ಸಂಧಾನವೋ? ಸಂಗ್ರಾಮವೋ?
ಸಂಪುಟ ವಿಸ್ತರಣೆಗೆ ಅನುಮತಿ ಸಿಗದೆ ಇರುವುದರಿಂದ ಸಿಎಂ ಬಿಎಸ್‌ವೈ ಗರಂ ಆಗಿರುವುದಂತೂ ನಿಜ. ಇದೇ ಕಾರಣದಿಂದ ಅವರು ನಿಗಮ ಮಂಡಳಿ ನೇಮಕ ಕೈಗೊಂಡಿದ್ದಾರೆ. ಜತೆಗೆ ವೀರಶೈವ ಲಿಂಗಾಯತರನ್ನು ಕೇಂದ್ರದ ಒಬಿಸಿ ಪಟ್ಟಿಗೆ ಸೇರಿಸಲು ಶಿಫಾರಸು ಮಾಡಲು ಮುಂದಾಗುವ ಮೂಲಕ ಹೈಕಮಾಂಡ್‌ಗೆ ಸಂದೇಶ ರವಾನಿಸಿದ್ದಾರೆ. ಹಾಗಾಗಿ ಕೇಂದ್ರ ಗೃಹ ಸಚಿವ ಅಮಿತ್‌ ಶಾ ಅವರೇ ಆತುರದಲ್ಲಿಇಂತಹ ಶಿಫಾರಸು ಮಾಡದಂತೆ ಸೂಚಿಸಿದ್ದಾರೆ. ಅಮಿತ್‌ ಶಾ ನಿರ್ದೇಶನವನ್ನು ಬಿಎಸ್‌ವೈ ಪಾಲಿಸಿದ್ದಾರಾದರೂ ಹೈಕಮಾಂಡ್‌ಗೆ ತಲೆಬಾಗಿದ್ದಾರೆ ಎಂದು ಅರ್ಥವಲ್ಲ. ಈ ಬೆಳವಣಿಗೆ ಬಳಿಕ ಬಿಎಸ್‌ವೈ ಮತ್ತು ಹೈಕಮಾಂಡ್‌ ನಡುವೆ ಯಾವುದೇ ಮಾತುಕತೆ ನಡೆದಿಲ್ಲ. ದಿಲ್ಲಿಗೆ ತೆರಳಿ ಸಮಾಲೋಚಿಸುವ ಯೋಚನೆಯಲ್ಲಿ ಸಿಎಂ ಇಲ್ಲ. ವರಿಷ್ಠರೂ ಬಿಗುಮಾನದಿಂದಲೇ ಇದ್ದಾರೆ. ಈ ಪರಿಸ್ಥಿತಿ ತಿಳಿಗೊಳಿಸಲು ಅರುಣ್‌ ಸಿಂಗ್‌ ಸಂಧಾನ ಸೂತ್ರ ರಚಿಸಿದರೆ ಸಂಪುಟ ವಿಸ್ತರಣೆ ದಾರಿ ಸುಗಮವಾಗಲಿದೆ. ಇಲ್ಲದಿದ್ದರೆ ಸಂಗ್ರಾಮದ ವಾತಾವರಣ ಸೃಷ್ಟಿಯಾಗಲೂಬಹುದು ಎನ್ನಲಾಗುತ್ತಿದೆ. ಅರುಣ್‌ ಸಿಂಗ್‌ ಸಮ್ಮುಖದಲ್ಲೆ ಬೆಳಗಾವಿಯಲ್ಲಿ ನಡೆಯುವ ಕೋರ್‌ ಕಮಿಟಿ ಸಭೆಯಲ್ಲಿ ಸಿಎಂ ಬಿಎಸ್‌ವೈ ಹಾಗೂ ಪ್ರಮುಖರು ಭಾಗಿಯಾಗಲಿದ್ದಾರೆ. ಮುಂಬರುವ ಉಪ ಚುನಾವಣೆ, ಗ್ರಾಮ ಪಂಚಾಯಿತಿ ಚುನಾವಣೆ ಸಿದ್ಧತೆ ಕುರಿತ ಚರ್ಚೆಗೆ ಈ ಸಭೆ ಸೀಮಿತವಾಗಬಹುದು. ಇದರ ಹೊರತಾಗಿ ನಾನಾ ಮುಖಂಡರೊಂದಿಗೆ ಪ್ರತ್ಯೇಕವಾಗಿ ಮಾತುಕತೆ ನಡೆಸುವಾಗ ಸಿಂಗ್‌ ಅಭಿಪ್ರಾಯ ಸಂಗ್ರಹಿಸಲಿದ್ದಾರೆ ಎಂದು ತಿಳಿದು ಬಂದಿದೆ.
ಶಾಸಕರ ಅಭಿಪ್ರಾಯ ಸಂಗ್ರಹ?
