ಚಿತ್ರದುರ್ಗ: ಟಿವಿ ಚಾನಲ್‌ವೊಂದರಲ್ಲಿ ಪ್ರಸಾರವಾದ ಒಂದು ಸಾಲಿನ ಬ್ರೇಕಿಂಗ್‌ ಚುನಾವಣಾ ಸ್ಪರ್ಧಿಯ ಆಕಾಂಕ್ಷೆಗೆ ಬ್ರೇಕ್‌ ಹಾಕಬಹುದೇ?
ಹೌದು. ಶನಿವಾರ ಸಂಜೆ ಖಾಸಗಿ ಚಾನಲ್‌ ಒಂದರಲ್ಲಿ ಬೆಂಗಳೂರಿನ ರಿಯಲ್‌ ಎಸ್ಟೇಟ್‌ ಪ್ರಕರಣವೊಂದರಲ್ಲಿ ನಾಲ್ಕು ಜನ ಬಂಧಿತರಾಗಿರುವ ಸುದ್ದಿ ಬ್ರೇಕಿಂಗ್‌ನಲ್ಲಿ ಪ್ರಸಾರವಾಯಿತು. ಅದರಲ್ಲಿ ಬೆಂಗಳೂರು ಎಚ್‌ಎಸ್‌ಆರ್‌ ಲೇಔಟ್‌ನ ಕಾಂತರಾಜ್‌ ಗೌಡ ಎಂಬಾತನ ಹೆಸರೂ ಇತ್ತು.
ಅವರು'ಕಾಂತರಾಜು' ಚಿತ್ರದುರ್ಗ ಕ್ಷೇತ್ರಕ್ಕೆ ಜೆಡಿಎಸ್‌ ಆಕಾಂಕ್ಷಿ. ಜೆಡಿಎಸ್‌ನ ರಾಜ್ಯ ಪ್ರಧಾನ ಕಾರ್ಯದರ್ಶಿ ಬಿ.ಕಾಂತರಾಜ್‌ಗೆ ಶಾಕ್‌ ನೀಡಿತಲ್ಲದೇ, ಬೆಂಬಲಿಗರನ್ನು ತಳಮಳಕ್ಕೆ ತಳ್ಳಿತು. ವಾಟ್ಸಾ ಆ್ಯಪ್‌ ಗ್ರೂಪ್‌ಗಳಲ್ಲೂ ಹರಿದಾಡಿತು.
ಕೂಡಲೇ ಸುದ್ದಿಗೋಷ್ಠಿ ನಡೆಸಿ 'ನಾನವನಲ್ಲ' ಎಂದು ಸ್ಪಷ್ಟಪಡಿಸಿದರು. ಭಾನುವಾರ ಪುನಃ ಸುದ್ದಿಗೋಷ್ಠಿ ನಡೆಸಿ, ''ಚಾನಲ್‌ನ ಬ್ರೇಕಿಂಗ್‌ನ ಕ್ಲಿಪ್‌ ಎಲ್ಲೆಡೆ ಹರಿದಾಡುತ್ತಿದ್ದು, ವಿರೋಧಿಗಳು ಅಪ ಪ್ರಚಾರಕ್ಕೆ ಬಳಸುತ್ತಿದ್ದಾರೆ. ಇದರಿಂದ ನನಗೆ ನೋವಾಗಿದ್ದು, ಮನೆ ಮನೆಗೆ ಹೋಗಿ ಸ್ಪಷ್ಟೀಕರಣ ಕೊಡಲು ಆಗುವುದಿಲ್ಲ. ಆದ್ದರಿಂದ ನಾನು ಸ್ಪರ್ಧೆಯಿಂದ ಹಿಂದೆ ಸರಿಯುತ್ತಿದ್ದೇನೆ' ಎಂದು ಘೋಷಿಸಿದರು.