ಕಾರು ಭಸ್ಮದಿಂದ ಅಂದಾಜು 20 ಕೋಟಿ ನಷ್ಟ

ಬೆಂಗಳೂರು: ಏರ್‌ ಶೋ ಅಗ್ನಿ ದುರಂತದಲ್ಲಿ ಸಂಭವಿಸಿದ ಅನಾಹುತದಲ್ಲಿ ಅಂದಾಜು 20 ಕೋಟಿಯಷ್ಟು ನಷ್ಟ ಸಂಭವಿಸಿರಬಹುದು ಎಂದು ಅಂದಾಜಿಸಲಾಗಿದೆ.

ಭಸ್ಮವಾಗಿರುವ ಕಾರುಗಳಲ್ಲಿ ದುಬಾರಿ ಬೆಲೆಯ ಐಷಾರಾಮಿ ಕಾರುಗಳು ಸೇರಿವೆ. ಇನ್ನು ಕೆಲವು 3-5 ಲಕ್ಷ ರೂ. ಮೌಲ್ಯದ ಕಾರುಗಳೂ ಇವೆ. ಹೀಗಾಗಿ ಪ್ರತಿ ಕಾರಿ ಬೆಲೆ ಅಂದಾಜು 6 ಲಕ್ಷ ರೂ. ಎಂದು ಲೆಕ್ಕ ಹಾಕಿದರೂ 343 ( ಇದರಲ್ಲಿ ಭಾಗಶಃ ಸುಟ್ಟಿರುವ ಕಾರುಗಳು ಸೇರಿ) ಕಾರುಗಳಿಗೆ ಒಟ್ಟು 20 ಕೋಟಿ ರೂ. ಆಗಬಹುದು ಎಂದು ಅಂದಾಜು ಮಾಡಲಾಗಿದೆ. ಎಲ್ಲಾ ಕಾರು ಮಾಲೀಕರುಗಳಿಂದ ಇನ್ನೂ ಸಮಗ್ರವಾಗಿ ದಾಖಲೆ ಮತ್ತು ಮಾಹಿತಿ ಸಿಕ್ಕಿಲ್ಲ. ಸೋಮವಾರದ ವೇಳೆಗೆ ಸ್ಪಷ್ಟ ಚಿತ್ರಣ ಸಿಗಲಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಸುಟ್ಟ ಕಾರು ಕಂಡು ಕಣ್ಣೀರಾದರು...

ವೈಮಾನಿಕ ಪ್ರದರ್ಶನ ಕಂಡ ಸಂತಸದಲ್ಲಿದ್ದ ಮಕ್ಕಳು ತಮ್ಮ ಪ್ರೀತಿಯ ಕಾರು ಅಗ್ನಿ ಅನಾಹುತದಲ್ಲಿ ಭಸ್ಮವಾಗಿದ್ದ ದೃಶ್ಯ ಕಂಡು ಬಿಕ್ಕಿ ಬಿಕ್ಕಿ ಅತ್ತರು. ಸುಟ್ಟು ಕರಕಲಾದ ಕಾರಿನ ಅವಶೇಷಗಳಡಿ ಕೀ ಮತ್ತಿತರ ವಸ್ತುಗಳನ್ನು ಕೆದಕಿ ಭಾವುಕರಾದರು. ಉಮ್ಮಳಿಸಿ ಬಂದ ದುಃಖದಿಂದ ಕಣ್ಣೀರಿಟ್ಟರು. ಅತ್ತ ಪೋಷಕರಿಗೂ ದುಃಖ ತಡೆಯಲಾಗಲಿಲ್ಲ. ಮಕ್ಕಳನ್ನು ಸಂತೈಸುವ ಬದಲು ತಾವೇ ಕಣ್ಣೀರಾದರು.

ಶಾಲೆಗೆ ರಜೆ ಹಾಕಿ ಪೋಷಕರ ಜತೆ ಕಾರಿನಲ್ಲಿ ಖುಷಿ ಖುಷಿಯಿಂದ ಬಂದ ಪುಟಾಣಿಗಳು ಕೊನೆಗೆ ಕಾರು, ಆಹಾರ ಪದಾರ್ಥಗಳು, ಹಣ ಎಲ್ಲವನ್ನೂ ಕಳೆದುಕೊಂಡು ನೋವಿನಿಂದ ಮನೆಯತ್ತ ಭಾರ ಹೊತ್ತ ಹೃದಯದಿಂದ ಹೆಜ್ಜೆ ಹಾಕಿದರು.

ಸಾರ್ವಜನಿಕ ವಾಹನಗಳಿಗೆ ಗೇಟ್‌-5ರ ಪಾರ್ಕಿಂಗ್‌ ಸ್ಥಳದಲ್ಲೇ ನಿಲುಗಡೆಗೆ ಅವಕಾಶ ಕಲ್ಪಿಸಲಾಗಿತ್ತು. ಹೀಗಾಗಿ, ಹೆಚ್ಚಿನ ಸಂಖ್ಯೆಯ ವಾಹನಗಳನ್ನು ಇಲ್ಲೇ ನಿಲುಗಡೆ ಮಾಡಲಾಗಿತ್ತು. ದುರಂತವೆಂದರೆ 1800 ರೂ. ಪಾವತಿಸಿ ಟಿಕೆಟ್‌ ಖರೀದಿಸಿದ್ದ ವಾಹನ ಮಾಲೀಕರು ಲಕ್ಷಾಂತರ ರೂ. ಮೌಲ್ಯದ ಕಾರು ಕಳೆದುಕೊಂಡರು.