ಸ್ಥಳ ನಿಯುಕ್ತಿ ಪತ್ರ: ಮುಖ್ಯ ಕಾರ್ಯದರ್ಶಿಯ ಆಪ್ತ ಕಾರ್ಯದರ್ಶಿಯ ನಕಲಿ ಸಹಿ

ಬೆಂಗಳೂರು: ರಾಜ್ಯ ಸರಕಾರದ ನಕಲಿ ಲೆಟರ್‌ ಹೆಡ್‌ ಮೇಲೆ ರಾಜ್ಯದ ಮುಖ್ಯ ಕಾರ್ಯದರ್ಶಿಯವರ ಆಪ್ತ ಕಾರ್ಯದರ್ಶಿಯ ನಕಲಿ ಸಹಿ ಮಾಡಿದ ಪತ್ರವೊಂದನ್ನು ವಾಟ್ಸ್‌ಆ್ಯಪ್‌ನಲ್ಲಿ ಹರಿಬಿಟ್ಟ ಅಪರಿಚಿತರ ವಿರುದ್ಧ ವಿಧಾನಸೌಧ ಪೊಲೀಸ್‌ ಠಾಣೆಯಲ್ಲಿ ಕೇಸ್‌ ದಾಖಲಾಗಿದೆ.

ಕರ್ನಾಟಕ ಸರಕಾರದ ಸಚಿವಾಲಯದ ಅಧಿಕಾರಿ ಶಿವಶಂಕರ್‌ ಎಂಬುವರ ಮೊಬೈಲ್‌ಗೆ ವಾಟ್ಸ್‌ಆ್ಯಪ್‌ ಮೂಲಕ ಇತ್ತೀಚೆಗೆ ಪತ್ರವೊಂದು ಬಂದಿತ್ತು. ಅದರಲ್ಲಿ, ''ನೇರ ನೇಮಕಾತಿಯಲ್ಲಿ ಆಯ್ಕೆಯಾದ ಅಭ್ಯರ್ಥಿಗಳಿಗೆ ಸ್ಥಳ ನಿಯುಕ್ತಿಗೊಳಿಸಿ ಕಾರ್ಯ ನಿರ್ವಹಿಸಲು ಅನುಮತಿಗಾಗ ಕೋರಿ'' ಎಂದು ಉಲ್ಲೇಖಿಸಿ ಮುಖ್ಯ ಕಾರ್ಯದರ್ಶಿಯ ಆಪ್ತ ಕಾರ್ಯದರ್ಶಿ ತುಕಾರಂ ಕಲ್ಯಾಣಕರ ಅವರ ಕಚೇರಿಯಿಂದ ವಿಧಾನಸೌಧ ಸಚಿವಾಲಯದ ಕಾರ್ಯದರ್ಶಿ ಕಚೇರಿಗೆ ಕಳುಹಿಸಿರುವಂತೆ ನಮೂದಿಸಲಾಗಿತ್ತು. ಈ ವಿಚಾರವನ್ನು ಶಿವಶಂಕರ್‌ ಅವರು ತುಕಾರಂ ಅವರ ಗಮನಕ್ಕೆ ತಂದಿದ್ದರು.

ಪರಿಶೀಲನೆ ನಡೆಸಿದಾಗ ಅದು ತಮ್ಮ ಸಹಿ ಅಲ್ಲ ಹಾಗೂ ಯಾವುದೇ ಪತ್ರವನ್ನು ಬರೆದಿಲ್ಲ ಎಂದು ಶಿವಶಂಕರ್‌ ಅವರಿಗೆ ತಿಳಿಸಿದ್ದಾರೆ. ನಂತರ ತಮ್ಮ ಸಹಿ ಮಾಡಿ ನಕಲಿ ಪತ್ರವನ್ನು ಹರಿಬಿಟ್ಟವರ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳುವಂತೆ ವಿಧಾನಸೌಧ ಠಾಣೆಗೆ ನೀಡಿರುವ ದೂರಿನಲ್ಲಿ ತುಕಾರಂ ಕೋರಿದ್ದಾರೆ.