ಮೈತ್ರಿ ಸರಕಾರದ ಬೆಂಬಲವಾಗಿದ್ದೇನೆ; ರಾಜೀನಾಮೆಯ ಪ್ರಶ್ನೆಯೇ ಇಲ್ಲ: ಎನ್. ಮಹೇಶ್‌

ಬೆಂಗಳೂರು: ಮುಳುಗುತ್ತಿರುವವರಿಗೆ ಹುಲ್ಲು ಕಡ್ಡಿಯೂ ಆಸರೆ ಅನ್ನುವಂತೆ ರಾಜ್ಯದ ಸಮ್ಮಿಶ್ರ ಸರಕಾರಕ್ಕೆ ಅಲ್ಪ ಸಮಾಧಾನ ದೊರೆತಿದೆ. ಶಾಸಕರೊಬ್ಬರು ನಾನು ಮೈತ್ರಿ ಸರ್ಕಾರದ ಬೆಂಬಲವಾಗಿದ್ದೇನೆ. ರಾಜೀನಾಮೆ ನೀಡುವ ಪ್ರಶ್ನೆಯೇ ಇಲ್ಲ ಎಂದಿದ್ದಾರೆ.

ಬಿಎಸ್‌ಪಿ ಶಾಸಕ ಎನ್.ಮಹೇಶ್ ಈ ರೀತಿ ಸಮ್ಮಿಶ್ರ ಸರಕಾರಕ್ಕೆ ಹುಲ್ಲು ಕಡ್ಡಿಯಂತೆ ಆಸರೆಯಾಗಿದ್ದಾರೆ. ಮಹೇಶ್‌ ಸಹ ಸಮ್ಮಿಶ್ರ ಸರಕಾರಕ್ಕೆ ನೀಡಿರುವ ಬೆಂಬಲವನ್ನು ಹಿಂಪಡೆದುಕೊಳ್ಳಲಿದ್ದಾರೆ ಎಂಬ ಮಾತುಗಳು ಹಲವೆಡೆ ಕೇಳಿ ಬರುತ್ತಿತ್ತು. ಈ ಬಗ್ಗೆ ಸ್ಪಷ್ಟನೆ ನೀಡಿದ ಮಾಜಿ ಸಚಿವ ಮಹೇಶ್‌, ನಾನು ಮೈತ್ರಿ ಸರ್ಕಾರದ ಬೆಂಬಲವಾಗಿದ್ದೇನೆ. ರಾಜೀನಾಮೆ ನೀಡುವ ಪ್ರಶ್ನೆಯೇ ಇಲ್ಲ ಎಂದಿದ್ದಾರೆ.

ಬೆಂಗಳೂರಿನ ಸ್ಪೀಕರ್‌ ಕಚೇರಿ ಬಳಿ ಮಾಹಿತಿ ನೀಡಿದ ಬಿಎಸ್‌ಪಿ ಶಾಸಕ ಮಹೇಶ್‌, ''ನಾನು ಮೈತ್ರಿ ಸರಕಾರದ ಬೆಂಬಲವಾಗಿದ್ದೇನೆ. ರಾಜೀನಾಮೆ ನೀಡುವ ಪ್ರಶ್ನೆಯೇ ಇಲ್ಲ. ಅಧಿವೇಶನದಲ್ಲಿ ಕೆಲ ವಿಷಯ ಚರ್ಚೆ ಬಗ್ಗೆ ಮಾತನಾಡಲು ಬಂದಿದ್ದೆ. '' ಎಂದಿದ್ದಾರೆ.

ಅಲ್ಲದೆ, ''ಮಧ್ಯಂತರ ಚುನಾವಣೆ ಅನಿವಾರ್ಯವಾದರೆ ಮತದಾನ ಮಾಡಬೇಡಿ. ವೋಟಿಂಗ್ ಡಬ್ಬ ಖಾಲಿ ಕಳುಹಿಸಲು ಮತದಾರರಿಗೆ ಕರೆ ನೀಡುವೆ. ಇಂತಹ ಪರಿಸ್ಥಿತಿ ಉಂಟಾಗಿದ್ದು ಬೇಸರ ಮತ್ತು ವಿಷಾದದ ಸಂಗತಿ'' ಎಂದು ಸಹ ಸದ್ಯದ ರಾಜಕೀಯ ಬೆಳವಣಿಗೆ ಬಗ್ಗೆ ಪ್ರಶ್ನೆ ಮಾಡಿದ್ದಾರೆ.