ಕ್ಯಾಂಪ್ಕೊ ದಾಖಲೆಯ 1878 ಕೋಟಿ ರೂ. ವ್ಯವಹಾರ

ಮಂಗಳೂರು: ಬೆಳೆಗಾರರ ಹೆಮ್ಮೆಯ ಸಹಕಾರಿ ಸಂಸ್ಥೆ ಕ್ಯಾಂಪ್ಕೊ 2018-19 ನೇ ಸಾಲಿನಲ್ಲಿ 1878 ಕೋಟಿ ರೂ. ವ್ಯವಹಾರ ನಡೆಸುವ ಮೂಲಕ 46 ವರ್ಷಗಳ ಸದಸ್ಯ ಕೃಷಿಕರ ಸೇವೆಯಲ್ಲಿ ಹೊಸ ದಾಖಲೆ ನಿರ್ಮಿಸಿದೆ ಮತ್ತು ಅಡಕೆ ಖರೀದಿಯ ಪ್ರಮಾಣದಲ್ಲಿ ಹೆಚ್ಚಳವನ್ನು ಸಾಧಿಸಿದೆ ಎಂದು ಕ್ಯಾಂಪ್ಕೊ ಅಧ್ಯಕ್ಷ ಎಸ್.ಆರ್.ಸತೀಶ್ಚಂದ್ರ ತಿಳಿಸಿದ್ದಾರೆ.

ನಗರದ ಹೋಟೆಲ್ ಓಶಿಯನ್ ಪರ್ಲ್‌ನಲ್ಲಿ ಸುದ್ದಿಗೋಷ್ಠಿಯಲ್ಲಿ ಗುರುವಾರ ಅವರು ಮಾತನಾಡಿದರು.

ಕಳೆದ ಹಣಕಾಸು ವರ್ಷದಲ್ಲಿ ಸಂಸ್ಥೆ 1589.15ಕೋಟಿ ರೂ. ಮೌಲ್ಯದ 57,209.64 ಮೆಟ್ರಿಕ್ ಟನ್ ಅಡಕೆಯನ್ನು ಖರೀದಿಸಿದೆ. ಇವುಗಳಲ್ಲಿ 882.61ಕೋಟಿ ರೂ. ಮೌಲ್ಯದ 27,362.90 ಮೆಟ್ರಿಕ್ ಟನ್ ಕೆಂಪಡಿಕೆ ಮತ್ತು 706.54ಕೋಟಿ ರೂ. ಮೌಲ್ಯದ 29,846.74 ಮೆಟ್ರಿಕ್ ಟನ್ ಬಿಳಿ ಅಡಕೆ ಒಳಗೊಂಡಿದೆ. 1,593.40 ಕೋಟಿ ರೂ. ಮೌಲ್ಯದ 54,767.30 ಮೆಟ್ರಿಕ್ ಟನ್ ಅಡಕೆಯನ್ನು ಮಾರಾಟ ಮಾಡಿದೆ. ಇವುಗಳಲ್ಲಿ 826.03ಕೋಟಿ ರೂ. ಮೌಲ್ಯದ 25,066.57 ಮೆಟ್ರಿಕ್ ಟನ್ ಕೆಂಪಡಿಕೆ ಮತ್ತು 767.37ಕೋಟಿ ರೂ. ಮೌಲ್ಯದ 29,700.73 ಮೆಟ್ರಿಕ್ ಟನ್ ಬಿಳಿ ಅಡಕೆ ಒಳಗೊಂಡಿದೆ ಎಂದು ಮಾಹಿತಿ ನೀಡಿದರು.

ಚಾಕಲೇಟು ಕಾರ್ಖಾನೆಯ ಒಟ್ಟು ಉತ್ಪಾದನೆಯ ಪ್ರಮಾಣ 14,606 ಮೆಟ್ರಿಕ್ ಟನ್ ಮತ್ತು ಅದರಲ್ಲಿ10,042.41 ಮೆಟ್ರಿಕ್ ಟನ್ ನಮ್ಮದೇ ಬ್ರಾಂಡಿನ ಚಾಕಲೇಟ್ ಉತ್ಪಾದನೆಯಾಗಿದೆ. 193 ಕೋಟಿ ರೂಪಾಯಿಗಳ ಮೌಲ್ಯದ ಚಾಕಲೇಟು ಮತ್ತು ಕೊಕ್ಕೊ ಕೈಗಾರಿಕೋತ್ಪನ್ನಗಳು ಮಾರಾಟವಾಗಿದ್ದು, ಇದರಲ್ಲಿ16.75 ಕೋಟಿ ರೂ. ಮೌಲ್ಯದ 1106 ಮೆಟ್ರಿಕ್ ಟನ್ ರಫ್ತು ಒಳಗೊಂಡಿದೆ ಎಂದು ಅವರು ತಿಳಿಸಿದರು.

ಹೆಚ್ಚಿರುವ ಚೊಕೊ ಚಿಪ್ ಬೇಡಿಕೆಯನ್ನು ಪೂರೈಸುವ ಸಲುವಾಗಿ ಸುಮಾರು 3.5 ಕೋಟಿ ರೂ. ವೆಚ್ಚದಲ್ಲಿ ಹೊಸ ಡ್ರಾಪ್ ಚೊಕಲೇಟ್ ಯಂತ್ರವನ್ನು ಅಳವಡಿಸಿಕೊಳ್ಳಲಾಗಿದೆ. ಟರ್ಕಿಯಿಂದ ಆಮದು ಮಾಡಿಕೊಂಡಿರುವ ಈ ಯಂತ್ರವು ದಿನವೊಂದರ 10 ಮೆಟ್ರಿಕ್ ಟನ್ ಉತ್ಪಾದನಾ ಸಾಮಥ್ರ್ಯ ಹೊಂದಿದೆ ಎಂದು ಕ್ಯಾಂಪ್ಕೊ ಅಧ್ಯಕ್ಷರು ತಿಳಿಸಿದರು.

