ಡಿಕೆ ಶಿವಕುಮಾರ್‌ ಮೇಲೂ ಸಿಬಿಐ ದಾಳಿ?

ಬೆಂಗಳೂರು: ಗುರುವಾರ ಬೆಳಗ್ಗೆ ಬೆಂಗಳೂರು, ಕನಕಪುರ ಮತ್ತು ರಾಮನಗರದಲ್ಲಿ ಡಿಕೆ ಬ್ರದರ್ಸ್ ಆಪ್ತರ ಮೇಲೆ ಸಿಬಿಐ ದಾಳಿ ನಡೆಸಿರುವ ಬೆನ್ನಲ್ಲೇ ಶಾಸಕ ಡಿ.ಕೆ. ಶಿವಕುಮಾರ್ ಮತ್ತು ಸಂಸದ ಡಿ. ಕೆ. ಸುರೇಶ್ ಮೇಲೂ ಸಿಬಿಐ ದಾಳಿ ದಾಳಿ ನಡೆಸುವ ಸಾಧ್ಯತೆಯಿದೆ ಎನ್ನಲಾಗಿದೆ.

ನೋಟು ನಿಷೇಧ ಬಳಿಕ ಅಕ್ರಮ ಹಣ ವರ್ಗಾವಣೆ ಮತ್ತು ನೋಟು ಬದಲಾವಣೆ ಸಂಬಂಧ ಸಿಬಿಐ ಹಲವು ಪ್ರಕರಣ ದಾಖಲಿಸಿದೆ.

ಅದೇ ರೀತಿ ರಾಮನಗರದಲ್ಲಿನ ರಾಷ್ಟ್ರೀಕೃತ ಬ್ಯಾಂಕೊಂದರ ಮ್ಯಾನೇಜರ್ ಮತ್ತು ಇತರ ಅಧಿಕಾರಿಗಳು ಡಿ. ಕೆ. ಸುರೇಶ್ ಅವರಿಗೆ ಅಕ್ರಮವಾಗಿ ನೋಟು ಬದಲಾವಣೆಗೆ ನೆರವಾಗಿದ್ದು, ಈ ಸಂಬಂಧ ಸಿಬಿಐ 11 ಜನರ ವಿರುದ್ಧ ಸರ್ಚ್‌ ವಾರಂಟ್ ಪಡೆದುಕೊಂಡಿತ್ತು.

ಅದರಲ್ಲಿ ಸಂಸದ ಡಿ. ಕೆ. ಸುರೇಶ್ ಹೆಸರು ಕೂಡ ಇದೆ, ಆದರೆ ಡಿ. ಕೆ. ಶಿವಕುಮಾರ್‌ ಹೆಸರು ಇರುವ ಬಗ್ಗೆ ಸ್ಪಷ್ಟವಾಗಿಲ್ಲ. ಆದರೂ ಡಿಕೆ ಸಹೋದರರು ಗುರುವಾರ ಬೆಳಗ್ಗೆಯೇ ಸುದ್ದಿಗೋಷ್ಠಿ ನಡೆಸಿ ಬಿಜೆಪಿ ಮತ್ತು ಕೇಂದ್ರ ಸರಕಾರ ಸೇಡಿನ ರಾಜಕಾರಣ ನಡೆಸುತ್ತಿದೆ. ಸಿಬಿಐಯನ್ನು ಬಳಸಿಕೊಂಡು ನಮ್ಮ ವಿರುದ್ಧ ದಾಳಿ ನಡೆಸುತ್ತಿದೆ ಎಂದು ದೂರಿದ್ದರು. ಅಲ್ಲದೆ ಬುಧವಾರ ರಾತ್ರಿಯೇ ಸಿಬಿಐ ದಾಳಿ ನಡೆಸಲಿರುವ ಬಗ್ಗೆ ಮಾಹಿತಿ ಪಡೆದುಕೊಂಡಿದ್ದರು ಎನ್ನಲಾಗಿದೆ.

ಈ ಮಧ್ಯೆ ಸಂಸದರ ಸೂಚನೆಯಂತೆ ಹಣ ಬದಲಾಯಿಸಿ ಕೊಟ್ಟಿದ್ದಾಗಿ ಸಿಬಿಐಗೆ ಬ್ಯಾಂಕ್ ಮ್ಯಾನೇಜರ್ ತಿಳಿಸಿದ್ದಾರೆ.