ಟಿಪ್ಪು ಜಯಂತಿ ಆಚರಿಸಿದ ಸರಕಾರಕ್ಕೆ ಹಂಪಿ ಉತ್ಸವ ಮಾಡಲು ಮಾತ್ರ 'ಬರ': ಬಿಜೆಪಿ ಟೀಕೆ

ಬೆಂಗಳೂರು: ರಾಜ್ಯದ 100 ತಾಲೂಕುಗಳಲ್ಲಿ ಬರ ಇರುವುದರಿಂದ ಈ ವರ್ಷ ಹಂಪಿ ಉತ್ಸವ ಆಚರಿಸದೇ ಇರಲು ರಾಜ್ಯ ಸರಕಾರ ನಿರ್ಧರಿಸಿದೆ. ಈ ಹಿನ್ನೆಲೆ ಬಿಜೆಪಿ ಕರ್ನಾಟಕ ಟ್ವೀಟ್ ಮೂಲಕ ರಾಜ್ಯ ಸರಕಾರವನ್ನು ತರಾಟೆಗೆ ತೆಗೆದುಕೊಂಡಿದೆ.

ಟಿಪ್ಪು ಜಯಂತಿ ಮಾಡಲು ಮಾತ್ರ ರಾಜ್ಯ ಸರಕಾರದ ಬಳಿ ಹಣ ಇತ್ತು ಹಾಗೂ ಎಲ್ಲ ಕಾರಣಗಳು ಇತ್ತು. ಆದರೆ, ಹುಸಿ ಜಾತ್ಯಾತೀತ ಸರಕಾರಕ್ಕೆ
ಹಂಪಿ ಉತ್ಸವ ನಡೆಸಲು ಮಾತ್ರ ಬರ ಇದೆ ಎಂಬ ಕಾರಣ ನೀಡುತ್ತದೆ ಎಂದು ಬಿಜೆಪಿ ಕರ್ನಾಟಕ ಟ್ವೀಟ್ ಮಾಡಿದೆ.

ಅಲ್ಲದೆ, ಪರ್ಶಿಯನ್ ಭಾಷೆಯನ್ನು ಜನರಿಗೆ ಹೇರಿದ್ದ ಹಾಗೂ ಮತಾಂಧ ಟಿಪ್ಪು ಕರ್ನಾಟಕದ ಹೆಮ್ಮೆ ಎಂದು ರಾಜ್ಯ ಸರಕಾರಕ್ಕೆ ಅನಿಸುತ್ತದೆ. ಆದರೆ, ವಿಜಯನಗರ ಸಾಮ್ರಾಜ್ಯದ ಸುವರ್ಣ ಯುಗವನ್ನು ಆಚರಣೆ ಮಾಡುವುದು ಮಾತ್ರ ಕುಮಾರಸ್ವಾಮಿ ಸರಕಾರಕ್ಕೆ ಹೊರೆ ಎನಿಸುತ್ತದೆ ಎಂದೂ ಕರ್ನಾಟಕ ಸರಕಾರವನ್ನು ಬಿಜೆಪಿ ಕರ್ನಾಟಕ ಟ್ವಿಟ್ಟರ್ ಅಕೌಂಟ್ ಟ್ವೀಟ್ ಮೂಲಕ ತರಾಟೆ ತೆಗೆದುಕೊಂಡಿದೆ.


ಬಿಜೆಪಿಯ ಟ್ವೀಟ್‌ಗೆ ಹಲವರು ಮೆಚ್ಚುಗೆ ವ್ಯಕ್ತಪಡಿಸಿದ್ದು, ಇನ್ನು ಹಲವರು ರೀಟ್ವೀಟ್ ಮಾಡಿಕೊಂಡಿದ್ದಾರೆ. ಅಲ್ಲದೆ, ಕಾಂಗ್ರೆಸ್ - ಜೆಡಿಎಸ್ ಸಮ್ಮಿಶ್ರ ಸರಕಾರದ ಈ ದ್ವಂದ್ವ ನೀತಿಯನ್ನು ಜನ ಸಹ ಟೀಕೆ ಮಾಡಿದ್ದಾರೆ.

ಇನ್ನೊಂದೆಡೆ, ರಾಜ್ಯ ಸರಕಾರದ ನಿರ್ಧಾರವನ್ನು ತರಾಟೆಗೆ ತೆಗೆದುಕೊಂಡ ಶ್ರೀರಾಮುಲು, ''ಬರ ಸಂದರ್ಭದಲ್ಲಿ ಯಾವುದೇ ಉತ್ಸವ ನಡೆಸುವುದಿಲ್ಲ ಎಂದು ಸರಕಾರ ತೀರ್ಮಾನಿಸಿದ್ದರೆ ನಾನು ಸ್ವಾಗತಿಸುತ್ತೇನೆ. ಆದರೆ ಬಳ್ಳಾರಿಯ 8 ತಾಲೂಕುಗಳನ್ನು ಬರಪೀಡಿತ ಎಂದು ಘೋಷಿಸಿದ ಬಳಿಕ ಬಳ್ಳಾರಿಯಲ್ಲಿ ಕೋಟ್ಯಂತರ ರೂ. ಖರ್ಚು ಮಾಡಿ ಸರಕಾರ ಕೃತಜ್ಞತಾ ಸಮಾವೇಶ ನಡೆಸಿದ್ದೇಕೆ,'' ಎಂದು ಪ್ರಶ್ನಿಸಿದ್ದಾರೆ.