ಶಾಸಕರ ಖರೀದಿಗೆ ಬಿಜೆಪಿ 1000 ಕೋಟಿ ರೂ. ಖರ್ಚು ಮಾಡುತ್ತಿದೆ: ಜೆಡಿಎಸ್‌ ಬಾಂಬ್

ಬೆಂಗಳೂರು: ರಾಜ್ಯ ರಾಜಕೀಯದಲ್ಲಿ ಕ್ಷಿಪ್ರ ಬೆಳವಣಿಗೆ ನಡೆಯುತ್ತಿದ್ದು, ಸಮ್ಮಿಶ್ರ ಸರಕಾರದ 14 ಶಾಸಕರು ರಾಜೀನಾಮೆ ಸಲ್ಲಿಸಿದ್ದಾರೆ. ಅಲ್ಲದೆ, ಪಕ್ಷೇತರರಾಗಿದ್ದ ಇಬ್ಬರು ಶಾಸಕರು ಸಹ ಬಿಜೆಪಿಗೆ ಬೆಂಬಲ ನೀಡುವುದಾಗಿ ಹೇಳಿ ಮುಂಬೈಗೆ ತೆರಳಿದ್ದಾರೆ. ಈ ಹಿನ್ನೆಲೆ ಬಿಜೆಪಿ ವಿರುದ್ಧ ಜೆಡಿಎಸ್‌ ಗಂಭೀರ ಆರೋಪವನ್ನು ಮಾಡಿದೆ.

ಕರ್ನಾಟಕದಲ್ಲಿ ಶಾಸಕರ ಖರೀದಿಗೆ ಬಿಜೆಪಿ ಸಾವಿರ ಕೋಟಿ ರೂ. ಯನ್ನು ಖರ್ಚು ಮಾಡುತ್ತಿದೆ ಎಂದು ಜೆಡಿಎಸ್‌ ಗಂಭೀರವಾಗಿ ಆರೋಪಿಸಿದೆ. ಖಾಸಗಿ ವಿದ್ಯುನ್ಮಾನ ಮಾಧ್ಯಮವೊಂದರಲ್ಲಿ ಈ ಸಂಬಂಧ ಸುದ್ದಿ ಪ್ರಸಾರವಾಗುತ್ತಿದ್ದು, ಇದನ್ನು ಆಧರಿಸಿ ಜೆಡಿಎಸ್‌ ಅಧಿಕೃತ ಟ್ವಿಟರ್ ಖಾತೆಯಲ್ಲಿ ಈ ಸಂಬಂಧ ಟ್ವೀಟ್‌ ಮಾಡಲಾಗಿದೆ.


''ಕರ್ನಾಟಕದಲ್ಲಿ ಶಾಸಕರ ಖರೀದಿಗೆ ಬಿಜೆಪಿ ಸಾವಿರ ಕೋಟಿ ರೂ. ಯನ್ನು ಖರ್ಚು ಮಾಡುತ್ತಿದೆ. ಹೌದು, ನೀವು ಓದಿರುವುದು ಸರಿಯಾಗಿದೆ. ಸಾವಿರ ಕೋಟಿ ರೂ. ಯಷ್ಟೇ'' ಎಂದು ಟ್ವೀಟ್‌ ಮೂಲಕ ಜೆಡಿಎಸ್‌ ವ್ಯಂಗ್ಯವಾಡಿದೆ.

ಇದು ಮಿಜೋರಾಂ, ಮಣಿಪುರ ಹಾಗೂ ಸಿಕ್ಕಿಂ ರಾಜ್ಯಗಳ ವಾರ್ಷಿಕ ಬಜೆಟ್‌ನ ಶೇ. 10ರಷ್ಟು ಹಣ ಎಂದೂ ಜೆಡಿಎಸ್‌ ಟ್ವೀಟ್‌ ಮಾಡಿದೆ. ಅಲ್ಲದೆ, ಮೋದಿ ಹಾಗೂ ಶಾ ಗೆ ಈ ಹಣ ಎಲ್ಲಿಂದ ಬಂತು? ಭ್ರಷ್ಟಾಚಾರ ರಹಿತ ಆಡಳಿತ ಅನ್ನೋದು ಕೇವಲ ಪುಸ್ತಕಗಳಲ್ಲಿ ಇದೆ. ಆದರೆ, ವಾಸ್ತವ ಸ್ಥಿತಿ ಹೀಗಿದೆ ನೋಡಿಉ ಎಂದು ಜೆಡಿಎಸ್‌ ಅಧಿಕೃತ ಟ್ವಿಟರ್‌ ಖಾತೆಯಲ್ಲಿ ಪ್ರಧಾನಿ ಮೋದಿ, ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷ ಹಾಗೂ ಕೇಂದ್ರ ಗೃಹ ಸಚಿವ ಅಮಿತ್‌ ಶಾ ವಿರುದ್ಧ ಜೆಡಿಎಸ್‌ ಆರೋಪ ಮಾಡಿದೆ.