ಕಳೆದ ಐದಾರು ತಿಂಗಳಿಂದಲೂ ಬಿಜೆಪಿ ಶಾಸಕರ ವಲಯದಲ್ಲಿ ಒಂದಷ್ಟು ಗುಪ್ತ ಚಟುವಟಿಕೆ ನಡೆಯುತ್ತಿದೆ. ಗುಂಪು ಸಭೆಗಳೂ ಆಗುತ್ತಿವೆ. ರೊಟ್ಟಿ ಊಟದ ನೆಪದಲ್ಲಿ ನಾಯಕತ್ವ ಮತ್ತು ಆಡಳಿತದ ವಿಚಾರವಾಗಿ ಚರ್ಚೆಯಾಗಿದೆ. ಕೇಂದ್ರದ ಪ್ರಭಾವಿ ಸಚಿವರೂ ಇಂತಹ ಸಭೆಯಲ್ಲಿ ಪಾಲ್ಗೊಂಡದ್ದಿದೆ. ಇಂತಹ ಸಭೆಗಳ ನಡುವೆಯೇ ನಾಯಕತ್ವದ ವಿರುದ್ಧ ಅಭಿಪ್ರಾಯ ರೂಪಿಸುವ ಕೆಲಸವೂ ನಡೆದಿತ್ತು. ಉತ್ತರ ಕರ್ನಾಟಕದ 'ಫೈರ್‌ ಬ್ರ್ಯಾಂಡ್‌' ಶಾಸಕರೊಬ್ಬರು ಇದರ ನೇತೃತ್ವ ವಹಿಸಿದ್ದಾರೆ. ಈ ಪ್ರಕ್ರಿಯೆ ಈಗ ಬಿರುಸು ಪಡೆದುಕೊಂಡಿದೆ ಎಂದು ಹೇಳಲಾಗುತ್ತಿದೆ. ಬಿಜೆಪಿ ಅಧಿಕಾರಕ್ಕೆ ಬರುವುದರಲ್ಲಿ ಉತ್ತರ ಕರ್ನಾಟಕದ ಬೆಂಬಲ ಮುಖ್ಯವಾಗಿದೆ. ಹಾಗಾಗಿ ಅಭಿಪ್ರಾಯ ಸಂಗ್ರಹ ಕಾರ್ಯದಲ್ಲೂ ಉತ್ತರ ಕರ್ನಾಟಕ ಶಾಸಕರೇ ಮುಂಚೂಣಿಯಲ್ಲಿದ್ದಾರೆ. ಅರುಣ್‌ ಸಿಂಗ್‌ ಆಗಮನದ ಹೊತ್ತಿಗೆ ಈ ಕೆಲಸ ಪೂರ್ಣಗೊಳಿಸಿ ವರದಿಯನ್ನು ಅವರ ಕೈಗೊಪ್ಪಿಸುವುದು ಈ ಶಾಸಕರ ಉದ್ದೇಶವಾಗಿದೆ ಎಂದು ತಿಳಿದು ಬಂದಿದೆ.
ಸಂಪುಟ ವಿಸ್ತರಣೆ: ಇನ್ನೆರಡು ದಿನ ಕಾದು ನೋಡಿ ಎಂದ ಬಿಎಸ್‌ವೈ
ನಾಯಕತ್ವದ ಪರ ಲಾಬಿ
ಈ ನಡುವೆ ಹಾಲಿ ನಾಯಕತ್ವದ ಪರ ಬ್ಯಾಟಿಂಗ್‌ ಮಾಡುವವರಿಗೇನೂ ಕಮ್ಮಿಯಿಲ್ಲ. ಈ ಪೈಕಿ ವಿಶೇಷವಾಗಿ ವಲಸಿಗ ಸಚಿವರು ಯಡಿಯೂರಪ್ಪ ನಾಯಕತ್ವದಲ್ಲಿ ಅಚಲ ನಿಷ್ಠೆ ಹೊಂದಿರುವುದಾಗಿ ಘೋಷಿಸುತ್ತಿದ್ದಾರೆ. ಕೆಲವು ಹಿರಿಯ ಸಚಿವರು ಹಾಗೂ ಶಾಸಕರೂ ಈ ಸಂಬಂಧ ಹೇಳಿಕೆ ನೀಡುತ್ತಿದ್ದಾರೆ. ಅರುಣ್‌ ಸಿಂಗ್‌ ಭೇಟಿ ಸಂದರ್ಭದಲ್ಲಿ ಈ ಮುಖಂಡರೂ ಅಭಿಪ್ರಾಯ ತಿಳಿಸಲು ತಯಾರಿ ಮಾಡಿಕೊಳ್ಳುತ್ತಿದ್ದಾರೆ. ಇನ್ನೊಂದೆಡೆ ಬಿಜೆಪಿ ರಾಜ್ಯಾಧ್ಯಕ್ಷ ನಳೀನ್‌ ಕುಮಾರ್‌ ಕಟೀಲ್‌, ಬಿಜೆಪಿ ಸರಕಾರ ರಚನೆಗೆ ಸಹಕಾರ ಕೊಟ್ಟ ಎಲ್ಲರಿಗೂ ಕೊಟ್ಟ ಮಾತನ್ನು ಉಳಿಸಿಕೊಂಡು ನ್ಯಾಯ ಕೊಡುತ್ತಿದ್ದೇವೆ ಎಂದಿದ್ದಾರೆ. ಹೀಗಾಗಿ ಉಸ್ತುವಾರಿ ಸಚಿವ ಭೇಟಿ ಭಾರೀ ಚರ್ಚೆಗೆ ಕಾರಣವಾಗಿದೆ.