ಬಸ್‌ ಪ್ರಯಾಣ ದರ: ಮೂರು ತಿಂಗಳಿಗೊಮ್ಮೆ ಪರಿಷ್ಕರಿಸಲು ಸರಕಾರಕ್ಕೆ ಪ್ರಸ್ತಾವನೆ

ಬೆಂಗಳೂರು: ಡೀಸೆಲ್‌ ಬೆಲೆ ಏರಿಕೆ ಆಧರಿಸಿ ಪ್ರತಿ 3 ತಿಂಗಳಿಗೊಮ್ಮೆ ಬಸ್‌ ಪ್ರಯಾಣ ದರ ಪರಿಷ್ಕರಣೆ ಮಾಡುವಂತೆ ಸರಕಾರಕ್ಕೆ ಸಾರಿಗೆ ಇಲಾಖೆ ಪ್ರಸ್ತಾವನೆ ಕಳುಹಿಸಿದೆ.

''ಡೀಸೆಲ್‌ ಬೆಲೆ ಏರಿದಾಗ ಬಸ್‌ ಪ್ರಯಾಣ ದರದಲ್ಲೂ ಹೆಚ್ಚಳವಾಗಲಿದೆ. ಡೀಸೆಲ್‌ ಬೆಲೆ ಕುಸಿತ ಕಂಡರೆ ಬಸ್‌ ಪ್ರಯಾಣ ದರವೂ ಕಡಿತಗೊಳ್ಳುವ ಸಾಧ್ಯತೆ ಇರುತ್ತದೆ,'' ಎಂದು ವಿಧಾನಸೌಧದಲ್ಲಿ ಶನಿವಾರ ಸುದ್ದಿಗಾರರಿಗೆ ಸಾರಿಗೆ ಸಚಿವ ಡಿ.ಸಿ.ತಮ್ಮಣ್ಣ ತಿಳಿಸಿದ್ದಾರೆ.

''ತೈಲ ಬೆಲೆ ಹೆಚ್ಚಾಗಿದ್ದರೂ ರಾಜ್ಯದ ನಾಲ್ಕೂ ಸಾರಿಗೆ ಸಂಸ್ಥೆಗಳ ವ್ಯಾಪ್ತಿಯಲ್ಲಿ ಕಳೆದ 5 ವರ್ಷದಿಂದ ಬಸ್‌ ಪ್ರಯಾಣ ದರ ಹೆಚ್ಚಿಸಿಲ್ಲ. ಹಾಗಾಗಿ ದರ ಪರಿಷ್ಕರಣೆ ಕುರಿತು ಸರಕಾರಕ್ಕೆ ಪ್ರಸ್ತಾವನೆ ಕಳುಹಿಸಲಾಗಿದೆ,'' ಎಂದು ಹೇಳಿದರು.

ಹಗರಣ ತನಿಖೆ

''ರಾಜ್ಯದ 4 ಸಾರಿಗೆ ಸಂಸ್ಥೆಗಳ ವ್ಯಾಪ್ತಿಯಲ್ಲಿ ನಡೆದ ಅಕ್ರಮಗಳ ಬಗ್ಗೆ ಸಮಗ್ರ ತನಿಖೆ ನಡೆಸಲಾಗುತ್ತಿದೆ. 17 ಕೋಟಿ ರೂ. ರಕ್ಸೀನ್‌ ಖರೀದಿ ಅಕ್ರಮದಲ್ಲಿ 7 ಮಂದಿಯನ್ನು ಮತ್ತು ಕಂಪ್ಯೂಟರ್‌, ಸರ್ವರ್‌ ಖರೀದಿ ಅಕ್ರಮದಲ್ಲಿ 4 ಮಂದಿ ಹಾಗೂ ಈಶಾನ್ಯ ಸಾರಿಗೆ ಸಂಸ್ಥೆಯ ವ್ಯವಸ್ಥಾಪಕ ನಿರ್ದೇಶಕರ ನಕಲಿ ಸಹಿ ಮೂಲಕ 140 ಮಂದಿಯನ್ನು ನೇಮಿಸಿಕೊಂಡ ಪ್ರಕರಣದಲ್ಲಿ 15 ಮಂದಿಯನ್ನು ಅಮಾನತುಗೊಳಿಸಲಾಗಿದೆ,'' ಎಂದು ಸಾರಿಗೆ ಸಚಿವ ಡಿ.ಸಿ.ತಮ್ಮಣ್ಣ ತಿಳಿಸಿದರು.

28 ಸ್ಲೀಪರ್‌ ಕೋಚ್‌ ಬಸ್‌

''ಪ್ರಯಾಣಿಕರಿಗೆ ಉತ್ತಮ ಸೇವೆ ಒದಗಿಸುವ ಉದ್ದೇಶದಿಂದ 28 ಸ್ಲೀಪರ್‌ ಕೋಚ್‌, ಸುಖಾಸೀನ ಸೇರಿ ಒಟ್ಟಾರೆ 3 ಸಾವಿರ ಬಸ್‌ ಖರೀದಿಸಲಾಗುವುದು,'' ಎಂದು ಸಚಿವರು ಹೇಳಿದರು.