Gauri Lankesh: ಕಣ್ಣೀರಿಟ್ಟ ಭರತ್‌ ಕುರ್ಣೆ ತಾಯಿ, ಪತ್ನಿ

ಬೆಳಗಾವಿ: ''ಗೌರಿ ಲಂಕೇಶ್‌ ಹತ್ಯೆ ಪ್ರಕರಣಕ್ಕೂ ನನ್ನ ಮಗನಿಗೂ ಯಾವುದೇ ಸಂಬಂಧ ಇಲ್ಲ. ವಿಶೇಷ ತನಿಖಾ ದಳ (ಎಸ್‌ಐಟಿ)ದ ಅಧಿಕಾರಿಗಳು ಯಾವುದೇ ಸಾಕ್ಷ್ಯಾಧಾರಗಳಿಲ್ಲದೇ ಅವನನ್ನು ಬಂಧಿಸಿದ್ದಾರೆ'' ಎಂದು ಭರತ್‌ ಕುರ್ಣೆ ತಾಯಿ ರೇಖಾ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ನಗರದಲ್ಲಿ ಹಿಂದೂ ಜನಜಾಗೃತಿ ಸಮಿತಿ ಗುರುವಾರ ಆಯೋಜಿಸಿದ್ದ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ''ಹಿಂದೂ ಸಂಘಟನೆಯ ಕಾರ್ಯಕರ್ತ ಎಂಬ ಕಾರಣಕ್ಕೆ ನನ್ನ ಮಗನನ್ನು ಬಂಧಿಸಿದ್ದಾರೆ. ಭರತ್‌ ಓದಿದ್ದು ಹತ್ತನೇ ತರಗತಿ ಮಾತ್ರ. ಗೌರಿ ಲಂಕೇಶ್‌ ಸೇರಿದಂತೆ ವಿಚಾರವಾದಿಗಳು ಯಾರು ಎಂಬುದೂ ಗೊತ್ತಿಲ್ಲ. ಆದರೆ, ತನಿಖಾ ಅಧಿಕಾರಿಗಳು ಹೆದರಿಸಿ - ಬೆದರಿಸಿ ಅವನನ್ನು ಕರೆದುಕೊಂಡು ಹೋಗಿದ್ದು, ಇನ್ನೂ ವಾಪಸ್‌ ಕಳಿಸಿಲ್ಲ. ಈ ಬಗ್ಗೆ ವಿಚಾರಿಸಿದರೆ ಪೊಲೀಸರು ಯಾವುದೇ ಮಾಹಿತಿ ನೀಡುತ್ತಿಲ್ಲ. ನನ್ನ ಮಗ ಅಮಾಯಕ. ಯಾವುದೇ ತಪ್ಪು ಮಾಡಿಲ್ಲ'' ಎಂದು ಅವರು ಅಭಿಪ್ರಾಯಪಟ್ಟರು.

ಕಣ್ಣೀರಿಟ್ಟ ಪತ್ನಿ

ಭರತ್‌ ಕುರ್ಣೆ ಪತ್ನಿ ಗಾಯತ್ರಿ ಮಾತನಾಡಿ ''ನನ್ನ ಪತಿ ಶಿವಪ್ರತಿಷ್ಠಾನ ಸಂಘಟನೆಯಲ್ಲಿದ್ದರು. ಕ್ಷತ್ರಿಯ ಮರಾಠಾ ಸಮುದಾಯದವರಾದ ನಮ್ಮಲ್ಲಿ ಸಹಜವಾಗಿ ಹಿಂದುತ್ವದ ಬಗ್ಗೆ ಅಭಿಮಾನವಿದೆ. ಆದರೆ, ಹಿಂದೂ ಎಂಬ ಕಾರಣಕ್ಕೆ ನನ್ನ ಪತಿಯನ್ನು ಪೊಲೀಸರು ಬಂಧಿಸಿದ್ದಾರೆ. ಅನಾರೋಗ್ಯದಿಂದ ಅಜೀರ್ಣ ಸಮಸ್ಯೆಯಿಂದ ಬಳಲುತ್ತಿದ್ದ ಪತಿ ಕಳೆದ ವರ್ಷ ಆ.25ರಂದು ನಗರದ ಖಾಸಗಿ ಆಸ್ಪತ್ರೆಗೆ ದಾಖಲಾಗಿದ್ದರು. ಆನಂತರ ವಿಶ್ರಾಂತಿ ಪಡೆಯುತ್ತಿದ್ದರು. ಅವರ ಆರೋಗ್ಯ ಸರಿ ಇಲ್ಲ '', ಎಂದು ಕಣ್ಣೀರಿಟ್ಟರು.