ಕೇಂದ್ರ ಸರಕಾರಿ ನೌಕರರಿಂದ ಜ.8,9ರಂದು ಮುಷ್ಕರ

ಬೆಂಗಳೂರು: ಕನಿಷ್ಠ ವೇತನ 18 ಸಾವಿರ ರೂ. ನಿಗದಿ ಸೇರಿದಂತೆ ವಿವಿಧ ಬೇಡಿಕೆಗಳ ಈಡೇರಿಕೆಗೆ ಆಗ್ರಹಿಸಿ ಜ.8 ಮತ್ತು 9ರಂದು ಕೇಂದ್ರ ಸರಕಾರದ ವಿವಿಧ ಇಲಾಖೆಗಳ ನೌಕರರು ಮುಷ್ಕರ ನಡೆಸಲಿದ್ದಾರೆ. ಇದರಿಂದಾಗಿ ಕೇಂದ್ರ ಸರಕಾರಿ ಕಚೇರಿಗಳು ಬಂದ್‌ ಆಗುವ ಸಾಧ್ಯತೆ ಇದೆ.

ಕೇಂದ್ರ ಕಾರ್ಮಿಕ ಸಂಘಟನೆಗಳ ಜಂಟಿ ಸಮಿತಿಯ ವತಿಯಿಂದ ವಿವಿಧ ಕಾರ್ಮಿಕ ಸಂಘಟನೆಗಳ ಮುಖಂಡರು ಬುಧವಾರ ಮೈಸೂರು ಬ್ಯಾಂಕ್‌ ವೃತ್ತದಲ್ಲಿ ಬಹಿರಂಗ ಸಭೆ ನಡೆಸಿದರು.

''ಬ್ಯಾಂಕ್‌, ವಿಮೆ, ರೈಲ್ವೆ ಸೇರಿದಂತೆ ಕೇಂದ್ರದ ಎಲ್ಲ ಇಲಾಖೆಗಳ ನೌಕರರು, ಕಾರ್ಮಿಕರು ಮುಷ್ಕರದಲ್ಲಿ ಭಾಗವಹಿಸಲಿದ್ದಾರೆ,''ಎಂದು ಎಐಟಿಯುಸಿ-ಜೆಸಿಟಿಯುನ ಪದಾಧಿಕಾರಿ ಎಂ.ಡಿ ಹರಿಗೋವಿಂದ ತಿಳಿಸಿದರು.

''ಕನಿಷ್ಠ ವೇತನ ಜಾರಿ, ಯಾವುದೇ ಸಾರ್ವಜನಿಕ ಉದ್ಯಮಗಳ ಖಾಸಗೀಕರಣ ಮಾಡಬಾರದು. ಗುತ್ತಿಗೆ ನೌಕರ ಪದ್ಧತಿ ಕೈಬಿಡಬೇಕು, ಸಮಾನ ಕೆಲಸಕ್ಕೆ ಸಮಾನ ವೇತನ ಜಾರಿಯು ನಮ್ಮ ಪ್ರಮುಖ ಬೇಡಿಕೆಗಳಾಗಿವೆ'' ಎಂದು ಹರಿಗೋವಿಂದ ತಿಳಿಸಿದರು.