ಆ್ಯಪ್ನಗರ

ಕುರ್ಚಿ ಭದ್ರ, ಅತೃಪ್ತಿ ಶಮನ, ಸಂಪುಟ ವಿಸ್ತರಣೆ; ನ್ಯೂ ಇಯರ್‌ಗೆ ಬಿಎಸ್‌ವೈ ‘ನ್ಯೂ ಪ್ಲ್ಯಾನ್’

2020 ಬಿಎಸ್ ಯಡಿಯೂರಪ್ಪ ಪಾಲಿಗೆ ಸವಾಲಿನ ವರ್ಷವಾಗಿತ್ತು. ಅದೇ ರೀತಿ 2021 ನೇ ವರ್ಷದಲ್ಲಿ ಹಲವು ಸವಾಲುಗಳನ್ನು ಯಡಿಯೂರಪ್ಪ ಎದುರಿಸಬೇಕಾಗಿದೆ. ಅವು ಯಾವುವು ಎಂಬುವುದರ ಕುರಿತಾದ ವಿವರ ಇಲ್ಲಿದೆ.

Vijaya Karnataka Web 31 Dec 2020, 4:24 pm
ಬೆಂಗಳೂರು: ನೆರೆ ಹಾವಳಿ, ಕೋವಿಡ್‌ 19, ಉಪಚುನಾವಣೆ ಸವಾಲು, ಶಾಸಕರ ಅತೃಪ್ತಿ, ಹಣಕಾಸು ಸಮಸ್ಯೆ, ಆಂತರಿಕ ಬಂಡಾಯ. ಹೌದು,ಇವೆಲ್ಲವು 2020 ರಲ್ಲಿ ಮುಖ್ಯಮಂತ್ರಿ ಬಿಎಸ್‌ ಯಡಿಯೂರಪ್ಪ ಎದುರಿಸುವ ಬಹುದೊಡ್ಡ ಸವಾಲುಗಳು. ಒಂದು ಹಂತದಲ್ಲಿ ಕಹಿಯಾಗಿದ್ದ 2020 ನೇ ವರ್ಷಕ್ಕೆ ಅಂತ್ಯ ಹಾಡಿ ಹೊಸ ವರ್ಷಕ್ಕೆ ಹೊಸ ಸವಾಲುಗಳನ್ನು ಎದುರಿಸಲು ಬಿಎಸ್‌ವೈ ಸಜ್ಜಾಗಿದ್ದಾರೆ. ಈ ವರ್ಷದ ಕೊನೆಯ ಸುದ್ದಿಗೋಷ್ಠಿಯ ಬಗ್ಗೆ ಸಾಕಷ್ಟು ನಿರೀಕ್ಷೆ ಇದ್ದರೂ ಕೆಲವು ವಿಚಾರಗಳನ್ನು ಮಾತ್ರ ಪ್ರಸ್ತಾಪಿಸಿ ತನ್ನ ಕುರ್ಚಿ ಗಟ್ಟಿಯಾಗಿದೆ ಎಂಬ ಸಂದೇಶವನ್ನು ನೀಡಿದರು.
Vijaya Karnataka Web BS Yediyurappa


ಆದರೆ ಹೊಸ ವರ್ಷವೂ ಸಿಎಂ ಪಾಲಿಗೆ ಸಂತಸದ ವರ್ಷ ಆಗುವ ಸಾಧ್ಯತೆ ಎಷ್ಟರ ಮಟ್ಟಿಗೆ ಇದೆ ಎಂಬುವುದು ಕೂಡಾ ಸಾಕಷ್ಟು ಕುತೂಹಲದ ಸಂಗತಿಯಾಗಿದೆ. ಕೋವಿಡ್‌ ಸಂಕಷ್ಟದಿಂದಾಗಿ ಸರ್ಕಾರ ನಡೆಸುವ ಸವಾಲಿನ ಜೊತೆಗೆ ಪಕ್ಷದಲ್ಲಿ ಆಂತರಿಕವಾಗಿ ತೀವ್ರಗೊಳ್ಳುತ್ತಿರುವ ಬಂಡಾಯವನ್ನು ಎದುರಿಸುವುದು ಯಡಿಯೂರಪ್ಪ ಪಾಲಿಗೆ ಬಹುದೊಡ್ಡ ಸವಾಲಾಗಿ ಪರಿಗಣಿಸಿದೆ.

ಗುರುವಾರ ಮಧ್ಯಾಹ್ನ 12 ರಿಂದ ಶುಕ್ರವಾರ ಬೆಳಗ್ಗೆ 6ರವರೆಗೆ ರಾಜ್ಯದಲ್ಲಿ ನಿಷೇಧಾಜ್ಞೆ: ಸಿಎಂ ಬಿಎಸ್‌ವೈ

ಬಿಜೆಪಿ ರಾಜ್ಯ ಉಸ್ತುವಾರಿ ಅರುಣ್ ಸಿಂಗ್ ಅವರು ಬಿಎಸ್‌ವೈಗೆ ಅಭಯ ನೀಡಿದರೂ ಪಕ್ಷದಲ್ಲಿ ಕೆಲವು ಶಾಸಕರು ಯಡಿಯೂರಪ್ಪ ವಿರುದ್ಧ ಬಂಡಾಯದ ಬಾವುಟ ಹಾರಿಸಲು ತಯಾರಿ ನಡೆಸುತ್ತಿದ್ದಾರೆ. ಬಸನಗೌಡ ಪಾಟೀಲ್‌ ಯತ್ನಾಳ್ ಸೇರಿದಂತೆ ಕೆಲವು ಶಾಸಕರು ಯಡಿಯೂರಪ್ಪ ವಿರುದ್ಧ ಅಸಮಾಧಾನಗೊಂಡು ಬಿಜೆಪಿ ರಾಜ್ಯಾಧ್ಯಕ್ಷ ನಳಿನ್ ಕುಮಾರ್ ಕಟೀಲ್‌ಗೆ ಪತ್ರವನ್ನು ಬರೆದಿದ್ದಾರೆ.

