ರಾಜೀನಾಮೆ ಪರಿಶೀಲನೆಗೆ ಕಾಲಾವಕಾಶ: ಸ್ಪೀಕರ್‌ ನಿರ್ಧಾರದಿಂದ ದೋಸ್ತಿಗಳಿಗೆ ಸಿಕ್ಕಿದೆ 'ಗುಟುಕು ಜೀವ'

ಬೆಂಗಳೂರು: ರಾಜ್ಯ ರಾಜಕೀಯದಲ್ಲಿ ಆಗಿರುವ ಕ್ಷಿಪ್ರಕ್ರಾಂತಿಯ ಹಿನ್ನೆಲೆಯಲ್ಲಿ ಸಮ್ಮಿಶ್ರ ಸರಕಾರದ ಭವಿಷ್ಯ ಸ್ಪೀಕರ್‌ ಕೈಯಲ್ಲಿದೆ.

ಅತೃಪ್ತ ಶಾಸಕರು ನೀಡಿರುವ 13 ರಾಜೀನಾಮೆ ಪೈಕಿ ಐವರ ರಾಜೀನಾಮೆ ಮಾತ್ರ ಕ್ರಮಬದ್ಧವಾಗಿದೆ. ಉಳಿದವರಿಗೆ ನೋಟಿಸ್‌ ಕಳುಹಿಸಲಾಗಿದೆ ಹಾಗೂ ಕ್ರಮಬದ್ಧವಾಗಿರುವ ಶಾಸಕರಿಗೂ ನೋಟಿಸ್‌ ನೀಡಿ ಖುದ್ದು ಹಾಜರಾಗಿ ವಿವರಣೆ ನೀಡುವಂತೆ ಕಾಲಾವಕಾಶ ನೀಡಲಾಗಿದೆ ಎಂದು ಸ್ಪೀಕರ್‌ ತಿಳಿಸಿದ್ದಾರೆ.

ಅಲ್ಲದೇ ಕ್ರಮಬದ್ಧವಲ್ಲದ ಶಾಸಕರಿಗೆ ಮತ್ತೊಮ್ಮೆ ಅವಕಾಶ ಕಲ್ಪಿಸಲು ಅವಕಾಶ ನೀಡಿ ಕಚೇರಿಯಿಂದ ನೋಟಿಸ್‌ ನೀಡಿದ್ದೇವೆ ಎಂದು ಸ್ಪಷ್ಟಪಡಿಸಿದ್ದಾರೆ.

ಜುಲೈ 12 ಹಾಗೂ 15ರಂದು ಐವರು ಶಾಸಕರ ಜತೆ ಖುದ್ದಾಗಿ ವಿಚಾರಣೆ ನಡೆಸುತ್ತೇನೆ ಎಂದು ಸ್ಪೀಕರ್‌ ರಮೇಶ್‌ ಹೇಳಿದ್ದಾರೆ. ಸ್ಪೀಕರ್‌ ಈ ನಿರ್ಧಾರದಿಂದ ಸದ್ಯಕ್ಕೆ ದೋಸ್ತಿ ಸರಕಾರಕ್ಕೆ ಗುಟುಕು ಜೀವ ಬಂದಂತಾಗಿದೆ.

ಇವರೆಲ್ಲರ ರಾಜೀನಾಮೆ ಪರಿಶೀಲನೆ ಆಗುವವರೆಗೂ ಹಾಗೂ ರಾಜೀನಾಮೆ ಅಂಗೀಕಾರ ಆಗುವವರೆಗೂ ಸರಕಾರದ ನಂಬರ್ ಗೇಮ್‌ನಲ್ಲಿ ಯಾವುದೇ ಬದಲಾವಣೆ ಆಗುವುದಿಲ್ಲ. ಹೀಗಾಗಿ ಮುಂದಿನ ವಾರದವರೆಗೂ ಸರಕಾರ ಸೇಫ್‌.

ಇದೇ ಮಾತನ್ನು ಮುಖ್ಯಮಂತ್ರಿ ಎಚ್‌ಡಿ ಕುಮಾರಸ್ವಾಮಿ ರೆಸಾರ್ಟ್‌ನಲ್ಲಿರುವ ಜೆಡಿಎಸ್‌ ಶಾಸಕರಿಗೆ ಭರವಸೆ ನೀಡಿದ್ದಾರೆ.

ಬಹುತೇಕ ಒಂದು ವಾರದ ಅವಧಿಯಲ್ಲಿ ಕೆಲವು ಶಾಸಕರನ್ನು ಮನವೊಲಿಸಿ ಕರೆತರಲು ಕಾಂಗ್ರೆಸ್‌, ಜೆಡಿಎಸ್‌ಗೆ ಕಾಲಾವಕಾಶ ದೊರೆತಂತಾಗಿದೆ.