ವಿಧಾನಸಭೆ ಮೊಗಸಾಲೆಯಲ್ಲಿ ಬಿಜೆಪಿ ಧರಣಿ

ಬೆಂಗಳೂರು : ವಿಶ್ವಾಸಮತ ಯಾಚನೆ ಪ್ರಕ್ರಿಯೆಯನ್ನು ಪೂರ್ಣಗೊಳಿಸದೆ ಸದನವನ್ನು ಮುಂದೂಡುವ ಹಿಂದೆ ಆಡಳಿತ ಪಕ್ಷದ ಕೈವಾಡವಿದೆ ಎಂದು ಆರೋಪಿಸಿ ಬಿಜೆಪಿ ಸದಸ್ಯರು ವಿಧಾನಸಭೆ ಮೊಗಸಾಲೆಯಲ್ಲೇ ಗುರುವಾರ ರಾತ್ರಿ ಧರಣಿ ನಡೆಸಿದರು.

ಪ್ರತಿಪಕ್ಷ ನಾಯಕ ಯಡಿಯೂರಪ್ಪ, ಉಪನಾಯಕ ಆರ್‌.ಅಶೋಕ್‌ ಸಹಿತ ಪಕ್ಷದ ಎಲ್ಲ ಶಾಸಕರು ಅಹೋರಾತ್ರಿ ಧರಣಿಯಲ್ಲಿ ಪಾಲ್ಗೊಂಡರು. ವಿಧಾನಸಭೆ ಸಚಿವಾಲಯವು ಶಾಸಕರಿಗೆ ರಾತ್ರಿ ಊಟ ಸರಬರಾಜು ಮಾಡಿತು. ಸ್ಪೀಕರ್‌ ಸೂಚನೆಯಂತೆ ಮಲಗಲು ದಿಂಬು, ಬೆಡ್‌ಶೀಟ್‌ನ್ನು ಒದಗಿಸಿಕೊಡಲಾಯಿತು.

ಊಟದ ಬಳಿಕ ವಿಶ್ವಾಸಮತ ಯಾಚನೆ ಕುರಿತು ಹಿರಿಯ ಶಾಸಕರಿಂದ ಚಿಂತನ-ಮಂಥನವೂ ನಡೆಯಿತು. ಶುಕ್ರವಾರ ಸಮ್ಮಿಶ್ರ ಸರಕಾರ ಪತನಗೊಂಡು ಒಂದೆರಡು ದಿನಗಳಲ್ಲಿ ಹೊಸ ಸರಕಾರ ರಚನೆ ಕುರಿತು ಬಿಸಿ ಬಿಸಿ ಚರ್ಚೆ ನಡೆದು ಮಧ್ಯರಾತ್ರಿ ಬಳಿಕ ಶಾಸಕರು ನಿದ್ರೆಗೆ ಜಾರಿದರು.

ಶಾಸಕರ ಜತೆ ಸಚಿವಾಲಯದಲ್ಲಿರುವ ವೈದ್ಯ ಸಿಬ್ಬಂದಿ ಹಾಗೂ ಲೋಕೋಪಯೋಗಿ ಇಲಾಖೆಯ ಅಧಿಕಾರಿಗಳು ಹಾಜರಿದ್ದರು.