ದಿಲ್ಲಿಯಲ್ಲೇ 4 ದಿನ ಬಿಜೆಪಿ ಶಾಸಕರ ಠಿಕಾಣಿ: ಜ.13, 14 ರಂದು ವಿಶೇಷ ಸಭೆ

ಬೆಂಗಳೂರು : ದಿಲ್ಲಿಯಲ್ಲಿ ಶುಕ್ರವಾರದಿಂದ ಆರಂಭವಾಗಿರುವ ಬಿಜೆಪಿ ರಾಷ್ಟ್ರೀಯ ಪರಿಷತ್‌ ಸಭೆಯಲ್ಲಿ ಭಾಗವಹಿಸಲು ತೆರಳಿರುವ ರಾಜ್ಯ ಬಿಜೆಪಿ ಶಾಸಕರು, ಸಂಸದರು, ಮೇಲ್ಮನೆ ಸದಸ್ಯರು ಸೇರಿದಂತೆ 600 ಮಂದಿ ಜ.14 ರ ತನಕ ದಿಲ್ಲಿಯಲ್ಲಿಯೇ ಠಿಕಾಣಿ ಹೂಡಲಿದ್ದಾರೆ.

ಶುಕ್ರವಾರ ಹಾಗೂ ಶನಿವಾರ ರಾಷ್ಟ್ರೀಯ ಪರಿಷತ್‌ ಸಭೆ ನಡೆದರೆ ಭಾನುವಾರ ಹಾಗೂ ಸೋಮವಾರ ವಿಶೇಷ ಸಭೆ ನಡೆಯಲಿದೆ. ಈ ಸಭೆಗೆ ಮೊದಲ ದಿನ ಪ್ರಧಾನಿ ನರೇಂದ್ರ ಮೋದಿ ಅವರು ಆಗಮಿಸಲಿದ್ದು 2ನೇ ದಿನ ರಾಷ್ಟ್ರೀಯ ಅಧ್ಯಕ್ಷ ಅಮಿತ್‌ ಶಾ ಭಾಗವಹಿಸುತ್ತಿದ್ದಾರೆ.

ಹೀಗಾಗಿ ರಾಜ್ಯದಿಂದ ತೆರಳಿರುವ ಬಿಜೆಪಿಯ ಎಲ್ಲಾ ಮುಖಂಡರು ಸೋಮವಾರದ ತನಕ ದಿಲ್ಲಿಯಲ್ಲಿಯೇ ವಾಸ್ತವ್ಯ ಹೂಡಲಿದ್ದಾರೆ. ಈ ಮಧ್ಯೆ ರಾಜ್ಯದಿಂದ ತೆರಳಿರುವ ಮುಖಂಡರಿಗೆ ವಾಸ್ತವ್ಯ ಸಮಸ್ಯೆ ಉಂಟಾಗಿದ್ದು ವಿಶೇಷ ಸಭೆಯನ್ನು 2 ದಿನಗಳ ಬದಲಿಗೆ ಒಂದು ದಿನಕ್ಕೆ ಸೀಮಿತಗೊಳಿಸಬೇಕೆಂಬ ಚಿಂತನೆಯೂ ಇದೆ. ಒಂದು ವೇಳೆ ಆ ರೀತಿಯಾದರೆ ಭಾನುವಾರ ರಾತ್ರಿಯೇ ಎಲ್ಲರೂ ವಾಪಸಾಗಲಿದ್ದಾರೆ, ಇಲ್ಲದಿದ್ದರೆ ಸೋಮವಾರ ರಾತ್ರಿ ಹಿಂದಿರುಗುವರು ಎಂದು ಉನ್ನತ ಮೂಲಗಳು ತಿಳಿಸಿವೆ.

ಪಕ್ಷದ ಎಲ್ಲಾ ನಾಯಕರು ದಿಲ್ಲಿಯಲ್ಲಿಯೇ ಇರುವುದರಿಂದ ರಾಜ್ಯ ರಾಜಕೀಯ ವಿದ್ಯಮಾನಗಳ ಬಗ್ಗೆಯೂ ಸಮಾಲೋಚನೆ ನಡೆಯುವ ಸಾಧ್ಯತೆಗಳಿವೆ ಎನ್ನಲಾಗುತ್ತಿದೆ.