ಅಷ್ಟೇ ಅಲ್ಲ, ಹೇಗೋ ಸಂಪುಟ ವಿಸ್ತರಣೆ ಇಂದು ನಾಳೆ ಎನ್ನುತ್ತಾ 2020 ಮುಗಿದು ಹೋಯಿತು. ಆದರೆ ಹೊಸ ವರ್ಷದಲ್ಲಿ ಬಿಎಸ್‌ವೈ ಸಂಪುಟದಲ್ಲಿ ಏನಾದರೂ ಬದಲಾವಣೆ ಆಗುತ್ತಾ ಎಂಬುವುದು ಕೂಡಾ ಮುಖ್ಯವಾಗಿದೆ. ಸಚಿವ ಸ್ಥಾನಕ್ಕಾಗಿ ಸಾಕಷ್ಟು ಜನ ಸರದಿಯ ಸಾಲಲ್ಲಿ ನಿಂತುಕೊಂಡಿದ್ದು ಬಿಎಸ್‌ವೈ ಮೇಲೆ ಒತ್ತಡ ಹಾಕುತ್ತಿದ್ದಾರೆ. ಇದನ್ನು ನಿಭಾಯಿಸುವುದು ಸುಲಭದ ಮಾತೇನಲ್ಲ. ಈನಿಟ್ಟಿನಲ್ಲಿ ಹೊಸ ವರ್ಷದಲ್ಲಿ ಹೊಸ ಬದಲಾವಣೆಯ ನಿರೀಕ್ಷೆ ಕೂಡಾ ಇದೆ.

ಇವೆಲ್ಲಾ ಗೊಂದಲಗಳ ನಡುವೆ ಆಡಳಿತ ಯಂತ್ರಕ್ಕೆ ಚುರುಕು ಮುಟ್ಟಿಸುವ ನಿಟ್ಟಿನಲ್ಲೂ ಬಿಎಸ್‌ವೈ ಯೋಜನೆ ರೂಪಿಸಬೇಕಾಗಿದೆ. ರಾಜ್ಯದಲ್ಲಿ ವಿದೇಶಿ ಹೂಡಿಕೆ ಪ್ರಸ್ತಾವಗಳು ಬಂದಿದ್ದು ಇದನ್ನು ಜಾರಿಗೊಳಿಸಬೇಕಿದೆ. ಕೋವಿಡ್ ರೂಪಾಂತರ ಸವಾಲನ್ನು ಎದುರಿಸಬೇಕಾಗಿದೆ. ಹೊಸ ಯೋಜನೆಗಳನ್ನು ಜಾರಿಗೊಳಿಸುವ ಮೂಲಕ ಆಡಳಿತ ಯಂತ್ರಕ್ಕೆ ಚುರುಕು ಮುಟ್ಟಿಸಬೇಕಾಗಿದೆ. ಈ ನಿಟ್ಟಿನಲ್ಲಿ ಏನು ಕ್ರಮಗಳನ್ನು ಕೈಗೊಳ್ಳುತ್ತಾರೆ ಎಂಬುವುದು ಕೂಡಾ ಸಾಕಷ್ಟು ಮಹತ್ವ ಪಡೆದುಕೊಂಡಿದೆ.

ಒಟ್ಟಿನಲ್ಲಿ 2021 ನೇ ವರ್ಷ ಬಿಎಸ್‌ವೈ ಪಾಲಿಗೆ ಮತ್ತೊಂದು ಸವಾಲಿನ ವರ್ಷವಾಗಲಿದೆ ಎಂಬುವುದಂತೂ ಸ್ಪಷ್ಟ. ಹೊಸ ವರ್ಷದಲ್ಲಿ ಎದುರಾಗುವ ಸವಾಲನ್ನು ಅವರು ಹೇಗೆ ಎದುರಿಸುತ್ತಾರೆ ಎಂಬುವುದನ್ನು ಕಾದುನೋಡಬೇಕಿದೆ.

ಮುಂದಿನ ಲೇಖನ

Vijay Karnataka News App: ನಿಮ್ಮ ಸುತ್ತಮುತ್ತಲು ನಡೆಯುವ ವಿದ್ಯಮಾನಗಳನ್ನುಹಂಚಿಕೊಳ್ಳಲು ಬಯಸುತ್ತೀರಾ? ಹಾಗಿದ್ದಲ್ಲಿ ವಿಜಯ ಕರ್ನಾಟಕ ಆ್ಯಪ್‌ಡೌನ್‌ಲೋಡ್‌ ಮಾಡಿಕೊಳ್ಳಿ ಹಾಗೂ ರಿಪೋರ್ಟ್‌ ಕಳಿಸಿ
ಲೇಟೆಸ್ಟ್‌ ನ್ಯೂಸ್‌ ಅಪ್‌ಡೇಟ್‌ಗಳನ್ನು ಪಡೆಯಿರಿ, Vijay Karnataka ಫೇಸ್‌ಬುಕ್‌ಪೇಜ್‌ ಲೈಕ್‌ ಮಾಡಿರಿ