ಪ್ರಸಕ್ತ ಸಾಲಿನಲ್ಲಿ ಕ್ಯಾಂಪ್ಕೊ 27.11ಕೋಟಿ ರೂ. ಮೌಲ್ಯದ 2249.65 ಮೆಟ್ರಿಕ್ ಟನ್ ರಬ್ಬರನ್ನು ಖರೀದಿಸಿದೆ ಮತ್ತು 27.64ಕೋಟಿ ರೂ. ಮೌಲ್ಯದ 2247.72 ಮೆಟ್ರಿಕ್ ಟನ್ ರಬ್ಬರನ್ನು ಮಾರಾಟ ಮಾಡಿದೆ. ಕಳೆದ ವರ್ಷದಂತೆ ಈ ವರ್ಷವೂ ಮೈಲುತುತ್ತನ್ನು ತನ್ನ ವಿವಿಧ ಶಾಖೆಗಳ ಮುಖಾಂತರ ರಿಯಾಯಿತಿ ದರದಲ್ಲಿ ಸದಸ್ಯರಿಗೆ ವಿತರಿಸಲಿದೆ ಎಂದು ಸತೀಶ್ಚಂದ್ರ ತಿಳಿಸಿದರು.

ಕಾರ್ಮಿಕರ ಕುಟುಂಬಗಳಿಗೆ ನೆರವು

ರೈತರ ತೋಟಗಳಲ್ಲಿ, ಹೊಲಗಳಲ್ಲಿ ಕೆಲಸ ಮಾಡುವ ಕೂಲಿ ಕಾರ್ಮಿಕರು ಆಕಸ್ಮಿಕವಾಗಿ ನಿಧನರಾದರೆ ಅಂತಹಾ ಕುಟುಂಬಗಳಿಗೆ 50 ಸಾವಿರ ರೂ. ನೆರವನ್ನು ಸಂಸ್ಥೆ ವತಿಯಿಂದ ನೀಡುವ ಉದೇಶ ಹೊಂದಿದ್ದೇವೆ ಎಂದು ತಿಳಿಸಿದರು.

ಅಡಕೆ ಮರ ಹತ್ತುವ ಕೂಲಿ ಕಾರ್ಮಿಕರ ಕೊರತೆಯನ್ನು ಪರಿಗಣಿಸಿ ಕ್ಯಾಂಪ್ಕೊ ವತಿಯಿಂದ ಅಡಕೆ ಕೌಶಲ್ಯ ಪಡೆಯನ್ನು ತರಬೇತಿ ಮೂಲಕ ಸಿದ್ಧಪಡಿಸಲಾಗಿದ್ದು, ಸುಮಾರು 130 ಮಂದಿಗೆ ತರಬೇತಿ ನೀಡಲಾಗಿದೆ. ಅವರ ಸೇವೆಯನ್ನು ಸಾರ್ವಜನಿಕರು ಪಡೆದುಕೊಳ್ಳಬಹುದು ಎಂದರು.

ಸೌರ ಘಟಕ ಸ್ಥಾಪನೆಗೆ ಚಿಂತನೆ

2018-19 ನೇ ಸಾಲಿನಲ್ಲಿ ಪವನ ಯಂತ್ರಗಳ ಮೂಲಕ ಒಟ್ಟು 45ಲಕ್ಷ ಯುನಿಟ್ ವಿದ್ಯುತ್ ಉತ್ಪಾದಿಸಲಾಗಿದೆ. ಚಾಕಲೇಟು ಕಾರ್ಖಾನೆಯ ಅವಶ್ಯಕತೆಯ ಶೇ.75ರಷ್ಟು ವಿದ್ಯುತ್ತನ್ನು ಇದು ಪೂರೈಸಿದೆ. ಸಂಸ್ಥೆ ಸ್ವಯಂ ಪರ್ಯಾಪ್ತತೆ ಹೊಂದುವ ದೃಷ್ಟಿಯಿಂದ ಹೊಸ ಸೌರ ವಿದ್ಯುತ್ ಘಟಕವನ್ನು ಸ್ಥಾಪಿಸಿ 5 ಲಕ್ಷ ಯೂನಿಟ್ ಸೌರ ವಿದ್ಯುತ್ ಉತ್ಪಾದಿಸಲು ಉದ್ದೇಶಿಸಲಾಗಿದೆ ಎಂದು ಮಾಹಿತಿ ನೀಡಿದರು.

ಕ್ಯಾಂಪ್ಕೊ ಉಪಾಧ್ಯಕ್ಷ ಶಂಕರನಾರಾಯಣ ಭಟ್ ಖಂಡಿಗೆ, ಆಡಳಿತ ನಿರ್ದೇಶಕ ಸುರೇಶ್ ಭಂಡಾರಿ, ಮಹಾಪ್ರಬಂಧಕಿ ರೇಷ್ಮಾ ಮಲ್ಯ ಹಾಜರಿದ್ದರು.