು ನಿರ್ಧರಿಸಲಿದ್ದಾರೆ. ಹೀಗಾಗಿ, ಬಂದ್‌ ದಿನವೇ ಕೊನೇ ಕ್ಷಣದ ಬೆಳವಣಿಗೆಗಳನ್ನು ನೋಡಿಕೊಂಡು ಶಾಲಾ-ಕಾಲೇಜುಗಳ ರಜೆ ನಿರ್ಧಾರವಾಗಲಿದೆ.

ಭಾರತ್‌ ಬಂದ್ 2020: ಬುಧವಾರದ ಬಂದ್‌ ಬಗ್ಗೆ ಇಲ್ಲಿದೆ A To Z ಮಾಹಿತಿ..!