ಚಿತ್ರಕಲಾ ಪರಿಷತ್‌ ಬಿ ಎಲ್‌ ಶಂಕರ್‌ ಅಧ್ಯಕ್ಷ

ಬೆಂಗಳೂರು: ಕರ್ನಾಟಕ ಚಿತ್ರಕಲಾ ಪರಿಷತ್ತಿಗೆ 2019-21ರ ಅವಧಿಗೆ ಅಧ್ಯಕ್ಷರಾಗಿ ಡಾ. ಬಿ.ಎಲ್‌. ಶಂಕರ್‌ ಸತತ ನಾಲ್ಕನೇ ಬಾರಿಗೆ ಅವಿರೋಧವಾಗಿ ಆಯ್ಕೆಯಾಗಿದ್ದಾರೆ.

ಪದಾಧಿಕಾರಿಗಳು ಮತ್ತು ಕಾರ್ಯಕಾರಿ ಸಮಿತಿ ಸದಸ್ಯರ ಆಯ್ಕೆಗಾಗಿ ಜೂ.16ರಂದು ಚುನಾವಣೆ ನಿಗದಿಯಾಗಿತ್ತು. ಅಧ್ಯಕ್ಷ ಹುದ್ದೆಗೆ ಶಂಕರ್‌ ಒಬ್ಬರೇ ನಾಮಪತ್ರ ಸಲ್ಲಿಸಿದ್ದರಿಂದ ಅವಿರೋಧವಾಗಿ ಆಯ್ಕೆಯಾಗಿದ್ದಾರೆ ಎಂದು ಪರಿಷತ್ತಿನ ಉಪಾಧ್ಯಕ್ಷ ಹರೀಶ ಜೆ. ಪದ್ಮನಾಭ 'ವಿಜಯ ಕರ್ನಾಟಕ'ಕ್ಕೆ ತಿಳಿಸಿದರು.

''ಖಜಾಂಚಿಯಾಗಿ ಎಂ.ಎನ್‌. ಬೆಳ್ಳಿಯಪ್ಪ , ಪ್ರಭುದೇವ ಆರಾಧ್ಯ, ಅರುಣ್‌ಕುಮಾರ್‌ ರಾಜ್‌ ಅರಸ್‌, ಟಿ.ವಿ. ತಾರಕೇಶ್ವರಿ, ಸಿ.ಎಸ್‌. ರಮಾಶರ್ಮಾ, ಬಿ.ವೈ. ವಿನೋದಾ, ಕೆ. ವಿಠಲ್‌ ಭಂಡಾರಿ, ಜಿ.ಎನ್‌. ಸತ್ಯನಾರಾಯಣ ಅವರು ಕಾರ್ಯಕಾರಿ ಸಮಿತಿ ಸದಸ್ಯರಾಗಿ ಅವಿರೋಧವಾಗಿ ಆಯ್ಕೆಯಾಗಿದ್ದಾರೆ,'' ಎಂದರು.

ಜೂ.16ರಂದು ಚುನಾವಣೆ

''ಚಿತ್ರಕಲಾ ಪರಿಷತ್‌ನ ಮೂವರು ಉಪಾಧ್ಯಕ್ಷರ ಹುದ್ದೆ, ಒಂದು ಪ್ರಧಾನ ಕಾರ್ಯದರ್ಶಿ ಹಾಗೂ ಎರಡು ಸಹಾಯಕ ಕಾರ್ಯದರ್ಶಿ ಹುದ್ದೆಗಳಿಗೆ ಜೂ.16ರಂದು ಚುನಾವಣೆ ನಡೆಯಲಿದೆ. ಅಂದು ಬೆಳಗ್ಗೆ 10 ರಿಂದ ಮಧ್ಯಾಹ್ನ 2ರವರೆಗೆ ಚಿತ್ರಕಲಾ ಪರಿಷತ್‌ ಆವರಣದಲ್ಲಿ ಚುನಾವಣೆ ನಡೆಯಲಿದೆ. 200ಕ್ಕೂ ಹೆಚ್ಚು ಮಂದಿ ಸದಸ್ಯರು ಮತ ಚಲಾಯಿಸುವರು,'' ಎಂದು ಹರೀಶ್‌ ಪದ್ಮನಾಭ ತಿಳಿಸಿದರು.