ಸೇನಾ ಪೊಲೀಸರಿಂದ ಕಾರ್ಗಿಲ್‌ಗೆ ಬೈಕ್‌ ರೈಡ್‌: ವಿಜಯ ದಿವಸ್‌ ಆಚರಣೆ

ಬೆಂಗಳೂರು: ಕಾರ್ಗಿಲ್‌ ವಿಜಯ ದಿನದ ಸ್ಮರಣಾರ್ಥ, ಬೆಂಗಳೂರು ಮಿಲಿಟರಿ ಪೊಲೀಸ್‌ ವಿಭಾಗದ ಅಶ್ವ ಮೋಟರ್‌ ಸೈಕಲ್‌ ತಂಡ ಬೆಂಗಳೂರಿನಿಂದ ಕಾರ್ಗಿಲ್‌ ವರೆಗೆ ಬೈಕ್‌ ರೈಡ್‌ ಆರಂಭದೆ.

ಲೆಫ್ಟಿನೆಂಟ್‌ ಕರ್ನಲ್‌ ವಿಕ್ರಂ ರಾಜೆಭೋಸ್ಲೆ ನೇತೃತ್ವದ 5 ಜನರ ತಂಡ ಜು. 24ರಂದು ಕಾರ್ಗಿಲ್‌ ತಲುಪಲಿದೆ. ಈ ಸಾಹಸಕ್ಕಾಗಿ ನೂತನವಾಗಿ ಮಾರುಕಟ್ಟೆಗೆ ಬಿಡುಗಡೆಗೊಂಡಿರುವ ಟಿವಿಎಸ್‌ ಅಪಾಚೆ 200 ಬೈಕ್‌ ಅನ್ನು ಆಯ್ಕೆ ಮಾಡಿಕೊಳ್ಳಲಾಗಿದೆ.

8 ರಾಜ್ಯಗಳ ಮೂಲಕ ಕಾರ್ಗಿಲ್‌ ತಲುಪಲಿರುವ ತಂಡ, ಒಟ್ಟಾರೆ 3250 ಕಿ.ಮೀಗಳನ್ನು 20 ದಿನದಲ್ಲಿ ಕ್ರಮಿಸಲು ಮುಂದಾಗಿದೆ. ಬೆಳಗಾವಿ, ಪುಣೆ, ಮುಂಬಯಿ, ವಡೋದರ, ಉದಯ್‌ಪುರ, ನಸಿರಾಬಾದ್‌, ಹೊಸದಿಲ್ಲಿ, ಚಂಡೀಗಢ, ಮನಾಲಿ, ಸರ್ಚು ಹಾಗೂ ಲೇಹ್‌ ಮಾರ್ಗದಲ್ಲಿ ಸಂಚರಿಸಲಾಗುತ್ತದೆ ಎಂದು ಅಧಿಕಾರಿಗಳು ಹೇಳಿದ್ದಾರೆ.

ಕಾರ್ಗಿಲ್‌ ಯುದ್ಧದಲ್ಲಿ ಮಡಿದ ವೀರ ಯೋಧರಿಗೆ ನಮನ ಸಲ್ಲಿಸುವುದು ಹಾಗೂ ಯುವ ಸಮುದಾಯದಲ್ಲಿ ಸೈನ್ಯ ಸೇರಲು ಉತ್ತೇಜಿಸುವ ಉದ್ಧೇಶದಿಂದ ಈ ಕಾರ್ಯಕ್ರಮ ಆಯೋಜಿಸಲಾಗಿದೆ ಎಂದು ರಕ್ಷಣಾ ಇಲಾಖೆ ಸಾರ್ವಜನಿಕ ಸಂಪರ್ಕ ಇಲಾಖೆ ಹೇಳಿದೆ.